8
Iyesus handr taaron kahni naasho b́wottsok'o
1 Eshe bojangatse nokeweyiru keewwotsitse bog keewo haniye, darotse Ik' eeno jori k'ani aaromantse beyirwo hank'o kaheniyi naash k'aabo detsfone.
2 Bí b́ finit S'ayin beyok arik wotts k'ewoko dunkaniyotse, dunkaniyan b́ k'oons'eyiye ash kishon b́woterawon doonzo kishonee.
3 Kahni naasho ik ikon b́naashiye imonat woshon b́t'intsitwok'owe, mansh kahniyanwere b́t'intsitwo ik keewo detso bísh geyife.
4 Nemok'on Ik'osh imetso t'intsit kahniwots bofa'otse bí datsatsa wotink'ere kahniyo woterawnk'e b́teshi,
5 Kahniyanots bo finirwo dunkani darotse fa'aman ariyonat b́ s'ilal mec'ree, man b́wotwere Muse gofu bí agoor, Ik'o «Guri abaatse neesh b́ be'etsok'on jam keewo t'iwintson finowe» ett bísh b́ keewtsok'onee.
6 Andmó Iyesus dag taalotse manitso b́ wotts taaro beshts nat taaratse bogonat k'ants jangiyetswotsats need'iyetso b́ wottsotse bísh imets fino boge.
7 Shin kindeets taaro shapo deshawo wotarr b́datseyink'ere gitlo taareyo geyirawnk'ee b́teshi.
8 Ik'o bí ash ashaatse shapo b́beyo kitsfetst hank'o etfe,
«Hamb, Israe'el ash ashuwotsnat Yihud ash ashuwotsnton
Handron notaaret aawo weetwe» etfe Doonzoni.
9 Taaranwere Gbs'itse bokisho detsdek'at boon tkishoor bo nihotsnton t taaretsok'oyiyaliye, bo taanton bo taaretsats bo kup'erawotse taawere boon aatsni tk'ri etfe Doonzoni.
10 «Eshe, haniyhakon Israe'el dats ash ashonton
T taaret taaro hank'owiye etfe Doonzoni,
Taa tnemone bo tookots beezitwe,
bo nibotsowere guut'etwe,
Bo Ik'onowere wotitwe,
Bowere tiashwotsi wotitune.
11 ‹Doonzo dande'e› err k'osh ashosh wotowa
bí eshwsh daniyitwo konwor beeratsye,
Muk'aatse tuur eenok b́borfetso jametso
taan danetwe,
12 Bonandosh oorowe eteetwe,
Bomorronowere haniyak boats taawratse.»
13 Haniyak «Handr taara» bí etor shints taarman nat woshre etee, mansh nat jamo b́ t'afit aawo t'iinwtsere.