19
Pol nde dare da Efesi
1 Tɛm ntɛ Apɔlɔs ɛnayi Kɔrɛnt mɔ, kɔ Pol nwɛ ɛnacepər sədare sa kəroŋ mɔ, ontor dare da Efesi. K’ɛmbəp di acɛpsɛ a Wəbɛ Yesu darəŋ alɔma.
2 K’eyif ŋa: «Nənasɔtɔ Amera Ŋecempi ŋa Kanu kəyɛfɛ ntɛ nənayɔnɛ alaŋ Yesu mɔ ba?»
Kɔ ŋaluksɛ Pol: «Səntane fɛ yati teta Amera Ŋecempi.»
3 Kɔ Pol eyif ŋa sɔ: «Kɔ kəgbət dəromun kəre kɔ nəsɔtɔ-ɛ?»
Kɔ ŋaluksɛ Pol: «Kəgbət ka Saŋ.»
4 Kɔ Pol oloku: «Kəgbət dəromun ka Saŋ, kəsəkpər mera yati kənayi teta Kanu. Mba Saŋ oŋc-loku afum a ŋalaŋ wəkɔ endeder nkɔn tadarəŋ mɔ, itɔ tatɔkɔ Yesu.»
5 Ntɛ ŋane moloku mamɔkɔ mɔ kɔ ŋasɔtɔ kəgbət dəromun tewe ta Wəbɛ Yesu.
6 Kɔ Pol endeŋər ŋa waca, kɔ Amera Ŋecempi ŋender ŋa, kɔ ŋayɛfɛ kəloku cusu ncɛ ŋantɔcərɛ mɔ, ŋac-dəŋk sɔ moloku mɔtɔt mmɛ Kanu kənasom ŋa kədəŋk mɔ.
7 Arkun akakɔ ŋaŋc-bəp wəco kɔ mɛrəŋ.
8 Kɔ Pol ɛmbɛrɛ kəlɔ ka dəkətola da aSuyif, pəc-lok-lokɛ di kəbaŋsɛ disrɛ haŋ yof maas, pəc-gbɛkəlɛnɛ, pəc-sɛp kəsɔŋɛ afum kəcərɛ mes ma dɛbɛ da Kanu.
9 Mba ntɛ ayenki səbomp alɔma ŋaŋc-fati kəlaŋ mɔ, ŋac-fani dɔpɔ da Wəbɛ nnɔ kənay kəyi mɔ. Kɔ Pol ɔmbɔlɛ ŋa, k’ ɛlɛkɛnɛ acɛpsɛ a Yesu darəŋ alɔma, kɔ ŋawɛnnɛ kəsək, kɔ ŋaŋlok-lokərɛnɛ dɔsɔk o dɔsɔk nde dəkətəksɛ da Tirano.
10 Tatɔkɔ tɛnawon meren mɛrəŋ, kɔ tɔsɔŋɛ aSuyif kɔ aKresi aŋɛ ŋanayi atɔf ŋa Asi mɔ kəne toloku ta Wəbɛ.
Awut a Sefa
11 Kanu kəŋc-sɔŋɛ waca wa Pol kəyɔ mes mɛwɛy-wɛy mmɛ mɛnacuca kənəŋk mɔ.
12 Tɛnasɔŋɛ pac-bəcəsɛ acuy cəloto, kɔ pəyɔnɛ fɛ ti-ɛ kəpol nkɛ kəŋgbuŋɛnɛ Pol mɔ, kɔ ayɔ ti-ɛ, docu doŋc-wur wəkayi, kɔ yɔŋk yɛlɛc yoc-wur sɔ wəkayi dəris.
13 Kɔ aSuyif alɔma ŋaŋkɔs-kɔs mofo mɛlarəm, kɔ ŋatubucnɛ Pol kəbɛləs ka yɔŋk yɛlɛc nnɔ acuy ŋayi mɔ, ŋac-loku: «Ilok’ əm: Məwur wəcuy wəkawɛ tewe ta Yesu wəkɔ Pol ɛŋcam mɔ.»
14 Wəloŋnɛ wəpɔŋ wəka aSuyif wəlɔma ɛnayi pac-we kɔ Sefa. Awut ɔn atɛmp camət-mɛrəŋ ŋa ŋaŋc-yɔ mɔyɔ mamɔkɔ.
15 Mba kɔ ŋawak kəbɛləs ŋɔŋk ŋɛlɛc-ɛ, ŋi ŋoloku ŋa: «Yesu, iŋcərɛ kɔ. K’iŋnɛpəl sɔ bel-bel fum nwɛ Pol ɔyɔnɛ mɔ, mba nəna, an’ɔ nəyɔnɛ-ɛ?»
16 Kɔ fum wəkɔ ŋɔŋk ŋɛlɛc ŋɛnayi mɔ ɛŋgbəpərnɛ ŋa kəyɛfərɛnɛ, k’ɛntam ŋa fəp k’ambopər-bopər atɛmp aŋɛ, kɔ ŋayɛksɛ fəp faŋan dis fos kɔ ŋasak kəlɔ.
17 ASuyif kɔ aKresi aka dare da Efesi ŋaŋcərɛ toloku tatɔkɔ, kɔ kənesɛ kəyi ŋa fəp, kɔ ŋaleləs oŋ tewe ta Wəbɛ Yesu.
18 Afum alarəm aŋɛ ŋanawosɛ kəlaŋ Yesu mɔ, ŋaŋc-der ŋaloku fɔr ya afum fəp kiriŋ pəlɛc mpɛ ŋaŋc-yɔ mɔ.
19 Kɔ afum akɔ ŋanayɔnɛ dure mɔ, ŋaŋc-kɛrɛ səbuk səŋan sa dure kɔ ŋaŋcɔf si fɔr ya afum fəp kiriŋ. Kəway ka səbuk sasɔkɔ kənabəp mɛŋcəmbəl ma gbeti wul wəco kəcamət (50.000).
20 Ti disrɛ kətam ka toloku ta Wəbɛ kəsam kɔ kəsɔtɔ fənɔntər.
Pəyama-yama dare da Efesi
21 Ntɛ teŋcepər mɔ kɔ Pol olompəsnɛ kəkɔ dare da Yerusalɛm pəc-cepərɛnɛ tɔf ya Masedon kɔ Akaya. K’oloku: «K’iŋkɔbɛrɛ Yerusalɛm-ɛ, mɛnɛ idekɔsɔ-mɔmən Rom.»
22 Kɔ Pol osom Masedon amar ɔn mɛrəŋ Timote kɔ Erasto, mba kɔ nkɔn Pol eyi mataka mɔlɔma atɔf ŋa Asi.
23 Tɛm tatɔkɔ tɔ pəyama-yama pɔpɔŋ pɛnayi Efesi teta dɔpɔ da kəlaŋ ka Wəbɛ Yesu.
24 Wəgbɛc wəlɔma ɛnayi di, pac-we kɔ Demeteri, pəc-tubucnɛ kəlompəs ka wɔlɔ wa tɛrəŋka mpɛ aŋc-we Artemi mɔ. Agbɛc a wɔlɔ wa gbeti wawɔkɔ ŋaŋc-sɔtɔnɛ wi daka dɛlarəm.
25 Kɔ Demeteri oloŋka agbɛc kɔ akɔ ŋaŋc-dinɛ yɛbəc yayɔkɔ mɔ, k’oloku ŋa: «Arkun! Nəŋcərɛ ti bel-bel a yɛbəc yayɛ y’ andinɛ.
26 Mba nənəŋk kɔ nəne a nnɔ Efesi kəbəp ka atɔf ŋa Asi Pol pampɛ ɛsɛp kəsɔŋɛ afum alarəm kəlaŋ haŋ pəc-kafəli ŋa mera kəloku a mɛrəŋka mmɛ waca wa fum wolompəs mɔ, bafɔ canu cɔ.
27 Moloku mamɔkɔ mɛntam kəsɔŋɛ yɛbəc yosu kəlɛcɛ. Tɔsɔŋɛ sɔ teta kəlɔ ka tɛrəŋka Artemi tɔyɔ sɔ abɔc. Afɔde sɔ pac-loku a Artemi tɛrəŋka a kanu kɔ, kanu kəran nkɛ afum fəp ŋaŋkor-koru nnɔ atɔf ŋa Asi, kɔ doru kɔr-kɔr mɔ.»
28 Ntɛ afum ŋane moloku mamɔkɔ mɔ, kɔ mɛtɛlɛ meŋcepərər ŋa, kɔ ŋayɛfɛ kəkulɛ-kulɛ: «Artemi kanu ka Efesi kəyɔnɛ kəpɔŋ!»
29 Kɔ pəyama-yama papɔkɔ posumpər dare fəp, kətəŋnɛ disrɛ kɔ afum ŋambəpsɛnɛ abaŋka ŋaŋan ŋɔpɔŋ. Kɔ ŋaliŋəs asol a Pol Kayus kɔ Aristarko, aŋɛ ŋanayɛfɛ Masedon mɔ, kɔ ŋaŋkekərɛ.
30 Pol ɛnafaŋ kəkɔ-mentərnɛ afum fɔr kiriŋ, mba acɛpsɛ a Wəbɛ darəŋ ŋanawosɛnɛ fɛ kɔ ti.
31 Abɛ alɔma a atɔf ŋa Asi, aŋɛ ŋanayɔnɛ anapa a Pol mɔ, ŋanasom afum nnɔ eyi mɔ ŋac-lɛtsɛnɛ kɔ a ta pəkɔ dəndo abaŋka ŋaŋan ŋɔpɔŋ de!
32 Kɔ pəyama-yama poŋcop afum dacɔ, aŋɛ ŋac-kul-kulɛnɛ ntɛ, akɔ ŋac-kul-kulɛnɛ tɔkɔ. Afum alarəm ŋa dacɔ ŋanacərɛ fɛ ntɛ o ntɛ anabəpsɛnɛnɛ mɔ.
33 Kənay kaŋkɔ dacɔ kɔ afum alɔma ŋalɔmər Alɛksandər, nwɛ aSuyif alɔma ŋanacɔŋəs kəkɔ-lok-loku fɔr ya afum kiriŋ mɔ. Kɔ Alɛksandər ɛfɛk kəca, pəfaŋ kəlok-loku pəyacnɛ.
34 Mba ntɛ ŋanadenɛpəl a Alɛksandər wəSuyif ɔyɔnɛ mɔ, kɔ fəp fəyɛfɛ kəkulɛ-kulɛ haŋ dec mɛrəŋ: «Artemi kanu ka Efesi kəyɔnɛ kəpɔŋ!»
35 Kɔ wəbɛ wəlɔma wəka di ɛntam kətorɛ-torɛ afum bəkəc pəc-loku: «Arkun a Efesi, an’ ɔtɔcərɛ a dare da Efesi dɔtɔmpər kəbum ka kəlɔ kəpɔŋ ka kanu kosu Artemi kɔ tɛrəŋka tɔn mpɛ pontor kəyɛfɛ dareŋc mɔ-ɛ?
36 Fum ɔfɔtam kəgbɛkəl tatɔkɔ, pəmar nəndɛ nəcaŋk ta nəbɛlkər kəyɔ ntɛ o ntɛ.
37 Ntɛ tɔsɔk mɔ, afum aŋɛ nəŋkɛrɛ mɔ ŋaləsər fɛ kəlɔ kosu kəpɔŋ, ŋalɔməs fɛ sɔ kanu kosu Artemi.
38 Kɔ Demeteri kɔ awɛŋc aŋa apaŋnɛ ɔn yɛbəc ŋayɔ kəbokɛnɛ teta fum-ɛ, dəkəboc kiti deyi kɔ aboc kiti ŋayi, dəndo pəmar ŋakɔ ŋabokɛnɛ!
39 Kɔ nəyɔ sɔ tobokɛnɛ tɔlɔma-ɛ, andekɔ-lompəs ti pəmɔ tɔkɔ sariyɛ səloku ti mɔ nde aboc kiti ŋaŋloŋkanɛ mɔ.
40 Nəkɛmbərnɛ, bawo antam kəboŋcɛ su kəsɔŋɛ pəyama-yama pampɛ kəyi, teta mes mamɛ meŋcepər dɛ mɔkɔ mɔ, bawo ali toloku səfɔtam kəsɔtɔ kəloku ntɛ tɔsɔŋɛ afum kəbəpsɛnɛ tantɛ mɔ.» Ntɛ wəbɛ elip kəloku tatɔkɔ mɔ, k’oloku nwɛ o nwɛ kəlukus nde ndɔrɔn.