Luda yã takada kũ Bisã yão BONAA 19

Sinai kpi sarɛ

1 Isarailanↄ bona Misila mↄ aakↄ̃de gũn 2 ò fùtɛ Rɛfidimu. Kũ ò kà Sinai gbárannan, akũ ò bùraa kàtɛ gwe Sinai kpi sarɛ. 3 Musa dìdi à gɛ̀ɛ Luda kĩnaa kpi pìi musu, akũ Dikiri lɛ́ zùi à pì: Ǹ yã dí o Yakubu buri Isarailanↄnɛ: 4 A è lákũ ma kɛ̀ Misilanↄnɛ nà, lákũ ma á sɛ́ ma su kãáo ma kĩnaa, lákũ vãu dì a nɛ́ sɛ́ a dɛ̀mbɛrɛɛa nà. 5 Tó a ma yã mà á ma bàka kunna kãáo yã kũna tera sà, anigↄ̃ de ma gbɛ̃ yenyĩdenↄ ũ buri sĩnda pínki tɛ́. Bee kũ andunia de ma pↄ́ ũ pínki, 6 ánigↄ̃ demɛnɛ kínanↄ kũ sa'orinↄ ũ, ma gbɛ̃ kũ ò kú adonanↄ ũ. Yã kũ ĩni o Isarailanↄnɛɛn gwe.

7 Musa kìpa à gbɛ̃ zↄ̃kↄ̃nↄ sìsi, akũ à yã kũ Dikiri ònɛɛ bàbańnɛ pínki. 8 Gbɛ̃nↄ wèa ń pínki ò pì: Yã kũ Dikiri òwɛrɛ pínki óni kɛ. Akũ Musa gɛ̀ɛ à yã kũ ò òo bàba Dikirinɛ. 9 Dikiri pìnɛ: Mani su n kĩnaa túsukpɛ gègetee gũn, de gↄrↄ kũ matɛn yã onnɛ, oni ma onigↄ̃ n náani vĩ gↄrↄ sĩnda pínki. Akũ Musa yã kũ gbɛ̃nↄ òo bàba Dikirinɛ. 10 Akũ Dikiri pìnɛ: Ǹ gɛ́ ń kĩnaa ǹ ońnɛ ò gbã̀ bo ń zĩdanɛ gbãra kũ ziao, ò ń pↄ́kasanↄ pípi. 11 Ògↄ̃ kú soru gũn ziando, zaakũ a gↄrↄ aakↄ̃de zĩn mani kipa mà zɛ Sinai kpi musu gbɛ̃ sĩnda pínki wára. 12 Ǹ zĩtɛ lɛ́ sèeda dańnɛ kpi pìi pↄ̀rↄ lɛ́a ari à lìkai pínki. Ǹ ońnɛ ò laakari kɛ. Òsun didi kpi pìiaro. Ń gbɛ̃ke sún ↄ kɛa sero. Gbɛ̃ kũ à ↄ kɛ̀a, ò ade dɛ. 13 Òsun ↄ kɛ adearo. Ò a pápa kũ gbɛ̀ɛo ke ò a pápa kũ kàao ò dɛ. Pↄ́kãden yá, bisãsirin yá, à gàmɛ. Tó ò mà ò kuru pɛ̀ ò a yĩsãm pà, ò na kpi pìii.

14 Musa kìpa kpi pìia à sù à gbɛ̃nↄ lè à òńnɛ ò gbã̀ bo ń zĩdanɛ ò ń pↄ́kasanↄ pípi. 15 À ɛ̀ra à pìńnɛ: Àgↄ̃ kú soru gũn gↄrↄ aakↄ̃de zĩ yãi. Àsun wútɛ kũ nↄgbɛ̃oro. 16 Kũ gu dↄ̀ a gↄrↄ aakↄ̃de pìia, akũ legũ tɛn pũtã àtɛn pí, akũ legũ sìsi kpi musu. Kũ ò kuru yĩsãmpanaa mà, akũ vĩna gbɛ̃ kũ ò kú bùrannↄ kũ̀ ń pínki òtɛn lukaluka. 17 Musa bò kũńwo bùran à gɛ̀ɛ kũńwo Luda kĩnaa, akũ ò zɛ̀ zĩtɛ kpi pìi sarɛ. 18 Túsukpɛ dà Sinai kpila kũ Dikiri kìpaa kũ tɛ́o yãi. Túsukpɛ pìi fùtɛ lán tãma túsukpɛ bà, akũ kpi pì tɛn yĩgãyĩgã manamana. 19 Kuru yĩsãmpana tɛn kara. Kũ Musa yã ò, akũ Luda wèa legũpũtãnaa gũn.

20 Dikiri kìpa à zɛ̀ Sinai kpi mìsↄ̃ntɛa à Musa sìsi, akũ à dìdi à gɛ̀ɛ gwe. 21 Dikiri pìnɛ: Ǹ kipa ǹ kpãkɛ̃ gbɛ̃nↄi, òsun vĩ gulɛzɛkila ò su ò ma gwaro, de ń paridenↄ sún gagaro yãi. 22 Bee sa'ori kũ òdi namainↄ, ò gbã̀ bo ń zĩdanɛ de màsun fɛ̃ńyĩro yãi. 23 Musa pì Dikirinɛ: Oni didiro, zaakũ n kpãkɛ̃wái n pì ò zĩtɛ lɛ́ sèeda da kpi pìi pↄ̀rↄ lɛ́a à gↄ̃ n pↄ́ ũ. 24 Akũ Dikiri pìnɛ: Ǹ kipa ǹ Haruna sɛ́ ǹ su kãao, ama sa'orinↄ kũ gbɛ̃ kparanↄ sún vĩ bara ò su ma kĩnaaro de màsun fɛ̃ńyĩro yãi. 25 Akũ Musa kìpa gbɛ̃ pìnↄ kĩnaa à yã pìi òńnɛ.