3
Yinni Gusunɔ u koo
win Hunde doke tɔmbu sɔɔ
1 Yen biru kon nɛn Hunde doke tɔmbu kpuro sɔɔ.
Bɛɛn bii tɔn durɔbu kɑ tɔn kurɔbu bɑ koo nɛn gɑri gere,
kpɑ bɛɛn durɔ tɔkɔnu nu n dosusu mɔ̀,
kpɑ bɛɛn ɑluwɑɑsibɑ bu kɑ̃sinu wɑ.
2 Bɑɑ kɑ yobɔ, kon bu nɛn Hunde wɛ̃wɑ tɔ̃ɔ te.
3 Yen tɔ̃ɔ te sɔɔ, kon mɑɑmɑɑkibɑ ko.
Kon de yɛm kɑ dɔ̃ɔ kɑ wii bɑkɑsu sɔ̃ɔsirɑ wɔllɔ kɑ temɔ.
4 Sɔ̃ɔ u koo yɑm tĩrɑ,
kpɑ suru u swɛ̃rɑ nge yɛm,
Yinni Gusunɔn tɔ̃ɔ nɑnumgii te, tu sere tunumɑ.
5 Adɑmɑ yen tɔ̃ɔ te,
wi u Yinni Gusunɔ sokɑ, u koo fɑɑbɑ wɑ.
Gɑbu bɑ koo kisirɑ nɔni swɑ̃ɑ ten di
Siɔnin guurɔ Yerusɑlɛmuɔ
nge mɛ Yinni Gusunɔ u geruɑ.
Beyɑ be u sokɑ bɑ n kɑ wɑ̃ɑru mɔ.