Luda yã takada kↄ̃n Bokobaru yão DANIƐLI 4

Nɛbukanɛza nana'ona lí yã musu

1 Kí Nɛbukanɛza bé èe yã kɛ̀ oo gbɛ̃ pínginɛ, bùsu gbɛ̃ píngi kↄ̃n borii kɛ̀ kú anduna guu píngio à bè: Àgↄ̃ kuu kↄ̃n aafiao maamaa! 2 Má è à kɛ̀ maa mà dabuyã kↄ̃n yãbↄnsaɛ kɛ̀ Luda Musude kɛ̀mɛɛnↄ oare. 3 À dabuyãnↄ bíta fá! À yãbↄnsaɛnↄↄ pãsĩ. À kpata yãana vĩro, à kíblena égↄ̃ kuu gurↄ píngimɛ.

4 Mamↄma Nɛbukanɛza má kú nnamana guu ma bɛ, ma làakari kpáɛna, 5 ben ma nanaa ò ai vĩa ma kũ. Kɛ̀ má daɛna ma gádo musu yã kɛ̀ má è kↄ̃n laasuu kɛ̀ má lɛ̀o tò swɛ̃̀ kɛ̃̀magu. 6 Má dìɛ kɛ̀ wà mↄ́mɛ kↄ̃n Babilↄnu ↄ̃ndↄ̃rinↄ ń píngi aↄ̃ nanaa pì bↄkↄ̃tɛmɛ. 7 Kɛ̀ asidↄ̃rinↄ kↄ̃n dabudabukɛrinↄ kↄ̃n sↄsↄnɛyãdↄ̃rinↄ kↄ̃n màsokɛrinↄ mↄ̀, ben ma nanaa pì yã òńnɛ, aↄ̃ↄe fↄ̃ wà à bↄ̀kↄ̃tɛmɛro. 8 Zãazãan Daniɛli kɛ̀ wà ma tãa tↄ́ kpànɛ, kɛ̀ wè benɛ Bɛtɛsaza mↄ̀ ma kiia, ben ma nanaa pì ònɛ. À Luda kɛ̀ kú adona Ninii vĩ. 9 Ma bè: Bɛtɛsaza, ↄ̃ndↄ̃rinↄ gbɛ̃nsi, má dↄ̃ kɛ̀ ń Luda kɛ̀ kú adona Ninii vĩ, asiiyã ègↄ̃ zĩ'ũnnɛro. Yã kɛ̀ má è nanaa guun yɛ̀. Ǹ à bↄkↄ̃tɛmɛ. 10 Pↄ́ kɛ̀ má è ma laasuu guu gurↄↄ kɛ̀ má daɛna ma gádo musun yɛ̀. Mɛ́ɛ guu gwaa ben ma lí è zɛna tↄↄtɛ gura súusu, à lezĩ maamaa. 11 Lí pì bíta kũ̀ à gbã̀ ai à mìsↄ̃ntɛ̃ gàa à zↄ̃̀ ludambɛɛa. Wè lí pì e zaa anduna lɛ́ zɛkiinↄa píngi. 12 À lánↄↄ maa, à nɛ́ ì bíta, à pↄ́blee mↄ̀ gbɛ̃ píngia. Nↄ̀bↄsɛ̃tɛnↄ ↄra è à gbáru, bãanↄ è mↄ́ wà zↄ̃zↄ̃ à gã̀nↄa. Pↄ́ wɛ̃̀ndide píngi è pↄ́blee ea.

13 Mɛ́ɛ pↄ́ pì ee wɛ́ɛgupu guu gurↄↄ kɛ̀ má daɛna ma gádoa, ben ma malaika è bↄna ludambɛ. 14 À lɛ́ zù gbãngbãn à bè: À lí pì zↄ̃ à nɛ́ à à gã̀nↄ kɛ̃ɛ. À à lánↄ woro à à bɛɛnↄ fãakↄ̃a. À tó nↄ̀bↄnↄ bàa lɛ́ wà kɛ̃a. À tó bãanↄ bↄɛ à lánↄ guu. 15 Mↄde à lí pì kusu kↄ̃n à kãsãanↄ tó tↄↄtɛ guu à mↄ̀si gada kpánɛ kↄ̃n mↄ̀gotɛ̃ pↄ́o sɛ̃̀ guu gwe. Kpíi é kpáàla, eégↄ̃ kú sɛ̃̀n gwe kↄ̃n nↄ̀bↄnↄ. 16 À mì é likↄ̃a, à laasuu é gↄ̃ lán nↄ̀bↄnↄ pↄ́ bà ai wɛ̃̀ swɛɛplaa. 17 Malaikanↄ bé wà yã kɛ̀ Ludaa dìɛ pì ò, à ìba pìnↄ bé wà yã kɛ̀ Luda zɛ̀o kpàakpa kɛ̀, lɛ gbɛ̃ kɛ̀ aↄ̃ↄ kuunↄ e wà dↄ̃ kɛ̀ Luda Musude bé à iko vĩ gbɛ̃ntee kpatanↄa. È gbɛ̃ kpá kpatan lán à yezi nà, baa gbɛ̃ kɛ̀ kɛ̃sãna. 18 Mamↄma kí Nɛbukanɛza, nanaa kɛ̀ má òn gwe. Bɛtɛsaza, ǹ à bↄkↄ̃tɛmɛ sa, zaakɛ ma kpata ↄ̃ndↄ̃ri kee e fↄ̃ à bↄ̀kↄ̃tɛmɛro. Mↄde nɛ́ fↄ̃, zaakɛ ń Luda kɛ̀ kú adona Ninii vĩ.

Daniɛli nana bↄkↄ̃tɛna kínanɛ

19 Ben Daniɛli kɛ̀ wè benɛ dↄ Bɛtɛsaza bídi kɛ̀ yã pìa. Laasuu kɛ̀ èe lɛɛ tò swɛ̃̀ kɛ̃̀n. Ben kína bè: Bɛtɛsaza, ǹton tó nanaa pì kↄ̃n à bↄkↄ̃tɛnao n vĩa kũro. Ben Bɛtɛsaza bènɛ: Ma dii, Luda tó nanaa pì gↄ̃ dɛ n zangurinↄ yã ũ. Luda tó à bↄkↄ̃tɛna gↄ̃ dɛ n ibɛɛnↄ yã ũ. 20 Lí kɛ̀ ń è bíta bensↄ̃ à gbã̀a ai à mìsↄ̃ntɛ̃ zↄ̃̀ ludambɛɛa, ben wè e zaa anduna lɛ́ zɛkiinↄa píngi. 21 À lánↄↄ maa, à nɛ́ ì bíta, à pↄ́blee mↄ̀ gbɛ̃ píngia. Nↄ̀bↄsɛ̃tɛnↄↄ kú à gbáru, bãanↄ è mↄ́ zↄ̃zↄ̃ à gã̀nↄa. 22 Kí, ḿbe lí pì ũ. N iko bíta bensↄ̃ ń gbãa vĩ. N bítakɛɛ gbã̀ à zↄ̃̀ ludambɛɛa, n kpata ↄ tà ai anduna lɛ́a. 23 Kí, n malaika ke è bↄna ludambɛ à bè: À lí pì zↄ̃ à kɛ pↄ̃pↄ̃, mↄde à à kusu kↄ̃n à kãsãanↄ tó tↄↄtɛn. À mↄ̀si gada kpánɛ kↄ̃n mↄ̀gotɛ̃o sɛ̃̀ guu gwe. Kpíi é kpáàla, eégↄ̃ kú kↄ̃n nↄ̀bↄsɛ̃tɛnↄ ai wɛ̃̀ swɛɛplaa.

24 Kí, à bↄkↄ̃tɛnan yɛ̀. Yã kɛ̀ Luda Musude dìɛ ma dii kína yã musun yɛ̀. 25 Weé pɛ́mma wà n bↄ gbɛ̃nteenↄ tɛ́, nɛ́gↄ̃ kú kↄ̃n nↄ̀bↄsɛ̃tɛnↄ nɛ́gↄ̃ sɛ̃̀ soo lán zù bà. Kpíi é n gbɛ̃, nɛ́gↄ̃ kuu lɛ wɛ̃̀ swɛɛplaa ai ǹ gá dↄ̃ kɛ̀ Luda Musude bé à iko vĩ gbɛ̃ntee kpatanↄa, è gbɛ̃ kpá kpatan lán à yezi nà. 26 Lán à bè wà líkusu kↄ̃n à kãsãanↄ tó nà, beee bè tó n Luda dↄ̃̀ ikodee ũ, eé ɛara à n kpá kpatan. 27 Beee yãnzi kí, ǹ ma lɛ́damma kɛ̀ ma. Ǹ kɛ̃ n durunnↄa ǹgↄ̃ yã kɛɛ a zɛ́a. Ǹ n yã zaakɛna tó ǹgↄ̃ gbɛ̃kɛɛ kɛɛ takaasideenↄnɛ, ke n nnamana égↄ̃ gaa gwɛɛ.

28 Yã pìnↄ kí Nɛbukanɛza lè píngi. 29 Mↄ kuri awɛɛplaaa gbɛra kína e táa oo a bɛ kpɛ́ bíta musu Babilↄnu. 30 Ben à bè: Babilↄnu bíta kɛ̀ má kàɛ ma kíblekii ũun yɛ̀roo? Má kàɛ kↄ̃n ma iko gbãaao ma kíkɛ gakui yãnzimɛ. 31 Ai kína gↄ̃ yã pì o à yãa, kòto ke bↄ̀ ludambɛ à bè: Kí Nɛbukanɛza, yã kɛ̀ wà ò n yã musun yɛ̀: Wà n bↄ kpatan sa. 32 Weé pɛ́mma wà n bↄ gbɛ̃nteenↄ tɛ́, nɛ́gↄ̃ kú kↄ̃n nↄ̀bↄsɛ̃tɛnↄ nɛ́gↄ̃ sɛ̃̀ soo lán zù bà. Nɛ́gↄ̃ kuu lɛ wɛ̃̀ swɛɛplaa ai ǹ gá dↄ̃ kɛ̀ Luda Musude bé à iko vĩ gbɛ̃ntee kpatanↄa, è gbɛ̃ kpá kpatan lán à yezi nà. 33 Gwe gↄ̃ↄ yã kɛ̀ wà ò Nɛbukanɛza musu kɛ̀. Wà pɛ̀a wà à bↄ̀ gbɛ̃nteenↄ tɛ́, à sɛ̃̀ sò lán zù bà, kpíi à yàku. À mìkã gbã̀ lán kúu kã bà, à ↄnkↄkↄ bↄ̀bↄ sↄ̀ↄↄsↄↄↄ lán bã ↄnkↄkↄ bà.

34 Kɛ̀ wɛ̃̀ swɛɛplaaa pì pàpa, mamↄma Nɛbukanɛza ma wɛ́ɛ sɛ̀ ma musu gwà, ben ma su ma làakaria. Ben ma Luda Musude sáabu kpà ma Gurↄpingide tↄ́ kpà ma bɛ̀ɛ lìnɛ. Zaakɛ à kíkɛɛ yãana vĩro, à kpata ègↄ̃ kuu gurↄ píngi. 35 Gbɛ̃ kɛ̀ aↄ̃ↄ kú anduna guunↄ ń píngi dɛnɛ pↄ́ke ũro. È kɛ lán à yezi nà kↄ̃n gbãadee kɛ̀ aↄ̃ↄ kú musunↄ kↄ̃n gbɛ̃ntee kɛ̀ aↄ̃ↄ kú tↄↄtɛnↄ. Gbɛ̃ke è fↄ̃ à kpànɛro, gbɛ̃ke è fↄ̃ à benɛ bↄ́n èe kɛɛro.

36 Gurↄↄ kɛ̀ ma su ma làakaria, ben ma ɛara ma su ma kíkɛgakuin kↄ̃n bɛ̀ɛo kↄ̃n bítakɛɛo. Ma ìbanↄ kↄ̃n ma bùsu gbãadeenↄ ma gbeka, aↄ̃ ma ka kpatan, ben ma iko dɛ káakupↄla. 37 Mamↄma Nɛbukanɛza mɛ́ɛ musu Kína sáabu kpaa sa mɛ́ɛ bɛ̀ɛ liinɛ mɛ́ɛ à tↄ́ kpaa, zaakɛ à yãkɛnanↄↄ maa píngi, ègↄ̃ yã kɛɛ a zɛ́a. Eé fↄ̃ à gbɛ̃ kɛ̀ è a zĩnda sɛ́ lezĩ busa.