7
Etiyɛn nde fɔr ya aboc kiti kiriŋ
1 Kɔ wəloŋnɛ wəpɔŋ wəka kəlɔ kəpɔŋ ka Kanu eyif Etiyɛn: «Itɔ teyi ba?»
2 Kɔ Etiyɛn oloku: «Awɛŋc im aŋa, Papa kem aŋa, Nəcəŋkəl im! Kanu nkɛ debeki dɔn doŋmot mɔ kənawurər Abraham, wətem kosu, ntɛ ɛnayi Mesopotami, ta ɛntadeder kəndɛ Haraŋ mɔ.
3 Kɔ Kanu kəloku Abraham: ‹‹Məwur atɔf ŋam, dəŋkom dam, məkɔ nde atɔf nŋɛ indekɔ-mentər’ əm mɔ.»
4 Kɔ Abraham owur atɔf ŋa Kaldi, k’ɔŋkɔ pəndɛ dare da Haraŋ. Dəndo, ntɛ defi da kas deŋcepər mɔ, kɔ Kanu kəŋcepərɛnɛ kɔ atɔf ŋaŋɛ nəndɛ oŋ ndɛkəl mɔ.
5 Kanu kənasɔŋ fɛ Abraham kɛ atɔf ŋaŋɛ, ali dəkəcəmbər kəcək, mba kənalɛkɛ kɔ temer kədesɔŋ kɔ ŋi kəbəp kəbənda ka dokom dɔn kɔ nkɔn eŋcepər-ɛ, mba tɛm tatɔkɔ ta ɛntayɔ wan-ɛ.
6 Kɔ Kanu kəloku Abraham ntɛ: «Kəbənda ka dokom dam kəndeyi decikəra atɔf ŋɔlɔma. Andekɔ-cəmbər ŋa di dacar, patɔrəs ŋa meren masar maŋkəlɛ (400).
7 Mba afum aka atɔf ŋaŋɔkɔ ŋandekɔ-cəmbər ŋa dacar mɔ, in’ endekɔ-bocər ŋa kiti. Kɔ teŋcepər-ɛ, ŋandewur ŋadekor-kor im nnɔ kəfo kaŋkɛ.»
8 Ntɛ tatɔkɔ teŋcepər mɔ, kɔ Kanu kəŋcaŋəs kiyi kɔn tetin kɔ Abraham, ti tɔyɔnɛ kəmɛŋkərnɛ ka kəkəŋc arkun. Ti disrɛ kɔ Abraham oŋkom Isiyaka, k’ɛŋkəŋc kɔ tataka tɔn ta camət-maas. Itɔ Isiyaka ɛnayɔ sɔ Yakuba, kɔ Yakuba ɔyɔ sɔ ti awut ɔn arkun wəco kɔ mɛrəŋ, aŋɛ ŋayɔnɛ cas ca cusuŋka wəco kɔ mɛrəŋ ca Yisrayel mɔ.
9 Ntɛ atem asu, awut a Isiyaka, ŋanayɔnɛ wɛŋc kəŋan Isifu kəraca mɔ, kɔ ŋaŋcaməs kɔ ntɛ tɔŋsɔŋɛ pakekərɛ kɔ Misira mɔ. Mba Kanu kənayi kɔ Isifu,
10 kənayac kɔ pəcuca fəp. Kanu kəŋc-mar Isifu, kəc-sɔŋ kɔ kəcərɛ kəkɔt nde Firawona wəbɛ ka Misira fɔr kiriŋ. Firawona ɛnasɔŋ Isifu dekiriŋ da Misira kɔ da kəlɔ kɔn disrɛ fəp mɔ.
11 Kɔ dor dɔpɔŋ dende deyi Misira fəp kɔ atɔf ŋa Kanahan. Pəcuca pɛnabɛk, atem asu ŋaŋc-sɔtɔ fɛ yeri.
12 Kɔ Yakuba ende pəne a cəgbay cəyi Misira, k’osom tɔcɔkɔ-cɔkɔ awut ɔn aŋɛ ŋantəŋnɛ atem asu mɔ.
13 Ta mɛrəŋ, kɔ Isifu owurərnɛ awɛŋc ɔn, ntɛ tɔ kɔ Firawona ɔsɔtɔ kəcərɛ oŋ akomɛnɛ a Isifu.
14 Kɔ Isifu osom awɛŋc ɔn a pakɛrɛ kɔ kas Yakuba, kəlɛkɛnɛ ka afum ɔn fəp, aŋɛ ŋaŋc-bəp afum wəco camət-mɛrəŋ kɔ kəcamət (75) mɔ.
15 Kɔ Yakuba ontor atɔf ŋa Misira. Difɔ ɛnafi, kɔ atem asu alɔma.
16 K’aŋkekərɛ cəbel cəŋan Səkɛm, k’aŋkɔ pawup nde kufu nkɛ Abraham ɛnawayɛ pəsam nnɔ kusuŋka ka Hamɔr kəyi mɔ.
17 Tɛm ntɛ pənamar a Kanu kəlas temer ntɛ kənalɛkɛ Abraham mɔ tɛnalɔtərnɛ. Kɔ dokombəra dɛmbɛk, kɔ afum ŋaŋla oŋ kəla dəm Misira,
18 haŋ kɔ wəbɛ wəlɔma ender pəndɛ dɛbɛ da atɔf ŋaŋɔkɔ nwɛ ɛnatɔ-cərɛ Isifu mɔ.
19 Wəbɛ wəkakɔ ender pəc-nɛmpəs, pəc-tɔrəs atem asu. K’ende pəsɔŋɛ ŋa kəsak cənaka cəŋan, ntɛ tɔŋsɔŋɛ ta akakɔ ŋantam kəyi doru mɔ.
20 Tɛm tatɔkɔ t’ anakom Musa, nwɛ ɛnabɔt Kanu kənəŋk mɔ. K’antɔmpər kɔ yof maas nde kəlɔ ka kas disrɛ,
21 mba ntɛ tɔyɔ tɛnatɔyi mɛnɛ kəgbal kɔn mɔ, kɔ wan ka wəbɛ ka Misira wəran efir kɔ, k’ɔŋkɔ pədusum pəyɔ kɔ wan.
22 Kəcərɛ kəkɔt fəp k’ aMisira k’ anadusumɛ Musa, k’ɔsɔtɔ fənɔntər dəmoloku kɔ dəmɔyɔ.
23 Ntɛ Musa ɔsɔtɔ meren wəco maŋkəlɛ (40) mɔ, k’ende pəcɛm-cɛmnɛ kəkɔ-nəŋk awɛŋc aŋa, afum a Yisrayel.
24 Kɔ Musa ɔŋkɔ pətəŋnɛ wɛŋc wəkin wəka Misira pac-cakəra, k’ɛŋcəmɛnɛ wɛŋc wəkakɔ aŋc-tɔrəs mɔ. K’oluksɛ ayɛk ŋa wɛŋc, k’endif wəMisira.
25 Kɔ Musa ɛŋcɛm-cɛmnɛ a awɛŋc aŋa ŋaŋtam kəc-gbɛkərɛ a Kanu kəntam kəbaŋ ŋa kɔ ŋaŋcəmɛ kɔ darəŋ-ɛ, mba ŋanacərɛ fɛ ti.
26 Dɔckɔsɔk, kɔ Musa ɔŋkɔ pəbəp aYisrayel mɛrəŋ ŋac-sutɛnɛ, k’ɛyac ŋa, k’olompəs ŋa dacɔ. K’eyif ŋa: ‹Ta ake tɔ nəŋsutnɛnɛ tantɛ-ɛ? Dɛwɛŋca dɔ nəyɔ!›
27 Mba wəkɔ ɛŋc-cakəra wɛŋc mɔ, ɛwɛn Musa pəc-yif: ‹An’ ɔsɔŋ’ əm kəyɔnɛ wəbɛ kɔ wəboc kiti səna dacɔ-ɛ?
28 Kədif’ im kɔ məfaŋ ba, pəmɔ tɔkɔ məndifsa wəMisira mɔ?›
29 Kɔ moloku mamɔkɔ mɔsɔŋɛ Musa kəyɛksɛ, k’ɔŋkɔ pəndɛ decikəra atɔf ŋa Madiyaŋ. Difɔ ɛnakom awut arkun mɛrəŋ.
30 Ntɛ meren wəco maŋkəlɛ meŋcepər (40) mɔ, kɔ mɛlɛkɛ mowurər Musa nde tɛgbɛrɛ ta tɔrɔ ta Turisnina dəmemer ma nɛŋc ndɛ dɛŋcmar dɛrəntəm mɔ.
31 Ntɛ Musa ɛnəŋk ti mɔ, kɔ pəŋciyanɛ kɔ kənəŋk ka tes tɛwɛy-wɛy tatɔkɔ, ntɛ ɔŋc-cɔŋnɛ kəkɔ-gbɛkərɛ mɔ, kɔ dim da Wəbɛ Kanu dender kɔ:
32 ‹In’ ɔfɔ, Kanu ka atem am: Kanu ka Abraham, ka Isiyaka kɔ Yakuba!› Musa pəc-yikcɛ, ta oŋwosɛ sɔ kəgbətnɛ di-ɛ.
33 Kɔ Wəbɛ oloku kɔ: ‹Məwurɛ cɔfta cam dəwɛcək, bawo kəfo kaŋkɔ məŋcəmɛ mɔ, kəfo kəcempi kɔ.
34 Inəŋk pəcuy pa afum em aŋɛ ŋayi Misira mɔ, ine kəgbis kəŋan: Intor ideyac ŋa. Ndɛkəl oŋ, məder isom əm Misira.›
35 Musa wəkakɔ ŋanace a ŋac-loku: «An’ ɔsɔŋ’ əm kəyɔnɛ wəbɛ kɔ wəboc kiti səna dacɔ-ɛ?» Nkɔn Kanu kənasom pəyɔnɛ wəbɛ kɔ wəyac, kəbɛrɛnɛ ka mɛlɛkɛ mmɛ mɛnawurər kɔ nde dɛrəntəm mɔ.
36 Nkɔn Musa ɛnawurɛnɛ aYisrayel Misira pəc-yɔ mes mɛwɛy-wɛy kɔ mɛgbɛkərɛ ma Kanu, nde kəba Kəyim kɔ nde dətɛgbɛrɛ, meren mmɛ wəco maŋkəlɛ (40) disrɛ.
37 Nkɔn Musa wəkakɔ yati ɛnaloku aYisrayel: ‹Kanu kəndekɛrɛ nu sayibɛ pəmɔ ina, nwɛ kəndeyɛk-yɛk awɛŋc anu dacɔ mɔ, pəsom kɔ nnɔ nəyi mɔ.›
38 Nkɔn Musa, ntɛ afum ŋanaloŋkanɛ nde dətɛgbɛrɛ mɔ, nkɔn ɛnayɔnɛ sɔ wəcepərɛnɛ moloku atem asu dacɔ kɔ mɛlɛkɛ mmɛ moŋc-lok-lokər kɔ nde dətɔrɔ ta Turisnina mɔ. K’ɔsɔtɔ moloku meyi wəyeŋ, ntɛ tɔŋsɔŋɛ səcərɛ mi mɔ.
39 Atem asu ŋanafaŋ fɛ kəcəŋkəl kɔ, kɔ ŋawɛnəs kɔ. Ŋanacɛm-cɛmnɛ dəbəkəc kəluksərnɛ Misira.
40 Kɔ atem asu ŋaloku Aruna, ‹Məlompəsɛ su mɛrəŋka, mmɛ mendesolɛ su mɔ, bawo Musa nwɛ owurɛnɛ su Misira mɔ, səŋcərɛ fɛ ntɛ tɔsɔtɔ kɔ mɔ.›
41 Mata mamɔkɔ, kɔ ŋalompəs tɛrəŋka ta tura, kɔ ŋaloŋnɛ nnɔ tɛrəŋka kiriŋ, kɔ ŋambocɛ kəsata yɛbəc ya waca waŋan.
42 Mba kɔ Kanu kəmbɛr ŋa kumunt, kɔ kəsakɛ ŋa kəkor-koru ca ya dareŋc. It’ aŋcic ti buk ba sayibɛ-e disrɛ:
‹Nəna aka Yisrayel,
meren wəco maŋkəlɛ (40) mmɛ nəŋcepərɛnɛ dətɛgbɛrɛ mɔ, in’ ɔ nəŋc-difɛ sɛm kəloŋnɛ disrɛ ba?
43 Nənakekərɛ abal ŋa tɛrəŋka ta Mɔlɔk
kɔ tɛrəŋka ta kɔs ka kanu konu Refaŋ.
Nənapat mɛrəŋka teta kəc-tontnɛnɛ ka mi fɔr kiriŋ!
Ti disrɛ kəkekərɛ nu k’ inder decikəra Babilɔŋ tadarəŋ.›
44 Atem asu ŋanayɔ dəndo dətɛgbɛrɛ abal ŋa sede nŋɛ anamɛŋk walakɛ wa masar nwɛ Kanu kənacicɛ Musa mɔ. Tatɔkɔ tɔ wəlok-lokər ka Musa ɛnaloku kɔ a pəyɔ, a ŋowurɛnɛ kɔ ŋɔkɔ ɛnanəŋk mɔ.
45 Ntɛ atem asu ŋasɔtɔ ŋi mɔ, kɔ ŋaŋkekərɛ nde atɔf nŋɛ Kanu kənabɛləs afum fɔr yaŋan kiriŋ mɔ. Yosuwe pəyɔnɛ ŋa wəkiriŋ. Abal ŋaŋɔkɔ ŋɛnayi di haŋ tɛm ta Dawuda.
46 Kɔ Dawuda ɔsɔtɔ kəmar ka Kanu, k’ontola sɔ kəsɔŋ kɔ kəfo nkɛ ɔŋkɔcəmbərɛ Kanu ka Yakuba dəkəyi mɔ.
47 Mba Sulemany ɛnader pəlɔ kəlɔ kaŋkɔ.
48 Mɛnɛ ntɛ Wəbɛ wəka dareŋc ɔntɔwosɛ kəyi paka disrɛ mpɛ kəca ka fum kəlompəs mɔ, pəmɔ tɔkɔ sayibɛ səloku ti mɔ:
49 ‹Wəbɛ oloku:
«Kɔm kəyɔnɛ dɔcɔm dem da dɛbɛ,
kɔ antɔf ŋɔyɔnɛ dəkəcəmbər dem wɛcək.
Ake kəlɔ kɔ nəyi kəcəmbər em-ɛ?
Kəfo kəre k’ inde ic-ŋesəm-ɛ?
50 Bafɔ kəca kem kəlompəs mamɛ fəp ba?»›
51 Nəna afum ataŋi ləŋəs, ayɔ bəkəc pəmɔ bilakoro! Haŋ mɔkɔ nəna nəyi kəwɛnəs Amera Ŋecempi ŋa Kanu pəmɔ atem anu!
52 Sayibɛ səre atem anu ŋanatɔ-tɔrəs-ɛ? Ŋanadif aŋɛ ŋananuŋkɛnɛ kəcam kəder ka Wəlompu nwɛ nəna nənasɔŋ oŋ a kɔ andif mɔ.
53 Nəna aŋɛ nənasɔtɔ sariyɛ sa Musa nsɛ mɛlɛkɛ ma Kanu mɛnaloku kɔ mɔ, mba nənakɔtɛnɛ fɛ si, nəmɛŋkərnɛ fɛ sɔ si.»
Kədif ka Etiyɛn
54 Ntɛ Etiyɛn oŋc-lok-loku mɔ, afum akɔ ŋaŋc-ne moloku mamɔkɔ mɔ, pənanaŋkanɛ kətɛlɛ ŋa haŋ ŋaŋc-ŋaŋərɛnɛ sek nnɔ eyi mɔ.
55 Mba Amera Ŋecempi ŋa Kanu ŋɛŋc-bəc Etiyɛn dəris. K’ɛŋgbətnɛ kɔm, k’ɛnəŋk nɔrɔ da debeki da Kanu, Yesu pəcəmɛ kəca kɔn kətɔt.
56 K’oloku: «Inəŋk kɔm kəgbitɛ, Wan ka fum pəcəmɛ kəca kətɔt ka Kanu!»
57 Kɔ afum aŋɛ ŋaŋkulɛ-kulɛ pəpɔŋ, kɔ ŋasuŋcnɛ ləŋəs, kɔ ŋawɛtnɛ fəp faŋan kəkɔ-bəp Etiyɛn.
58 Kɔ ŋambɛləs kɔ haŋ kɔ ŋawurɛnɛ kɔ dare, kɔ ŋaŋcacas kɔ masar. Atəŋnɛ aka ti ŋanaboc suma saŋan sa kəroŋ wətɛmp dəntɔf, nwɛ aŋc-we Sol mɔ.
59 Ntɛ ŋaŋc-cacas kɔ mɔ, kɔ Etiyɛn ontola pəc-loku: «Wəbɛ Yesu, məbaŋ amera ŋem.»
60 Ntɛ tɔ kɔ Etiyɛn ɛŋcəp suwu, k’oŋkulɛ-kulɛ: «Wəbɛ, ta məsarsər ŋa kiciya kaŋkɛ!» Ntɛ elip kəloku tatɔkɔ mɔ, k’eŋgbiŋ kifir.