Yak'ob Wosho
Kindo
Yak'ob woshan aawu aawon nobeyosh noon jishitu hasabiyotsi detsk b́ wotor b́ guut'ewwere dats jamats bad'ts tatse git naruwotsshe, guut'tsonwere dani telefo finats nijitsit malo, Krstiyani doyo detsonat ayhudi woto jishosh wotit keewwotsi kishde'er kitsit jewuri keewuotsn b́ t'intsiri, kashi jango, bogabogsho, fadewo, sheeng amalo, amani jangonat sheeng finon, albero b́ dowet gondonat sheengon, dani teleefo, atsatseyo fayeyi jango, bogtaana etonat b́ tooko dash detson k'oshuwotsats angshi jango, it'i jango k'amonat Ik' k'oni jangon, krstiyaniwots k'alosh boon geyit keewi jango ik ikon guut're.
Woshan krstiyani beewotse imnetiyo finats b́jinet jango shaanidek'tni b́ kitsiri.
Jamon mas'aafan b́detstso
Kindo. 1:1
Imnetiyonat Dani teleefon. 1:2-8
Tugroonat gaalon. 1:9-11
Fadeyo. 1:12-18
Ik'o keewuts keewo k'eboonat finats jiitson. 1:19—2:13
Amanonat finon. 2:14-26
Krstiyaaniyonat bíalbeeron. 3:1-18
Krstiyaaniwonat datsaann. 4:1—5:6
K'osh k'osh naari keew jangosh imets izo. 5:7-20
1
Jamo
1 Dats jamats bad'ts tatse git jirwotssh Ik'onat doonzo Iyesus Krstos guutso wottso Yak'oboke wosheets jamó, jeno itsh wotowe.
Imnetyonat Dani teleefon
2 Ti eshuwotso! k'osh k'osh naari fadewo itats b́bodor geenúshit keewwotsi it daatstsok'o woshde'er taawwere.
3 It imnetiyo b́fadewo k'amo itsh daatsituwo b́wottsok'owo dandek'etute.
4 K'amonowere it kup'o ik jago itsh b́shaprawo s'eenonat itn bodtswotsi woshituwo wotowe.
5 Ititse dani teleefo bísh b́shapts asho fa'e wotiyal Ik'o k'onuwe, Ik'onwere bísh imetwe, bí jametsosh shiitso bí aa'awo tewudi doon imetwo Izar Izeweriye.
6 Ernmó asho eegonor gito b́gímberawo amande'er k'onuwe, git gimbiru asho jongon gifniyeyat giwwtsts aatsk'aroniye bíariye.
7 Mannaari asho doonzoke ik jago b́daatsituwok'o bísh ark'aye.
8 Han b́wotituwere git níbo detst b́weerindatse hake baka bíetiruwoshe.
Tugrets ashonat gaalets ashon geneúwo
9 B́ beewon dashan wotts eshuwo Ik'o damban bín b́ detsetwosh geneúwowe,
10 Ash gaalo bodi fuundok'o b́ ooshetuowotse b́ beewon dambaan wotts eshuwo Ik'o b́bewo dashan b́woshiyalor gene'úwowe,
11 Aawo b́ k'ees'onton b́keshor bodo shuuk'iniye b́k'riti, b́ fúndonuwere ooyniye b́wutsiti, bíazisheengonwere t'afniye b́wutsiti, mank'owere gaalets asho b́fiinon b́jaakfere t'afniye b́wutsiti.
Ashaats bodet fadewo
12 Doonzo b́ taartsok'on bín shuntswotssh b́ imet kashi akililiyo b́ dek'etuwosh fadeyo k'amar kúp'it asho deereke.
13 Ik'o gond keewon noon b́ fadrawotse mank'o bíwere konnoru b́ fadrawotse asho b́ fadeyor «Ik'o taan fadre» etk'aye.
14 Ernmó asho ik ikon b́ fadeyir b́ took tewnon geetseyar bí ant'elcewore.
15 Haniyhakon tewunu bmaac'or morro shuwitwaniye. Morronu s'eenon bi eeniyakon k'iro shuwituwane.
16 Shuneets eshuwwotso! it ant'elcherawok'owa!
17 Sheengts imonat s'een wotts deer jamo Ik'okne, han b́weetuwe c'ishok'o wona wonewo deshaw shááni niho Ik'okne.
18 Ik'o bí azts jam shintswotsitse gawdek't ari aap'on noon shuure.
Shishetso finats jitso
19 Shuneets eshuwotso! han batk'ayere, ash jamo k'ebosh káártso, noonkeewonat fayosh mango wotowe.
20 Ash fayo Ik'i kááwo daatsiratse.
21 Hansha kiimonat weerigondi ayonowere ok k'aúbayr Ik'o it nibots b́ toktsonat it kasho kashiyo falitu aap'man it tooko dashan detson de'ere.
22 Ik'i aap'tso finats jiitswere bako it tooko dashfetsr shish mec'ro shishfwotsi wotk'ayere.
23 Ik' aap'ts aap'o finats jiitsraw asho bín bíazeets shiitso mastayiton bek'iru ashok'oyiye,
24 Ashaan b́shiitso mastyiton b́s'iliyakon ametuwe, awuk'o b́wottsok'owo manoor batni b́k'riti.
25 Wotowa eree nas' kishit b́ nemo sheengshr s'iilr bín kup'ituwo bínowere shiir baterawo, finats jitsitu asho b́ finon deereke b́ wotiti.
26 Bí albero korde'aniyere Ik'o Ik'irwe eteet asho b́ tookoniye b́ dashiri, b́ ik'iyonwere k'awuntso deshatse.
27 Ik'o niho shinatse s'ayinonat kimaw hayimanotiyo, nihonat indo k'irts nanaúwotssh, aaninu bokenih k'irts máátsuwotssh bo kic'or boon tep'o, b́ tookonowere datsanatsi kimatse kordek'oniye.