42
Yosefa tawaganavo inau Itipita.
1 Tova tayuwe Kenani wagaine Iyakobo gikaiyanogala vaita witi gimiyamiya Itipita, ada natunavo kaliva gidouwe-vagauwidi ke givonediga, “Gavana imi wamiyamiyane?
2 Ganogalina witi gimiyamiya Itipita wagaine. Wadaobu adaga wada kimone, e ada wayawaida kanamiya aku keke mafalavuga wagaine kana vealialika.”
3 Ada Yosefa tawaganavo aditeni itauya inau Itipita aa ina kimone.
4 Aku Iyakobo ani Yosefa anatubuluga Beniyamina keke gidaimili nodi idana, faina gimatauta aimo vita gina nuwagana.
5 E ada Iyakobo, kaduwe anayegana Isileli, ani natunavo inau Itipita ke kaliva moyaidi kaduwe aa ina kimone, faina loka kaduwe fafali Kenani wagaine gimiyamiya.
6 Tova tayuwe wagaine Yosefa givetoveimeya fafali Itipita wagaine ke banae-nai witi givekivekimone fafali matatabuna adikalivayavo wagaidiya. Ada tauna tawaganavo ielai wagaine ada au iiboula-mowa babi wagaine ke matane ioduvemoimoina.
7 Ada tawaganavo giitainanadi aku gidewedi anafaiweya badi mali kaliva ada giagodadagedi, givonediga, “Imi gadedeku-deya waela?”
Ada ilufata, ivonena, “Ime fafali Kenani wagaine aelai aa anakimone faina.”
8 Aku Yosefa bademowa-deya tawaganavo giinanadi, aku badi ibavuyena.
9 Ada anaavaita-dina faidiya ani nuwana giamutuna ke givonediga, “Imi tofwaya! Imi toitavagivagiya, ada evona waelai ke yama fafali yana kabekabebena wanaitana ada wana awamogatalena amitoveimeyamomo wagaidiya ke inaela ina lugaviyama ada inavaina!”
10 Ani tawaganavo ilufata, ivona, “Keke, Kauveya. Ime keke adaela ana itavagivagiya, ime aelai aa anakimone faina.
11 Ime matatabu-moema ani kaliva seyana natunavo. Ime kaliva iwakameyavo, keke toitavagivagiya.”
12 Ani Yosefa givona, “Keke. Imi waelai ke yama fafali yana kabekabebena wanaitana.”
13 Ada ivonaga, “Ime ya togugaiyavo atubudelideli tamama seyana wagaine gimiyamiya Kenani. Nagona amayoo tuwelo ada taima kwamaneya-mowa tamama nodi aku taima seyana keke gida miyami.”
14 Ada kaduwe givone-vagiledi, givona, “Imi bademowa gavonemi anafaiweya, imi toitavagivagiya.
15 Tayuwe faine yami vona gana galuvaluvana taidei anafaiweya: Gavonadabadaba Itipita anakini yana toyogineya, keke maita wanayewa aku taimi kwamaneya-mowa ginaelai idedeku.
16 Ada seyana wagaimiya-deya wanaimili ginanau ke taimi kwamaneya gina vagaule gina aliyena idedeku, aku matatabu-moemi ani wanamiya idedeku yogoyogomiyavo, e ada yami vona-dina gana galuvaluvana ada gana alamanena wavonavona velemoena o kai wavefwayafwaya. Kai keke taimi kwamaneya ginaabi gina aliye wagaikuya aga gavona velemoena Itipita anakini yana toyogineya, imi toitavagivagiya!”
17 Ada matatabu-moedi gisedi deliya ke imiya yadayada toiye.
18 Yadayada anaveto wagaine Yosefa toyavaga giveimeyedi ke tawaganavo ialiyedi wagaine ada givonediga, “Iya gana vonemi mamauwe wanagugai ke wayawaimi wana miyamiya, faina Yaubada gavemoimoinena.
19 Kai imi kaliva iwakamiyavo aga tubuiyami seyana yogoyogona ginamiya idedeku, aku matatabumi gana etoyavumi ada witi wanawai wana yewami Kenani yami gabuyavo wamafalavugidiyavo wana vekanidi.
20 E aku taimi kwamaneya wanaabi wana aliyena wagaikuya. Taidei wagaine gana alamanena vaita wavona velemoena e ada wayawaimiyavo wanamiya.” Ada tawaganavo yana nuwanuwa-nai iawaveiwakanena.
21 Ada ivebutu taudiyavo iifufu, ivona, “Taidei velemoena, matavuloga-nai kanuwagana faina tuwaina gavaiyamu taida wagaine kadewa. Ide kaitana gimatauta lakaina ke kanogalina gitagivedavedadageda aku keke bonana kada nogali. Taidei vuvuna vita taidei kanuwagana.”
22 Ada Lubeni givonediga, “Tuwaina gavonemi keke koyona wanagai kwamana wagaine aku keke bonaku wada nogali. Ada waitana, malinai vita kanuwagana faina taudeyavo yada dewa koyona taida wagaine.”
23 E aku badi Yosefa lilivane iifuifufu ada inuwanuwa vaita keke bonadi gida alamane, faina givonavona tubuiyanavo wagaidiya wayana tokivila. Aku velemoena ani yadi vona seyana seyana gialamanena.
24 Ada tagiya faina nafona gilubudabudalina au gimaduyabuyabudi-ku gina gitagiya. E ada matailuna giluwegegedi aku giyewa-vagilena tawaganavo wagaidiya ada yana togugaiyavo giveimeyedi Simiyoni ikiveyabina ada tubuiyanavo matadiya aku nimana iyogona.
25 Ada Yosefa yana togugaiyavo giveimeyedi ke tawaganavo yadi baiki ivemagadi witi wagaine ada givonedi ke yadi siliva ilufatayedi ani idodoveyewadi kaliva seyana seyana yana baiki wagaine, ada kaduwe givonedi adiabwaka wai faine iveledi. Ada ikidewadewa-yabu muline,
26 witi wabaikidi iabulakalakaidi yadi doniki getadiya ada itauya.
27 Ada mala gibogi ielai ebaveyawai wagaine ke wadedeku inadau, aku tubuiyadi seyana yana baiki giyavuna ke witi ginavai yana doniki gina vekanina ani yana siliva baiki awane giitana.
28 Ada tubuiyanavo givonediga, “E! Yaku siliva kaduwe idodoveyewana! Idauwe siliva-moena yaku baiki wagaine!”
Ada siliva iitadi, au aseasedi giulolo ke imatauta, ada taudiyavo ivonavona, “Gavana taidei Yaubada gigugaiye wagaideya?”
29 Mala gilavuna kaduwe itauya-vagila ada inau-deya, iyegemona Kenani tamadi Iyakobo wagaine. E ada iifufuyena gaitoma matatabuna gavana giyegemona wagaidiya, ivona,
30 “Kaliva-nai banae meItipita aditoveimeya ani giagodadagema ke gidewema vaita ime fafali anatoitavagivagiya.
31 Aku avonenaga, ‘Ime kaliva iwakameyavo, ime keke toitavagivagiya.
32 Ime atubudelideli amayoo tuwelo kaliva seyana natunavo, ada taima kwamaneya-mowa tamama nodi imiyamiya Kenani aku taima seyana keke gida miyami.’
33 “Ada kaliva-nai banae fafali anatoveimeya ani givonema, ‘Taidei wagaine gana alamanena vaita imi kaliva iwakamiyavo: tubuiyami seyana idedeku ginamiya aku matatabumi aa wanawai wananau ke yami gabumomo wamafalavugidiyavo wana vekanidi.
34 Aku taimi kwamaneya wana aliyena wagaikuya ke gana alamanena vaita imi keke toitavagivagiya aku kaliva iwakamiyavo. Ada tubuiyami gana awaege gina yewana wagaimiya ke meyameyaganina gana awaegemi wana elaela aa wana kimokimone.’ ”
35 E ada yadi baiki iiyavuga ina luiwaiwaga, ani kaliva seyana seyana ginuwagana yana siliva wafosena yana baiki wagaine, ada badiyavo ke tamadi nodi imatauta lakaina.
36 Ada tamadi Iyakobo givonedi, “Imiyavo ani natukuweyavo waivebwavidi. Yosefa keke-mowa, Simiyoni keke-mowa, aku kaduwe nuwanuwami Beniyamina wanaabi wana nauwena? Gaitoma koyona matatabuna giyegeyegemona wagaikuya!”
37 E ada Lubeni tamana givonenaga, “Kai Beniyamina keke ganayewe wagainiya aga natukuweyavo kaliva adiselu gaawaegedi una luvealikadi. Nimakuya unasena ada iya gana itaveyabina.”
38 Aku Iyakobo natunavo givonedi, “Keke maita Beniyamina gana awaege imi nodi wanana. Tubuiyana gialika ada banae anakaibe-mowa gitufo inana Litiyeli wagaidiya. Kai aimo yami nau-nai wagaine seyana koyona gina yegemona, aga nuwavita wagaine ganamiya-deya ganaalika ganaobu didikuleya.”