10
1 Musa doka bi yã mana kũ àtɛn su takamɛ, adi kɛ yã pìinlo. Abire yãi sa dokↄ̃nↄ pì ona gɛ̃̀n baaakↄ̃ wɛ̃̀ kũ wɛ̃̀ɛo dì fↄ̃ à gbɛ̃ kũ òtɛn na Ludainↄ kɛ papana zikiro.
2 Tó sa pì onaa gbã̀ bò donyĩrinↄnɛ gɛ̃̀n do ari gↄrↄ sĩnda pínkimɛ yã, de ń kù gbãna, ò a onaa tò.
3 Yãpura gũn sa'onaa pì mɛ́ àdigↄ̃ gbɛ̃nↄ durunna yã dↄńgu wɛ̃̀ kũ wɛ̃̀ɛo.
4 Zaakũ zùsa kũ blèkofĩnioo aru dì fↄ̃ à durunna kɛ̃ḿma zikiro.
5 Abire yãi kũ Kirisi tɛn su andunia gũn, à pì Ludanɛ:
Ń ye sa'opↄ ke gbairo,
akũ n bisãsiri mɛ̀ɛ kɛ̀mɛnɛ.
6 Sa'opↄ kũ òdi ká tɛ́n à tɛ́ kũ
kũ sa'opↄ kũ òdi o durunna yã musuo
dì kánguro.
7 Akũ ma pì: Makũmɛ la!
Lákũ ò kɛ̃̀ takadan ma yã musu nà
ma su n pↄyenyĩna kɛmɛ, Luda.
8 Káaku gĩa à pì, sa'ona kũ gbao kũ sa kũ òdi ká tɛ́n à tɛ́ kũo kũ sa kũ òdi o durunna yã musuo dì ká Ludaguro, à yeiro, bee kũ doka mɛ́ à dìtɛ.
9 Akũ à pì, akãamɛ dí, a su a pↄyenyĩna kɛmɛ. À a káakupↄ kpà kpado a plade ditɛna yãi.
10 Luda pↄyenyĩnaa pì kɛnaa gũn Yesu Kirisi a zĩda kpà sa'opↄ ũ gɛ̃̀n do, à tò ó kú adona Luda gbɛ̃nↄ ũ.
11 Gↄrↄ sĩnda pínki sa'orinↄ dìgↄ̃ kú ń zĩ gũmmɛ, ògↄ̃ sa dokↄ̃nↄ kũ àdi fↄ̃ à durunna kɛ̃ḿma zikiro o gɛ̃̀n baaakↄ̃.
12 Kirisi sↄ̃, à sa ò durunna yã musu gɛ̃̀n domɛ ari gↄrↄ sĩnda pínki, akũ à gɛ̀ɛ à vùtɛ Luda ↄplai.
13 Zaa gↄrↄ kũ̀a à kú gwe, àtɛn dã Luda a ibɛrɛnↄ kɛarɛ a tìntin ũ.
14 Zaakũ sa'ona gɛ̃̀n do pìi gũn, à tò gbɛ̃ kũ à gbã̀ bòńnɛnↄ gↄ̃̀ papana ari gↄrↄ sĩnda pínki.
15 Luda Nini ɛ̀ra àtɛn yã pì owɛrɛ dↄ à pì:
16 Ma bàka kunna kũńwo gↄrↄ birenↄ gbɛra yãn dí:
Mani ma dokayãnↄ dańnɛ ń nɛ̀sɛɛ gũn,
mani kɛ̃ ń swɛ̃̀ɛa.
17 Akũ gbasa à pì:
Mani ń durunna kũ ń taarinↄ yã da doro.
18 Lákũ à ń durunna kɛ̃̀ḿma nà, sa'ona ń yãi zɛ́ vĩ doro.
Ò na Ludai
19 Abire yãi ma gbɛ̃nↄ, kũ Yesu aru gbãnao ó gɛ̃na Ludakukin zɛ́ vĩ kũ swɛ̃̀ɛo kpatɛna.
20 À wɛ̃̀ndi zɛ́ dufu bòwɛrɛ a mɛ̀ɛ gãi à gɛ̃̀ kũoo lábure kpɛ ari Ludakukia.
21 Lákũ ó sa'ori zↄ̃kↄ̃ vĩ nà Luda ↄnkũri ũ,
22 ò na Ludai kũ nɛ̀sɛ doo kũ a náanikɛna sikaa sario kũ swɛ̃̀ kũ ò pìpi ò taari laasun bò a gũnwo kũ mɛ̀ kũ ò a zú ò kũ í swáswao.
23 Ògↄ̃ tãmaa kũ o zɛo kũna gíngin, zaakũ Luda a lɛ́ sɛ̀, akũsↄ̃ à náani vĩ.
24 Ò laakari dↄkↄ̃a, ò tɛ́ kákↄ̃gu yenyĩ kũ yãmanakɛnaao yã musu.
25 Òsun pã kpá ó kↄ̃kakaranaai lákũ gbɛ̃kenↄ dì kɛ nàro. Ò lɛ́ dakↄ̃a, atɛ̃nsa lákũ a è Dikiri sugↄrↄ tɛn ká kãni nà.
26 Tó o yãpura mà o dↄ̃̀, tó o gi ótɛn durunna kɛ, sa'ona kũ ani durunna kɛ̃wá kun doro.
27 Pↄ́ kũ à gↄ̃̀wɛrɛ mɛ́ à de ògↄ̃ wɛ́ dↄ yãkpatɛi ũ kũ swɛ̃̀kɛ̃nguo kũ tɛ́ gbãna kũ ani Luda ibɛrɛnↄ kakatɛo.
28 Òdi gbɛ̃ kũ à gì Musa doka dai dɛ a wɛ́ gwanaa sari gbɛ̃nↄn pla ke aakↄ̃ sèedakpanaa musu.
29 Tó gbɛ̃ gɛ̀sɛɛ pɛ̀tɛ Luda Nɛ́a, akũ à Luda bàka kunna kũńwo aru kũ à gbã̀ bòarɛ gya bò, akũ à Nini Gbɛ̃kɛkɛnnɛri sↄ̃̀sↄ̃, àgↄ̃ dↄ̃ kũ a wɛ́tãmma nigↄ̃ zↄ̃kↄ̃ de abirekũla manamana.
30 Zaakũ ó yã díkĩna òri dↄ̃ à pì, akãa mɛ́ áni fĩna boḿma, akãa mɛ́ áni fĩna bońnɛ. Ò pì dↄ, Dikiri ni yãkpatɛ kɛ kũ a gbɛ̃nↄ.
31 Yã pãsĩmɛ, tó n lɛtɛ n da Luda Wɛ̃̀ndide ↄĩ.
32 À laasun lɛ́ á kunna yãa. Á wɛ́kɛ̃naa gbɛra a wari fↄ̃̀ á ↄsi zↄ̃kↄ̃ kanaa gũn.
33 Zĩkenↄa òdi á sↄ̃sↄ̃, òdi á wɛ́ tã pari gũn. Zĩkenↄa adì zɛ kũ gbɛ̃ kũ òtɛni wɛ́ tã lɛnↄ.
34 A purusunanↄ wɛ̃nda dↄ̃̀. Kũ ò á pↄ́nↄ sìáwa, a we kũ pↄnnao, zaakũ á dↄ̃ kũ á aruzɛkɛ mana kũ anigↄ̃ kun gↄrↄ sĩnda pínki vĩ.
35 Abire yãi àsun tó á wↄ́rↄgↄ kũ à àre vĩárɛ zↄ̃kↄ̃ gɛ̃tɛáwaro.
36 Séde àgↄ̃ mɛna vĩ de à pↄ́ kũ Luda a lɛ́ sɛ̀ le a pↄyenyĩnakɛnaa gbɛra.
37 Zaakũ à gↄ̃̀ fítimɛ, ani gì kɛro,
kũ gbɛ̃ kũ àtɛn su ni kipa.
38 Gbɛ̃ mana nigↄ̃ kun ma náani kũ àtɛn kɛ yãi,
ama tó à ɛ̀ra kpɛ, ma pↄ nigↄ̃ nnaro.
39 Gbɛ̃ kũ òdi boru kũ kpɛo ò ń zĩda kakatɛnↄn ó ũro. Gbɛ̃ kũ ò Luda náani kɛ̀ ò surabanaa lènↄn ó ũ.