26
Pol kəyacnɛ kɔn nnɔ Akripa eyi mɔ
1 Kɔ Akripa oloku Pol: «Awos’ am kəloku-loku tetam.»
Kɔ Pol ondot kəca kəlɛk moloku kəyacnɛ.
2 «Pəmbɔt im, Wəbɛ Akripa, kənəŋknɛ mɔkɔ ideyacnɛ nnɔ məyi mɔ mes mmɛ aSuyif alɔma ŋamboŋc em mɔ.
3 Məŋcərɛ bel-bel mes mokur aŋa ma aSuyif kɔ kəgbɛkəlɛnɛ ka mi. Ilɛtsɛn’ am məcəŋkəl im bel-bel.
4 ASuyif fəp ŋaŋcərɛ ntɛ tɛnayɔnɛ teyi tem kəyɛfɛ dowut dem mɔ, dəkəcop ntɛ inayi afum em dacɔ Yerusalɛm mɔ.
5 Ŋaŋcər’ em kəyɛfɛ ntɛ pənawon mɔ, ŋantam sɔ kəboŋc ti, bawo fɔr yaŋan yati ŋanatəŋnɛ mes kɔ mɔyɔ ma doru dem fəp, a cəFarisi c’ inayi, kəgba ka afum akɔ ŋananaŋkanɛ kəyeŋk mes dinɛ dosu mɔ.
6 Mɔkɔ ayi kəkit’ im, bawo iŋgbɛkər amera temer ntɛ Kanu kənasɔŋ atem asu mɔ.
7 Cusuŋka cosu ncɛ wəco kɔ mɛrəŋ cəŋsali tɛm fəp, daŋ kɔ pibi, ŋayɔ amera kəsɔtɔ ka kəlɛkɛ temer kaŋkɔ. Wəbɛ, teta kəgbɛkər amera kaŋkɔ kɔ aSuyif ŋamboŋc em mes.
8 Teta ake tɔ nəntɔfaŋɛ kəlaŋ a Kanu kəntam kəyekti fum defi disrɛ-ɛ?
9 Ina wəkawɛ yati, inacɛm-cɛmnɛ kəsiməs kɔ tewe ta Yesu wəNasarɛt səpɔ fəp.
10 It’ ɛnayɔ Yerusalɛm, ina wəkawɛ yati inabɛr afum acempi alarəm dəbili kətam disrɛ nkɛ abɛ a aloŋnɛ ŋanasɔŋ im mɔ. Ntɛ ŋaŋc-loku kədif kəŋan mɔ, ina sɔ iŋc-wosɛ ti.
11 Iŋc-kɔ dəwɔlɔ wa dəkətola Kanu da aSuyif fəp, ic-tɔrəs alaŋ, iŋc-gbəc ŋa kəlɔməs tewe ta Yesu. Pəc-tɛl’ em nnɔ ŋayi mɔ, iŋc-bɛləs ŋa haŋ sədare səcuru.»
Pol ɔlɔm kəkafəlɛ kɔn amera
12 «It’ ɛnasɔŋɛ dɔsɔk ndɛ indekɔ dare da Damas mɔ, kətam kɔ kəsom ka abɛ a aloŋnɛ apɔŋ.
13 Daŋ dɛc-faŋ kəbəp, Wəbɛ Akripa, k’inəŋk dəndo dɔpɔ pəwaŋkəra mpɛ pɛnakɛl im kɔ afum akɔ sənasol mɔ. Pəmot mpɛ pənayɛfɛ dəkɔm mɔ, poc-mot pɛtas dec.
14 Kɔ səntɛmpɛnɛ fəp fosu dəntɔf, k’ine dim doc-lok’ im cəArame: ‹Sol, Sol, ta ake tɔ məntɔrəs em-ɛ? Pəŋcuc’ am kəbər tɛfaŋ ta wəbɛ kam.›
15 K’iyif: ‹Wəbɛ, an’ ɔfɔ-ɛ?›
K’oluks’ em: ‹In’ ɔfɔ Yesu, nwɛ məna məyi kətɔrəs mɔ.
16 Mba məyɛfɛ məcəmɛ wɛcək wam kəroŋ. Məcərɛ tes ntɛ tɔsɔŋ’ em kəwurər əm mɔ: Iyɛk-yɛk əm kəyɔnɛ ka wəbəc kem, məyɔnɛ sɔ wətəŋnɛ mes mɔkɔ mənəŋk nnɔ iyi mɔ kɔ mɔkɔ indesɔ-wurər əm mɔ.
17 Indebaŋ əm afum am akaŋɛ dəwaca kɔ atɔyɔnɛ Suyif nda aŋɛ indesom əm mɔ,
18 kəkɔ-mepi ŋa fɔr. Ntɛ tɔŋsɔŋɛ ŋawur dəkəbump ŋatɛfərnɛ pəwaŋkəra, ŋawur kətam ka Sentani ŋayi kətam ka Kanu disrɛ mɔ. Kɔ ŋalaŋ im-ɛ, ŋandesɔtɔ kəŋaŋnɛ ka kiciya kəŋan, ŋasɔtɔ dəkəcəmɛ afum dacɔ aŋɛ ŋayɔnɛ aka Kanu mɔ.›»
Pol oloku yɛbəc yɔn
19 «Ti disrɛ, Wəbɛ Akripa, iyeŋkər fɛ kənəŋk nkɛ kəŋyɛfɛ dareŋc mɔ domp.
20 Mba inacam kərɛsna afum aka Damas kɔ aka Yerusalɛm, kəbəp ka afum aka atɔf ŋa Yude fəp haŋ atɔyɔnɛ Suyif. Iloku ŋa kəsəkpər bəkəc ŋakafəlɛ nnɔ Kanu kəyi mɔ, ŋayɔ mɔyɔ mɔtɔt mmɛ meŋmentər kəsəkpər kəŋan bəkəc mɔ.
21 Tantɛ tɛnasɔŋɛ kɔ aSuyif ŋasumpər im nde kəlɔ kəpɔŋ ka Kanu disrɛ, ŋac-faŋ kənim im.
22 Mba kəbum ka Kanu kəsɔŋ’ em kəyi doru haŋ mɔkɔ, iŋyɔnɛ kɔ wətəŋnɛ mes mmɛ nnɔ awut kɔ abeki ŋayi mɔ. Ifɔloku ntɛ o ntɛ sayibɛ-e kɔ Musa ŋanatɔ-loku mɔ,
23 kəcərɛ a Krist endekekərɛ pəcucanɛ, k’ɔyɔnɛ wəyɛfɛ wəcɔkɔ-cɔkɔ defi-ɛ, nkɔn endecam teta pəwaŋkəra nnɔ aSuyif kɔ atɔyɔnɛ Suyif ŋayi mɔ.»
Pol kəfaŋ kɔn kəsɔŋɛ Akripa kəlaŋ
24 Ntɛ Pol oŋc-loku moloku mɔn mɛyacnɛnɛ mɔ, kɔ Fɛstus oŋkulərnɛ: «Pol cəpɔ mətamnɛ fɛ? Kətəkəs kam kəlarəm kəsɔŋ’ am kətɔ-tamnɛ.»
25 Kɔ Pol oloku: «Daka o daka dɔyɔ f’em. Intamnɛ keŋ, Wəbɛ kem wəlel, Fɛstus! Moloku ma kaŋce kɔ molompɛnɛ m’ iyi kəloku.
26 Wəbɛ ɛŋcərɛ mamɔkɔ fəp, it’ iŋlokɛ mi kəlaŋ disrɛ fɔr yɔn kiriŋ. Iŋcərɛ a məŋcərɛ mes mamɔkɔ fəp, bawo mɛnacepər fɔr ya afum kiriŋ.
27 Məlaŋ sayibɛ-e ba, Wəbɛ Akripa? Iŋcərɛ bel-bel a məlaŋ ŋa!»
28 Kɔ Akripa oloku Pol: «Kɔ məsɛp kəbɛrɛnɛ pəpic-ɛ, məŋsɔŋ’ em kəyɔnɛ wəlaŋ Krist.»
29 Kɔ Pol oloku: «Tɔyɔnɛ fɔ ndɛkəl kɔ pəyɔnɛ fɛ ti-ɛ, tekiriŋ, intola kɔ Kanu kəwosɛ-ɛ, kəyɛfɛ məna haŋ akɔ ŋayi kəcəŋkəl im mɔkɔ mɔ, nəyi pəmɔ ina, mba ta gbekce yayɛ yeyi ti de.»
30 Awa wəbɛ ka atɔf, wəbɛ ka sədare səlarəm, Bernis, kəbəp ka afum akɔ ŋanandɛ kɔ ŋa mɔ fəp ŋayɛfɛ.
31 Ntɛ ŋaŋc-wur mɔ ŋac-lokɛnɛ: «Fum wəkawɛ ɔyɔ fɛ ntɛ o ntɛ pəmar padifɛ kɔ, kɔ pəyɔnɛ fɛ ti-ɛ pabɛr kɔ dəbili mɔ.»
32 Kɔ Akripa nkɔn oloku Fɛstus: «K’antam kəsak fum wəkawɛ pətɔ-yɔnɛ fɔ ewe wəbɛ wəka Rom-ɛ.»