13
1 Yen tɔ̃ɔ te, bwiɑ gɑɑ yɑ koo yɑri yu kɑ Dɑfidin yɛnugibu kɑ Yerusɑlɛmugibun torɑnu wɔkɑ.
Yinni Gusunɔ u koo
win sɔmɔ weesugibun
bwɑ̃ɑrokunu kɔsuku
2 Yen tɔ̃ɔ te, nɛ, Gusunɔ wɔllu kɑ tem Yinni kon bũnun yĩsinu kpeerɑsiɑ tem mɛ sɔɔ kpɑ bu ku rɑɑ mɑɑ nu yɑɑyɑ. Kon mɑɑ nɛn sɔmɔ weesugii be bɑ bũu sɑ̃ɑrun kĩru mɔ mi wunɑ.
3 Goo ù n gɑri weesugii mɔ̀, win tundo kɑ win mɛro bɑ koo nùn sɔ̃wɑ bu nɛɛ, kɑɑ gbi. Domi ɑ weesu mɔ̀wɑ kɑ Yinni Gusunɔn yĩsiru. Kpɑ tundo wi, kɑ mɛro wi, bu nùn tɑkobi sɔku bu go sɑnɑm mɛ u gɑri yi mɔ̀.
4 Yen tɔ̃ɔ te, Gusunɔn sɔmɔbu bɑ koo sekuru wɑ ben kɑ̃si weesuginun sɔ̃. Bɑ̀ n gɑri mɔ̀, bɑ ǹ mɑɑ yɑbe sɑnsuginu sebumɔ bu kɑ tɔmbu nɔni wɔ̃ke.
5 Ben bɑɑwure u koo nɛɛwɑ, u ǹ sɑ̃ɑ Gusunɔn sɔmɔ. Wi, gbɑɑ wukowɑ. Domi bɑ nùn dwɑwɑ sɑɑ win piiburun di.
6 Bɑ̀ n nùn bikiɑ bɑ nɛɛ, mɑnɑ u sere mɛɛrɑ yeni wɑ ye yɑ wɑ̃ɑ win nɔmɑɔ, kpɑ u wisi u nɛɛ, u ye wɑwɑ win bɔrɔ kĩnɑsibun yɛnuɔ.
Bɑ koo giɑ mɑ
Gusunɔwɑ u sɑ̃ɑ Yinni
7 Gusunɔ, wɔllu kɑ tem Yinni u nɛɛ,
tɑkobi, ɑ nɛn kpɑro wi nɑ kuɑ nɛn bɔ̃ɔ wɔrio.
A nùn goowo kpɑ yɑ̃ɑnu nu yɑrinɑ,
kpɑ n ni nu kun dɑm mɔ wɔri.
8 U mɑɑ nɛɛ, bɑ̀ n tem mɛn tɔmbu bɔnu kuɑ subɑ itɑ, yen subɑ yiru yɑ koo gbi kpɑ sube tee teni tu tiɑrɑ.
9 Kon sube tee te dɔ̃ɔ doke kpɑ n tu sɔwɑ nge mɛ bɑ rɑ sii geesu sɔwe. Kon tu sɔwɑwɑ nge mɛ bɑ rɑ wurɑ sɔwe. Tɑ koo nɛn yĩsiru soku kpɑ n tu wurɑri. Kon tu sɔ̃ n nɛɛ, tɑ sɑ̃ɑwɑ nɛn tɔmbu. Kpɑ ten tii tu mɑɑ nɛɛ, nɑ sɑ̃ɑwɑ Gusunɔ ten Yinni.