Luda yã takada kũ Bisã yão Sɑ̃ɑrun Woodɑ 25

Tem wɛ̃rɑsiɑbu

1-2 Yinni Gusunɔ u kɑ Mɔwisi gɑri kuɑ guu te bɑ mɔ̀ Sinɑin wɔllɔ u nɛɛ, bɛɛ Isirelibɑ ì n duɑ tem mɛ sɔɔ, mɛ kon bɛɛ wɛ̃ mi, i ko i dewɑ bɛɛn gbeɑn tem mu wɛ̃rɑ nɛn sɔ̃. 3 Wɔ̃ɔ nɔɔbɑ tiɑ sɔɔrɑ i ko i bɛɛn gbeɑ duure kpɑ i bɛɛn resɛm gbɑɑnu sɔmɛ i nin dɑ̃nu kɔni. Kpɑ i yen mɑrum sɔri. 4 Adɑmɑ wɔ̃ɔ nɔɔbɑ yiruse, yɑ ko n sɑ̃ɑwɑ wɔ̃ɔ wɛ̃rɑruguu Yinni Gusunɔn sɔ̃. Bɛɛn gbenu nu koo wɛ̃rɑwɑ mɑm mɑm. I ku rɑ nu dĩɑnu duure, i ǹ ko i mɑɑ bɛɛn resɛm kɔni. 5 Bɑɑ dĩɑ ni nu wɔrumɑ sɑnɑm mɛ i gɛ̃ɛmɔ mɑ nu kpiɑ kɑ tii, i ǹ nu gɛ̃ɛmɔ. I ǹ mɑɑ resɛm sɔrimɔ ye yɑ kɑ tii mɑrɑ. Domi bɛɛn gbeɑ yɑ koo wɛ̃rɑwɑ mɑm mɑm wɔ̃ɔ ge sɔɔ. 6 Adɑmɑ wɔ̃ɔ wɛ̃rɑruguu ge sɔɔ, ye yɑ kpiɑ kɑ tii, yerɑ i ko i di bɛɛ kɑ bɛɛn sɔm kowobu kɑ bɛɛn yobu kɑ sere mɑɑ sɔɔ be bɑ wɑ̃ɑ bɛɛn suunu sɔɔ 7 kɑ bɛɛn yɑɑ sɑbenu kɑ gbeeku yɛɛ. Ye tem mɛ, mu koo kpi yerɑ i ko i di.

Yɑkiɑbun wɔ̃ɔ

8 I ko i wɔ̃ɔ nɔɔbɑ yirun subɑ nɔɔbɑ yiru deriwɑ yu doonɑ. Ye kpuro yɑ sɑ̃ɑwɑ mi, wɔ̃ɔ weerɑɑkuru tiɑ sɑri. 9 Yen wɔ̃ɔ dɑ̃ɑkun suru nɔɔbɑ yirusen sɔ̃ɔ wɔkuru, tɔ̃ɔ te bɑ torɑrun yɑ̃kuru kuɑ mi, i ko i kɔbi wurɑwɑ kɑ kuuki tem mɛ kpuro sɔɔ. 10 Wɔ̃ɔ weerɑɑkurusen wɔ̃ɔ ge, gɑ ko n sɑ̃ɑwɑ nɛnɛm nɛ, Yinni Gusunɔn sɔ̃. Kpɑ i kpɑrɑ mɑ bɑɑwure u tii mɔ. Wɔ̃ɔ ge sɔɔ, bɑ koo gbee te goo u rɑɑ dɔrɑ ǹ kun mɛ te bɑ nùn mwɑɑri wesiɑwɑ tu ko wigiru. Wi u rɑɑ mɑɑ yoru dimɔ, u koo yɑkiɑrɑ u wurɑ win yɛnuɔ. 11 Nge mɛyɑ i ko n dɑ wɔ̃ɔ weerɑɑkuru bɑɑteren yɑkiɑbun tɔ̃ɔ bɑkɑru di. I ko i wɛ̃rɑwɑ wɔ̃ɔ ge sɔɔ. I ǹ dĩɑnu gɑnu duurumɔ. I ǹ mɑɑ dĩɑnu gɑnu gɛ̃ɛmɔ ni nu kɑ tii kpiɑ. Mɛyɑ i ǹ mɑɑ resɛm sɔrimɔ ye yɑ mɑrɑ resɛm gbɑɑrɔ te bɑ ǹ sɔnwɑ. 12 Domi nuku dobun wɔ̃ɔwɑ ge i ko i wunɑ nɛnɛm nɛ Yinni Gusunɔn sɔ̃. Adɑmɑ bɛɛn gbeɑn dĩɑnɑ i ko i di.

13 Wɔ̃ɔ ge sɔɔ, bɑɑwure u koo win tem mwɑwɑ mɛ bɑ rɑɑ nùn mwɑɑri. 14 Ì n tem dɔrɑmɔ, ǹ kun mɛ ì n dwemɔ, bɛɛn goo u ku rɑɑ win winsim nɔni wɔ̃ke. 15 Wi u kĩ u win gberu dɔrɑ, u koo ginɑ lɑsɑbu kowɑ u wɑ mɛ̀n nɔɔ tɑ koo dĩɑnu mɑ sere wɔ̃ɔ weerɑɑku te, tu kɑ yibu tè sɔɔ bɑ rɑ yɑkiɑbun tɔ̃ɔ bɑkɑru ko tè sɔɔ yɛ̃ro u koo tu wesiɑ. 16 Nge mɛ wɔ̃su su dɑbiru nɛ, nge mɛyɑ gbee ten gobi yi ko n kpɑ̃ɑru nɛ. Wɔ̃sun sukum mɛ mu tie mù kun dɑbi sere wɔ̃ɔ weerɑɑku te, tu kɑ yibu, ten gobi yi ǹ ko yi n kpɑ̃. Domi ye bɑ koo gɛ̃ gbee te sɔɔ, yerɑ u dɔrɑmɔ. 17 Bɛɛn goo u ku rɑɑ win winsim nɔni wɔ̃ke. I ko i mɑn nɑsiɑwɑ domi nɛnɑ nɑ sɑ̃ɑ Gusunɔ bɛɛn Yinni. 18 I nɛn woodɑbɑ mɛm nɔɔwɔ kpɑ i sĩ ye sɔɔ. Sɑɑ ye sɔɔrɑ i ko i sinɑ tem mɛ sɔɔ kɑ bɔri yɛndu. 19 Tem mɛ, mu koo dĩɑnu ko ni nu koo bɛɛ turi kpɑ i n kɑ wɑ̃ɑ bɔri yɛndu sɔɔ.

20 Sɔrɔkudo i ko i tii bikiɑ i nɛɛ, mbɑ i ko i di wɔ̃ɔ nɔɔbɑ yiruse te. Domi i ǹ wɔ̃ɔ ge sɔɔ dĩɑnu duurumɔ, i ǹ mɑɑ gɛ̃ɛmɔ. 21 Kon bɛɛ domɑru kuɑ wɔ̃ɔ nɔɔbɑ tiɑse kpɑ bɛɛn gbeɑ yu wɔ̃ɔ itɑn dĩɑnu mɑ. 22 Wɔ̃ɔ nɔɔbɑ itɑse sɔɔ, i ko i dĩɑnu duure kpɑ bɛɛn dĩɑ gurunu nu n tie sere i kɑ wɔ̃ɔ nɔɔbɑ nnɛsen dĩɑnu gɛ̃.

Tem kɑ diɑn yɑkiɑbu

23 Goo kun tɔnu tem dɔremɔ kpɑ yɛ̃ro u n mu mɔ sere kɑ bɑɑdommɑɔ, domi nɛ, Yinni Gusunɔwɑ nɑ tem mɔ, i mɑɑ wɑ̃ɑwɑ nɛn mi nge sɔbu. 24 Yen sɔ̃nɑ mi i sinɑ kpuro, i ko i tem yɑkiɑbun woodɑ ye mɛm nɔɔwɑwɑ.

25 Bɛɛ sɔɔ, goo ù n kuɑ sɑ̃ɑro, mɑ u win tem sukum dɔrɑ, win dusi goo ù n gobi mɔ, u koo kpĩ u mu yɑkiɑ. 26 Yɛ̃ro ù kun mɑɑ dusi goo mɔ wi u koo mu yɑkiɑ, win tii u koo kookɑri kowɑ u kɑ mu yɑkiɑ. 27 U koo wɔ̃su gɑriwɑ si su tie wɔ̃ɔ weerɑɑku te, tu kɑ sere yibu kpɑ u si kpuron gobi kɔsiɑ kpɑ tem mɛ, mu ko wigim. 28 Ù kun gobi wɑ u kɑ mu yɑkiɑ, u koo mu wi u tem mɛ dwɑ deriɑ sere yɑkiɑbun tɔ̃ɔ bɑkɑru tu kɑ turi. Yen biru u koo kpĩ u wurɑ tem mɛ sɔɔ.

29 Yinni Gusunɔ u nɛɛ, goo ù n win diru dɔrɑ te tɑ wɑ̃ɑ wuu gbɑ̃rɑruguu sɔɔ, wɔ̃ɔ tiɑ u mɔ u kɑ tu yɑkiɑ. 30 Yɛ̃ro ù n kpɑnɑ u dii te yɑkiɑ wɔ̃ɔ tiɑ yen bɑɑ sɔɔ, tɑ koo kowɑ wi u tu dwɑgiru sere kɑ bɑɑdommɑɔ. U ǹ mɑɑ tu wesiɑmɔ bɑɑ yɑkiɑbun tɔ̃ɔ bɑkɑru tɑ̀ n tunumɑ. 31 Adɑmɑ dii te tɑ wɑ̃ɑ wuu ge gɑ ǹ gbɑ̃rɑru mɔ sɔɔ, bɑ koo tu yɑkiɑwɑ nge mɛ bɑ rɑ tem yɑkie. Bɑɑ ǹ n mɛren nɑ, wi u rɑɑ dii te mɔ, bɑ koo nùn tu wesiɑwɑ yɑkiɑbun tɔ̃ɔ bɑkɑru sɔɔ.

32 Adɑmɑ Lefibɑn wusu kɑ ben diɑ, bɑ ko n dɑ kpĩ bu ye yɑkie sɑɑ kpuro. 33 Wi u Lefibɑn goon diru dwɑ, yɑkiɑbun tɔ̃ɔ bɑkɑru tɑ̀ n tunumɑ, u koo yɑriwɑ dii ten min di kɑ wuu gen min di. Lefibɑn diɑ yɑ sɑ̃ɑwɑ ben tiiginu Isirelibɑginun suunu sɔɔ. 34 Gbee ni nu mɑɑ kɑ ben wusu sikerenɛ, ben goo kun kpɛ̃ u nu dɔrɑ. Domi berɑ bɑ nu mɔ sere kɑ bɑɑdommɑɔ.

Bɔkurɑbun woodɑ

35 Yinni Gusunɔ u nɛɛ, wunɛn Isirelisi ù n sɑ̃ɑru duurɑ, mɑ u ǹ kpɛ̃ u tii nɔɔri, ɑ de ɑ nùn somi u kɑ win wɑ̃ɑru di. Nge mɛyɑ kɑɑ mɑɑ sɔɔ kuɑ kpɑ u wɑ u sinɑ tem mɛ sɔɔ wunɛn bɔkuɔ. 36 À n nùn gɑ̃ɑnu bɔkurɑ, ɑ ku nùn ɑre kɑsusi. A de ɑ nɛ Gusunɔ wunɛn Yinni nɑsiɑ, kpɑ wunɛn winsim u wɑ u n wɑ̃ɑ wunɛn bɔkuɔ. 37 À n nùn gobi bɔkurɑ ǹ kun mɛ dĩɑnu, ɑ ku nim doke. 38 Nɛ Gusunɔ bɛɛn Yinniwɑ nɑ ye geruɑ. Nɛnɑ nɑ bɛɛ yɑrɑ sɑɑ Egibitin di n kɑ bɛɛ Kɑnɑnin tem wɛ̃ kpɑ nɑ n sɑ̃ɑ bɛɛn Yinni.

Yorun woodɑ

39 Yinni Gusunɔ u mɑɑ nɛɛ, wunɛn Isirelisi ù n sɑ̃ɑru duurɑ mɑ u nun tii dɔre, ɑ ku nùn yoo sɔmɑ koosiɑ. 40 U ko n sɑ̃ɑwɑ wunɛn sɔm kowo, u n wɑ̃ɑ wunɛn yɛnuɔ sere yɑkiɑbun tɔ̃ɔ bɑkɑru tu kɑ nɑ. 41 Yɑkiɑbun tɔ̃ɔ bɑkɑ te, tɑ̀ n tunumɑ, kɑɑ nùn yɑkiɑwɑ wi kɑ win bibu kpɑ u wurɑ u win yɛnugibu deemɑ, u win sikɑdobɑn gbeɑ tubi di. 42 Domi bɑ sɑ̃ɑwɑ nɛn yobu be nɑ yɑrɑmɑ Egibitin di. Bɑ ǹ koo bu dɔrɑ nge mɛ bɑ rɑ yobu dɔre. 43 A ku nùn dɑm dɔre. A sɔ̃ɔsio mɑ ɑ nɛ Gusunɔ wunɛn Yinni nɑsie.

44 À n yobu kĩ, bwese tuku ni nu kɑ nun sikerenɛwɑ kɑɑ yoru mwɛɛri bɑ n sɑ̃ɑ wunɛgibu. 45 Kɑɑ kpĩ ɑ sɔbun bibu dwe be bɑ wɑ̃ɑ wunɛn yɛnuɔ kɑ sere be bɑ mɑrɑ bɛɛn tem sɔɔ. À n bu dwɑ, bɑ ko n sɑ̃ɑwɑ wunɛgibu. 46 Wunɛn bibun bweseru tɑ koo kpĩ tu bu tubi di sere kɑ bɑɑdommɑɔ. Adɑmɑ goo u ku rɑɑ win Isirelisi dɑm dɔre.

47 Sɔɔ goo ù n wɑ̃ɑ wunɛn yɛnuɔ, mɑ u kuɑ gobigii, mɑ Isireli goo u sɑ̃ɑru duurɑ, mɑ u tii sɔɔ wi dɔre, ǹ kun mɛ sɔɔ win dusi goo, 48 Isireli wi, u koo kpĩ u tii yɑkiɑ ǹ kun mɛ win dusi goo u nùn yɑkiɑ 49 ǹ kun mɛ win bɑɑn mɔɔ ǹ kun mɛ win bɑɑn wɔnɔ ǹ kun mɛ ben bii goo ǹ kun mɛ win dusi goo gesi. Wi u mɑɑ tii dɔrɑ mi, ù n dɑm wɑ u kɑ tii yɑkiɑ, u koo kpĩ u tii yɑkiɑ. 50 Bɑ koo wɔ̃sun geeru gɑriwɑ wi kɑ wi u nùn dwɑ sɑɑ mìn di u tii dɔrɑ sere yɑkiɑbun tɔ̃ɔ bɑkɑru tu kɑ turi. Win yɑkiɑbun gobin geeru tɑ ko n sɑ̃ɑwɑ nge gobi yi bɑ koo sɔm kowo kɔsiɑ wɔ̃ɔ si sɔɔ. 51 Wɔ̃su sù n mɑɑ tie su kpɑ̃ yɑkiɑbun tɔ̃ɔ bɑkɑru tu sere turi, u koo win yɑkiɑbun gobi kɔsiɑwɑ nge mɛ wɔ̃ɔ sin geerɑ nɛ. 52 Wɔ̃su sù kun mɑɑ dɑbi sere yɑkiɑbun tɔ̃ɔ bɑkɑru tu kɑ turi, u koo win yɑkiɑbun gobi kɔsiɑwɑ nge mɛ wɔ̃ɔ sin geerɑ nɛ. 53 Ù n wɑ̃ɑ win yinnin mi, yinni wi, u koo nùn kowɑ nge mɛ bɑ rɑ sɔm kowo kue. U ǹ koo nùn dɑm dɔre. 54 Ù kun kpĩɑ u tii yɑkie kɑ swɑɑ yen gɑɑ, u koo yɑkiɑrɑ wi kɑ win bibu yɑkiɑbun tɔ̃ɔ bɑkɑru sɔɔ.

Nɛnɑ Gusunɔ bɛɛn Yinni

55 Isirelibɑ bɑ sɑ̃ɑwɑ nɛ, Yinni Gusunɔn yobu be nɑ yɑrɑ Egibitin di. Nɛ Gusunɔ nɑ sɑ̃ɑwɑ ben Yinni.