Luda yã takada kↄ̃n Bokobaru yão LAASUUDEE 12

1 Ǹ tó n Kɛ̀ri yã gↄ̃ dↄngu n gↄ̃kparɛkɛgurↄ

ai gurↄ zaaa gá ká,

ai wɛ̃̀ kɛ̀ nɛ́ be nɛ́ɛ à nnaa ma dↄrooa.

2 Ǹ tó à yã gↄ̃ dↄngu

ai ↄfãntɛ̃ kↄ̃n gupuraao gↄ̃ lago,

ai mↄvura kↄ̃n sↄsↄnɛnↄ gↄ̃ sia kũ,

ai loumana gbɛra guweresai gↄ̃ gá su.

3 Gurↄ beeea n ↄↄnↄ égↄ̃ lugaluga,

n gbánↄ é koko,

n pↄ́sobↄnↄ é kámma bo kɛ̀ aↄ̃ↄ pari dↄro yãnzi,

n gugwabↄnↄ é guu e ń windo guu dãadãa.

4 N lɛ́ égↄ̃ nakↄ̃ana gãalɛ,

wísilↄgbɛ kĩi é busɛ kũnnɛ.

Bãanↄ wiii é n vu iin,

nↄkparɛnↄ lɛ̀ é kɛnnɛ busɛ.

5 Nɛ́ vĩa kɛ gulezĩnɛ kↄ̃n lili'ona zɛ́ guuo,

n mìkã é pura kũ lán desu vú bà.

Nɛ́ n zĩnda gáɛ lán kwa táa'ona bà,

pↄ́ke é n mɛ̀ fɛɛ dↄro,

zaakɛ gbɛ̃ntee è gá a gákiiamɛ,

ben ↄ́ↄdↄrinↄ ègↄ̃ lili oo gãalɛ.

6 Ǹ tó n Kɛ̀ri yã gↄ̃ dↄngu

ai n kondogi bà gↄ̃ gá kɛ̃,

ai n vura taa gↄ̃ gá kpaato kũ,

ai n í loo gↄ̃ gá wíwi,

ai n lↄ̀gↄ googa gↄ̃ gá wí,

7 ai n bùsuti gↄ̃ ɛara à gá gɛ̃ tↄↄtɛn,

guu kɛ̀ à bↄ̀n,

ai n ninii gↄ̃ gá tá

Luda kɛ̀ kpàmmaa kiia.

8 Ma laasuude ma bè:

Yã pã búgubugu,

à píngi pãmɛ.

Yã pì mìdɛna

9 Beee gbɛra lán laasuudee pì ↄ̃ndↄ̃ nà, à dↄ̃na dàdańnɛ. À laasuu lɛ̀ à kpáɛ kɛ̀ yãzi, ben à yáasinↄ kɛ̀ pari. 10 À kpáɛ kɛ̀ yã maaazi, ben à yã pìnↄ kɛ̃̀ a zɛ́a, bensↄ̃ yãpuramɛ.

11 Ɔ̃ndↄ̃dee yãnↄↄ dɛ

lán gò kɛ̀ wè pↄ́kãdeenↄ zↄ̃o bàmɛ,

aↄ̃ yã'onanↄↄ dɛ

lán kuusa kɛ̀ wà pà gínginnↄ bà.

Sãdãri mɛ̀n doo bé à yã pìnↄ dà.

12 Ma nɛ́, ǹ làakari kɛ, ǹton yãke kaaranlo. Wè takadanↄ kɛ̃ paripari, à lɛ́ vĩro. Kyókɛna bíta sↄ̃ è mɛ̀ kpasamɛ. 13 Wà à píngi mà, à mìdɛnan yɛ̀:

Ǹ vĩa kɛ Ludanɛ,

ǹgↄ̃ à yãdiɛnanↄ kũna,

zaakɛ baade píngi yãn gwe.

14 Luda é yãkpaɛ kɛ wa yã píngi musu,

kↄ̃n yã kɛ̀ utɛnao píngi,

baa à maaa ke à zaaa.