4
Mɛ̀dokↄ̃nↄkɛnaa
1 Makũ kũ má de purusuna ũ Dikirinɛ, ma wɛ́ kɛ̀áwa, á kunna gↄ̃ de lákũ Luda á sísi àgↄ̃ de nà.
2 À kↄ̃ fↄ̃, àgↄ̃ yekↄ̃i zĩdabusanaa gũn kũ nɛ̀sɛyĩdao kũ mɛnao.
3 À wɛ́ tã àgↄ̃ lɛ́dokↄ̃nↄ kũ à bò Luda Nini kĩnaa vĩ bà kũ àdi á dↄkↄ̃a ũ.
4 Mɛ̀ mɛ̀n domɛ, akũsↄ̃ Nini pìi mɛ̀n domɛ. Lɛn tãmaa kũ Luda á sísiaa mɛ̀n do lɛ se.
5 Dikiri mɛ̀n do, akũsↄ̃ donyĩzɛ mɛ̀n do kũ da'itɛkɛna mɛ̀n doo.
6 Luda mɛ̀n domɛ ó pínki De ũ. Àkũ mɛ́ à iko vĩ ó baadia, àdigↄ̃ zĩ kɛ ó gbɛ̃ sĩnda pínki gũn, à kú kũ ó gbɛ̃ sĩnda pínkio.
7 Kirisi gbɛ̃kɛ kɛ̀ ó baadinɛ, lákũ à gba dàwɛrɛ nà lɛ́n.
8 Abire yãi à kɛ̃na Luda yãn ò pì:
Kũ à fùtɛ à tà musu, à dò zĩ̀zↄnↄnɛ arɛ,
à gba dà gbɛ̃nↄnɛ.
9 A futɛ à tana musu bire de deramɛɛ? Abire pì à kìpa ari zĩtɛ gɛ̃i gĩa.
10 Gbɛ̃ kũ à kìpaa pìimɛ gbɛ̃ kũ à fùtɛ à tà ludambɛ musumusu ũ, de à gu sĩnda pínki pa.
11 Àkũ mɛ́ à gbɛ̃kenↄ gbà zɛ́ ògↄ̃ de zĩ̀rinↄ ũ, gbɛ̃kenↄ annabinↄ, gbɛ̃kenↄ baarunnakparinↄ, gbɛ̃kenↄ pasutonↄ ke yãdannɛrinↄ,
12 de Luda gbɛ̃nↄ gↄ̃ kú a zĩ soru gũn, de Kirisi mɛ̀ gbãna kũ,
13 ari ó pínki ògↄ̃ gɛ́ ká Luda Nɛ́ náani dokↄ̃nↄ kɛnaaa a dↄ̃na dokↄ̃nↄ gũn, de ò gↄ̃ gbɛ̃ papananↄ ũ Kirisi kũ pↄ́ sĩnda pínki pɛ̀kɛrɛa zↄ̃kↄ̃ lɛ́n.
14 Tó lɛmɛ ónigↄ̃ de nɛ́ fíti kũ òdi ↄ̃ndↄ̃ kũ manafikio kɛńnɛ ò ń sãtɛnↄ ũ doro, kũ yã dufu dannɛna dì ń sɛ́ lán ĩa ke ísↄ̃ bà.
15 Oi, óni yãpura o kũ yenyĩo, ò gbã yã sĩnda pínki musu Kirisi kũ à de a mì ũ gũn.
16 A gũnn mɛ̀gu sĩnda pínki dì kↄ̃ kũn ò nakↄ̃a kũ tĩnↄ gbãnao, akũ mɛ̀gunↄ dì zĩ kɛ a zɛ́a, mɛ̀ɛ dìgↄ̃ gbã àgↄ̃ kara kũ yenyĩo.
Kunna zĩ kũ kunna dufuo
17 Abire yãi matɛn yã oárɛ kũ Dikiri tↄ́o, matɛni á gbao laakarii. Àsungↄ̃ kun lán kifiri kũ ń nɛ̀sɛfutakɛ dońnɛ arɛnↄ bàro.
18 Ń laasun ń kɛ́ yↄ̃nkↄ, ò zã̀ kũ wɛ̃̀ndi kũ Luda dì kpáḿmao, kũ ń wɛ́ sira, akũsↄ̃ ń sã gbãna yãi.
19 Ò nɛ̀sɛ vĩro, ò ń zĩda kpà wé'isariyãa, ò dà vãni buri sĩnda pínki kɛna ni vĩ.
20 Ákↄ̃nↄ sↄ̃, ádi Kirisi yã dada lɛro.
21 Yesu gũn a a yã mà, a yãpura kũ à vĩ dàda.
22 Ò òárɛ à ↄ gbarɛ á dà zĩ kũ à doárɛ arɛi, kũ à yàka á pↄ́nidɛna vãninↄ yãi.
23 Ò òárɛ à á nɛ̀sɛ litɛ á laasun gↄ̃ dufu,
24 áni dà dufu kũ Luda kɛ̀ lán a pↄ́ bà sɛ́, á kunna nigↄ̃ adona kunna yãpurade ũ yãzɛdekɛ gũn.
25 Abire yãi à ↄ gbarɛ manafiki yãi, á baadi gↄ̃ yãpura o a gbɛ̃dakenɛ, zaakũ mɛ̀dokↄ̃nↄdenↄmɛ ó ũ.
26 Tó á pↄ fɛ̃̀, àsun durunna kɛro. Àsun tó ifãntɛ̃ gɛ̃ kpɛ́n àgↄ̃ kpɛ́ pↄfɛ̃naro,
27 de àsun Ibilisi gba zɛ́ro yãi.
28 Gbɛ̃ kũ àdi kpãni o yã à kpãni tó. À wɛ́ tã à zĩ mana kɛ kũ a ↄo, de à pↄ́ le à bo takasidenↄnɛ.
29 Àsun tó yã vãni ke bo á lɛ́nlo, séde a zɛ́de kũ ani gbɛ̃ kara, à kɛ àre ũ gbɛ̃ kũ òtɛn manↄnɛ.
30 Àsun Luda Nini kũ à kú adona da pↄsiranlo. À de sèeda kũ Luda kɛ̀áwa ari á bona gↄrↄ zĩ ũ.
31 Àsun kɛ ĩni kũ gbɛ̃keoro. À pↄfɛ̃ tó kũ pɛ̃tɛ̃o kũ patana gbãnao kũ gbɛ̃sↄ̃sↄ̃naao kũ pãsĩkɛna buri sĩnda pínkio.
32 Àgↄ̃ gbɛ̃kɛ kɛ kũ kↄ̃o. Àgↄ̃ kↄ̃ wɛ̃nda gwa. À sùru kɛ kũ kↄ̃o lákũ Luda sùruu kɛ̀ kãáo nà Kirisi gũn.