Luda yã takada kũ Bisã yão BONAA 3

Luda Musa sisinaa

1 Musa tɛni a anzure Midiã bùsu sa'ori pↄ́kãdenↄ dã à vĩ̀ gbárannala ari à kà kpi kũ òdi pi Orɛbu kĩnaa. 2 Akũ Dikiri Malaikaa bò à sùa tɛ́vuraa gũn tariankpãn. Musa tariankpã pìi gwà à è tɛ́ kúa, ama àtɛn tɛ́ kũro. 3 Akũ à pì: Mani gɛ́ mà daboyã pì gwa de mà dↄ̃ pↄ́ kũ à tò tariankpã pì tɛn tɛ́ kũro. 4 Kũ Dikiri è à sù gwa, akũ à lɛ́ zùi zaa tariankpã pìi gũn à pì: Musa! Musa! Akũ à wèa à pì: Makũ di! 5 Luda pìnɛ: Ǹsun nairo. Ǹ n kyate bobo, zaakũ gu kũ ń zɛn kun adonamɛ. 6 Akũ à pì: Makũmɛ n dizinↄ Ibrahĩ kũ Isaakuo kũ Yakubuo Luda ũ. Akũ Musa pↄ́ kù a wɛ́a, kũ à wɛ́ kɛna pla kũ Ludao vĩna vĩ yãi. 7 Akũ Dikiri pì: Ma yã'ũmmana kũ ma gbɛ̃nↄ tɛn kɛ Misila è, ma wiki kũ ń wɛ́tãmmarinↄ tò òtɛn lɛ́ mà. Má ń wãwãkɛnaa dↄ̃̀. 8 Ma kipa mà ń sí Misilanↄa mà ń bↄtɛ bùsuu pìn mà gɛ́ kũńwo bùsu mana yàasan, gu kũ vĩ kũ zↄ́'io din, bùsu kũ Kanaanↄn kun kũ Itinↄ kũ Amↄrinↄ kũ Pɛrizinↄ kũ Ivinↄ kũ Yebusinↄo. 9 Isarailanↄ wikilɛna kà ma kĩnaa tera sà, ma wari kũ Misilanↄ tɛn dↄḿma è. 10 Ǹ gɛ́ tera sà, ma n zĩ Firi'aunaamɛ de ǹ ma gbɛ̃ Isarailanↄ bↄtɛ Misila. 11 Akũ Musa pì Ludanɛ: Dín ma ũ kũ mani gɛ́ Firi'auna kĩnaa mà Isarailanↄ bↄtɛ Misilai? 12 Luda pìnɛ: Manigↄ̃ kú kũnwo. Zĩna kũ ma n zĩ sèedaan dí. Tó n ń bↄ́tɛ Misila, áni donyĩ kɛmɛnɛ kpi dí pↄtɛa.

13 Akũ Musa pì Ludanɛ: Tó ma gɛ ma ò Isarailanↄnɛ ma pì, ń dizinↄ Luda mɛ́ à ma zĩḿma, tó ò ma la n tↄ́i sↄ̃ bi? Mani pińnɛ deramɛɛ? 14 Luda wèa à pì: Makũmɛ gbɛ̃ kũ má de a ũ ũ. Ǹ ońnɛ makũ mɛ́ ma n zĩḿma. 15 Luda pìnɛ dↄ: Ǹ o Isarailanↄnɛ makũ Dikiri ń dizinↄ Ibrahĩ kũ Isaakuo kũ Yakubuo Luda mɛ́ à n zĩḿma. Ma tↄ́n gwe gↄrↄ sĩnda pínki. Àgↄ̃ ma sísi lɛ ari á buria. 16 Ǹ gɛ́ ǹ Isaraila gbɛ̃ zↄ̃kↄ̃nↄ kakara ǹ ońnɛ makũ Dikiri ń dizinↄ Ibrahĩ kũ Isaakuo kũ Yakubuo Luda mɛ́ à bò à sùmma. Ǹ ońnɛ matɛni ń e ma yã kũ òtɛn kɛńnɛ Misila è. 17 Mani ń bↄtɛ Misila gu kũ òtɛn wɛ́ tãḿma pìn, mani gɛ́ kũńwo bùsu kũ Kanaanↄn kun kũ Itinↄ kũ Amↄrinↄ kũ Pɛrizinↄ kũ Ivinↄ kũ Yebusinↄo, gu kũ vĩ kũ zↄ́'io din. 18 Oni n yã ma. Mↄkↄ̃n kũ Isaraila gbɛ̃ zↄ̃kↄ̃nↄ à gɛ́ à Misila kína le à onɛ makũ Dikiri Eberunↄ Luda ma bo ma suáwa, ma pì à á gba zɛ́ à gɛ́ gↄrↄ aakↄ̃ kɛ gbárannan de à sa o makũ Dikiri á Ludaa. 19 Má dↄ̃ kũ Misila kína ni we à gɛ́ro, tó adi kɛ ma a dà tilasiro. 20 Mani ↄ tↄ̃ Misilanↄa, mani daboyãnↄ kɛ mà wɛ́ tãoḿma, gbasa à á gbarɛ. 21 Mani tó Misilanↄ á wɛ́ gwa, de tó átɛn tá, áni tá ↄkoriro. 22 Á nↄgbɛ̃ sĩnda pínki andurufu ke wura nↄmanablebↄnↄ kũ pↄ́kasanↄ gbɛka a Misila nↄgbɛ̃ dakea kũ ń nↄgbɛ̃ kũ ò kú a bɛanↄ, à da á nɛ́gↄ̃gbɛ̃nↄnɛ kũ á nɛ́nↄgbɛ̃nↄ. Lɛn áni Misilanↄ pↄ́nↄ síḿma lɛ manamana.