Bibeli Luayãtaalá Zakali 10

Dii ↄliaa Yudaↄzi

1 À lou gbɛa Diiwa káabuana,

asa Dii mɛ́ ì to lou kɛkɛ,

ì to lou kwɛ́nɛ́,

ì to buapↄ́ kɛ baadeɛ.

2 Tã́aↄ ì yãyaaa'o,

màsokɛnaↄ ì yã́ ɛgɛna e.

Wɛ́pungu'enaↄ yã́á mↄafiliɛ,

an gbɛ̃́ↄ nↄ̀sɛninianɛá pãɛ.

A yã́i tò gbɛ̃́ↄ liaaa lán sãↄwa,

an kúsu kwɛa kɛ́ aa dãna vĩo yã́i.*

3 Ma Dii ma mɛ̀,

ma pↄ paa an dãnaↄzi,

má ĩada blesanapiↄwa.

Ma Dii Zĩgↄ̃de má ↄlia Yudaↄzi ma kpàsa pↄ́ↄ ũ,

má ń kɛ zĩkasↄ̃ gawide ũ.

4 Gbɛ̃́ pↄ́ dɛ lán ɛ̃daalɛgbɛwa† a bↄ ń guu,

gbɛ̃́ pↄ́ dɛ lán kálo‡ ge zĩkasawa a bↄ we,

kpalablenaↄ bↄ we píiɛ.

5 Aaↄ dɛ nɛgↄ̃naↄ ũɛ,

aa ↄ̃zↄ̃ ń ibɛɛↄwa zĩkawɛ̃lɛ zɛ́u lán pɛ̀lɛawa.

Lá má kúńnↄ,

aa zĩka, aai sↄ̃deↄ fu.

6 Má Yudaↄ gba gbãa,

má Yosɛfu buiↄ suaba,

mí suńnↄ ń pá ziu,

kɛ́ má ń wɛ̃na vĩ yã́i.

Aaↄ dɛ lá mi ń vũaa yãaowa,

asa mámɛmaa Dii ń Lua,

má yãmamá.

7 Ɛflaiũ buiↄ gↄ̃ nɛgↄ̃naↄ ũ,

an pↄ iↄ na lán vɛ̃ɛ zↄ̃̀lɛmáwa.

An nɛ́ↄ e, aai pↄnakɛ,

an pↄ́ a kɛ na Diiwa.

8 Má swe pɛ́ńzi, mí ń kãaa,

má ń boɛ, aaiↄ dasi lán yãawa.

9 Baa tó ma ń fãaa buiↄ guu,

ma yã́ aↄ dↄńgu za bùsu zã̀zãↄuɛ.

Ampiↄ ń ń nɛ́ↄ aaↄ kuɛ, aai su.

10 Má ń bↄ Egipi bùsuu mà suńnↄ,

má ń kãaa Asili bùsuu,

mí suńnↄ Galada bùsuu ń Libão.

Gu a mↄ́máo.

11 Aa bua Egipi ísiawa,

aa a ikooaↄ fu,

Niili ísiↄ ba.

Asiliↄ wala a kpálɛ,

Egipiↄ iko a láa.

12 Ma Dii Zĩgↄ̃de ma mɛ̀,

ma gbɛ̃́ↄ gbãa'e ma kĩ́i,

aaiↄ tɛmazi.

* 10:2 Mat 9.36 † 10:4 Isa 28.16, Ɛfɛ 2.20 ‡ 10:4 Isa 22.23