77
Lua dↄnlɛ bɛɛkɛa taasi guu
Asafa lɛ.
Ma lɛzù Luazi,
ma wiilɛ̀wà,
ma lɛzù Luazi aà ma yãma.
Kua taasi guu ma Dii kĩ́i wɛ̀ɛlɛ,
ma ↄ dↄa Luazi gwã́ kpasasai,
ma nↄ̀sɛ i nínio.
Kɛ́ ma làasoo tà Lua kĩ́i,
ↄ̃ málɛ kãsãnkɛ,
kɛ́ ma aà wàaipà,
ma nisĩna vùa.
Ń ma wɛ́ kũa, mi e i'òo,
ma gↄ̃ bíli guu, mi dↄ̃ lá má oo.
Ma làasookɛ̀ yãawa
ń wɛ̃̀ zizi pↄ́ gɛ̃̀ↄ yã́o.
Lɛ pↄ́ má dà yãa dↄ̀magu gwã́,
ma làasookɛ̀wà mà wɛɛlɛ dↄ̃.
Ma mɛ̀: Dii wá vũaa gↄↄpii yã̀?
Wá yã́ a kaaàgu lↄoa?
Aà gbɛ̃kɛ mìdɛ míↄmiↄ yã̀?
Aà yã́ aↄ gbooa gↄↄpii yã̀?
10 Wá wɛ̃nagwaa yã́ sã̀ Luagu yã̀?
Aà pↄ pàwázi, a wá wɛgwa lↄoa?
11 Ɔ̃ ma mɛ̀: Yã́ pↄ́ má kũan kɛ:
Musude ↄzɛɛdↄ̀wɛ̃ɛɛ.
 
12 Má làasookɛ Dii yãbↄnsaɛↄwa,
mí aà yã́ pↄ́ a kɛ̀ yãaↄ dↄ gbɛ̃́ↄgu.
13 Má n dabudabukɛaↄ wàaipa píi,
mí n yãzↄ̃ↄkɛaↄ onɛ́.
14 Lua, n zɛ́ gbãsĩ vĩo.
Dii kpele mɛ́ zↄ̃ↄ lán Luawai?
15 Ḿmɛ ń Lua dabudabukɛna ũ,
n n gbãa ↄ̀lↄ buiↄnɛ.
16 N n gbɛ̃́ↄ mìsi ń n gã̀sa gbãao,
wá Yakↄbu ń Yosɛfuo buiↄ.
 
17 Ísia wɛsìnlɛ Lua,
ísia wɛsìnlɛ ↄ̃ à kↄ̃dɛ̀,
à lùalua za a ɛu.
18 Lou kwɛ̀, a pũnaa kↄ̃fĩ dↄ̀ luabɛ,
n kà tɛdeↄ kpa loupilɛa ũ.
19 N pũnaa kↄ̃fĩ dↄ zàa'ĩana guu,
loupilɛa dṹnia pù píi.
Tↄↄlɛ gbãlɛ à lùalua.
20 N zɛ́ dà ísiau,
n gɛ̃kĩi bↄ̀ í zↄ̃ↄ guu,
wi n kɛ̀sɛgbɛ eo.
21 N dↄaa n gbɛ̃́ↄnɛ lán sã waiwa
Mↄizi ń Aalonao sabai.