20
Pol nde tɔf ya Macedon kɔ Kresi
1 Ntɛ pəyama-yama pɛsak mɔ, kɔ Pol ɛwenɛ acɛpsɛ a Wəbɛ darəŋ, k’ɛŋcəpəs ŋa bəkəc. Ntɛ elip kəlembərnɛ ŋa, k’ɔŋkɔ Masedon.
2 Ntɛ ɛŋcepər atɔf ŋaŋɔkɔ mɔ, k’ɛŋcəpəs alaŋ bəkəc dəmoloku mɛlarəm, k’ender atɔf ŋa Kresi.
3 K’eyi di yof maas. Tɛm ntɛ ɛnadefaŋ kəyekti abɛla kəkɔ ka atɔf ŋa Siri mɔ, k’asɔŋɛ kɔ kəcərɛ a aSuyif ŋantəŋnɛ kəyɔ kɔn pəlɛc, k’ɛŋcɛm-cɛmnɛ kəluksərnɛ sɔ dɔpɔ da atɔf ŋa Masedon.
4 Afum aŋɛ ŋanacəmbər kɔ mɔ, ŋanayɔnɛ: Sopateri wan ka Purus wəka Bere, Aristarko kɔ Sekondu aka Tɛsaloni, Kayus wəka Dɛrbɛ, Timote, Tikiko, kɔ Tirofimo aka atɔf ŋa Asi.
5 Afum akakɔ ŋanayi su kiriŋ kəkɔ, kɔ ŋaŋkɔ ŋakar su Torowas.
6 Kɔ səna ntɛ mataka ma kəsata ka cəcom cətɔyɔ lebin meŋcepər mɔ, kɔ səlɛk abil dare da Filipi. Mata kəcamət disrɛ kɔ səmbəp ŋa dare da Torowas, nde sənacepərɛnɛ mata camət-mɛrəŋ mɔ.
Kəcepər kələpəs ka Paul dare da Torowas
7 Tataka tɔcɔkɔ-cɔkɔ ta tataka toluksər, kɔ səloŋkanɛ kətepi ka kəcom. Pol nwɛ pənamar kəkɔ dɔckɔsɔk mɔ eyi kəlok-loku ŋa, k’ɔmbɔlsɛ moloku haŋ cɛk-cɛk.
8 Səlamp səlarəm sənayi dəndo dukulɔ da dareŋc dadɔkɔ sənaloŋkanɛ mɔ.
9 Wətɛmp wəlɔma pac-we kɔ Eyutik ɛnandɛ biŋkəli ba wundɛr kəroŋ tɛm tatɔkɔ Pol oŋc-lok-loku mɔ. Kɔ mere mɛŋgbəpərnɛ kɔ, k’ɛntɛmpɛnɛ kəyɛfɛ dukulɔ dakəroŋ da maas. Aŋkɔlɛk kɔ, tɛtəŋnɛ efi.
10 Kɔ Pol ontor, k’ɔŋkɔ pəsipnɛ kɔ, k’ɛlɛk kɔ dəwaca, k’oloku: «Ta pəyi nu yama-yama. Eyi wəyeŋ!»
11 Ntɛ Pol ɛmpɛ sɔ mɔ, k’entepi kəcom kəsɔm, k’oŋcop sɔ moloku mɔn haŋ dɔsɔka. Ntɛ elip mɔ, k’ɔŋkɔ.
12 K’aŋkɛrɛ wətɛmp wəkakɔ pəyi wəyeŋ, kɔ tɔyɔnɛ tɛcəpsɛ bəkəc tɔpɔŋ.
Marənt kəyɛfɛ Torowas haŋ Mileto
13 Səna, sənanuŋkɛnɛ kəlɛk abil kəkɔ dare da Asɔs nde Pol ɛnaloku a səndekɔ-lɛk kɔ mɔ, bawo kəroru k’ɛnafaŋ kəkɔ.
14 Ntɛ ɛnabəp su Asɔs mɔ, kɔ səlɛk kɔ kəkɔ ka Mitilɛn.
15 Ntɛ səyɛfɛ kəcali dəkəba dəndo mɔ, kɔ səmbɛrɛ dɔckɔsɔk Kiyo. Dɔckɔsɔk damɛrəŋ kɔ səŋgbuŋɛnɛ Samɔs, tataka ta maas kɔ səmbəp Mileto.
16 Pol ɛnafaŋ kəcepər dare da Efesi takəroŋ ta ɛŋcəmbərəs di-ɛ, ntɛ tɔŋsɔŋɛ ta owon sɔ Asi mɔ. Yerusalɛm ɛŋc-bɛlkər kəbəp, kɔ tɛntam kəyi-ɛ, a dɔsɔk da Pantɛkɔt dɛc-bəp.
17 Tɛm ntɛ ɛnayi Mileto mɔ, k’osom dare da Efesi kəkɔ-wenɛ kɔ abeki a kəlonkanɛ ka alaŋ aka di.
18 Ntɛ ŋander kəwe kɔn mɔ, kɔ Pol oloku ŋa ntɛ: «Nəŋcərɛ fəp fonu tɔkɔ isumpər nu mɔ, kəlɛk dɔsɔk dɔcɔkɔ-cɔkɔ ndɛ iŋcəmbər kəcək atɔf ŋa Asi mɔ.
19 Imbəcɛ Wəbɛ kətorɛ baŋca disrɛ, ic-bok, ic-tɔrɔ, bawo aSuyif ŋaŋc-faŋ kəy’ em pəlɛc.
20 Tes o tes tɛntam kətesɛ nu iloku nu ti fɔr ya afum kiriŋ kəkɔ haŋ dəwɔlɔ wonu disrɛ, ali tin imɛŋkər fɛ nu.
21 K’iŋgbiŋər sɔ aSuyif kɔ aKresi kəsəkpər bəkəc ŋakafəlɛ nnɔ Kanu kəyi mɔ, ŋagbɛkər Wəbɛ kosu Yesu kəlaŋ.
22 Ndɛkəl oŋ Amera ŋa Kanu ŋesekət’ im, Yerusalɛm iŋkɔ. Iŋcərɛ fɛ ntɛ tɔŋkɔ-bəp im di mɔ,
23 mɛnɛ Amera Ŋecempi ŋa Kanu ŋoŋlok’ im dare o dare ntɛ: A kətɔrɔ k’inder, pabɛr’ im dəbili.
24 Teta ina, mes ma ina darəŋ meyi, tɛfaŋ ta ina tɔyɔnɛ kəkɔtɛnɛ kəsom nkɛ asom im mɔ, mes mmɛ Wəbɛ Yesu olok’ im kəyɔ mɔ fəp m’ ifaŋ kəyɔ, ntɛ tɔyɔnɛ kəmentər sede sa toloku tɔtɔt kɔ kəmar ka Kanu mɔ.
25 Ndɛkəl oŋ intas, iŋcərɛ a nəfɔsɔ-nəŋk im, nəna fəp aŋɛ inacepər kəcam dɛbɛ da Kanu mɔ.
26 Ilip kəloku nu moloku fəp mmɛ Kanu kənasom im kəloku nu teta kəyac konu mɔ. Kɔ nəntɔyɔ oŋ tɔkɔ inatəks’ on mɔ, te mi teyi fɛ sɔ ti,
27 bawo iloku nu mɛfaŋ ma Kanu fəp, ali tin imɛŋkər fɛ nu.
28 Nəkɛmərnɛ nəna sərka kəbəp ka alaŋ aŋɛ ŋayi pəmɔ yɔcɔl nyɛ Amera Ŋecempi ŋa Kanu ŋɔsɔŋ nu kəkɛk mɔ. Nəkɛmbərnɛ kəloŋkanɛ ka alaŋ a Kanu, mecir mɔn yati mɔsɔtɔnɛ ŋa.
29 Iŋcərɛ a k’indekɔt-ɛ, afum alɛc ŋandetɔrəs kəloŋkanɛ konu pəmɔ calma cəwɛy-wɛy ncɛ cəmbɛrɛ cəntɔdesak yɔcɔl mɔ.
30 K’iŋcərɛ a alɔma nəna dacɔ yati ŋandeyɛfɛ kəloku yem, ntɛ tɔŋsɔŋɛ acɛpsɛ alaŋ ŋacəmɛ ŋa darəŋ mɔ.
31 Nəde nəkɛmərnɛ, ta nəpəler a meren mmɛ maas pibi kɔ daŋ isak fɛ kəlok’ un dəmɛŋcər a nəkɛmbərnɛ!
32 Ndɛkəl oŋ isɔŋ nu Kanu kɔ toloku ta kəŋaŋnɛ kɔn. Toloku tatɔkɔ tɛntam kəcəpəs’ un bəkəc kɔ kəsɔŋ on kɛ, nəna aŋɛ ŋayɔnɛ afum ɔn mɔ.
33 Inafaŋ fɛ pəsam, inafaŋ fɛ kɛma, inafaŋ fɛ yamos ya fum.
34 Nəna yati nəŋcərɛ a waca wem wawɛ w’ imbəcɛ kətɛn ka yeri yem kɔ ya afum aŋɛ iŋsolɛ mɔ.
35 Imentər nu a kɔ məŋbəc tatɔkɔ-ɛ, mɛnɛ nəmar atɔyɔ fənɔntər. Məc-cɛm-cɛmnɛ moloku ma Wəbɛ Yesu, nkɔn nwɛ ɛnaloku: ‹Kəpocɛ kəŋcepər kəsɔtɔ.› »
36 Ntɛ Pol elip kəloku moloku mamɔkɔ mɔ, k’ɛŋcəp suwu kətola Kanu kɔ ŋa fəp faŋan.
37 Afum fəp kəbok disrɛ ŋanɛpsərnɛ Pol dəkilim ŋac-cup kɔ,
38 nɔnɔfɔr dɛnanaŋkanɛ kəyi ŋa ntɛ Pol ɛnaloku a ŋafɔsɔ-nəŋk kɔ mɔ. Ntɛ telip mɔ, kɔ ŋaŋcəmbər kɔ nde dəkətənta.