3
Solomon, Sonoga Anꞌetana ya Anꞌetai.
1 Kin 3:3-5, 7-15
(2 Koleniko 1:3-12)
3 Solomon, tamana Deiwidi ena laulau ya lau watanidi be Guyau ya fanuha. In moho antalasam yo maꞌi panepanedi ya gabudi ai piupiu hiti.
4 Aba fadebasae loholohona hesa mate Gibiyon Nuꞌuna yai, habahim nuꞌu hahaisa enehedi. Logena, Baꞌisa Solomon ya lau amainiya be antalasam 1,000 ya gabudi.
5 Maihonana eno suwai yai Guyau ya taumahata Solomon lisina Gibiyon yai. Na Guyau iyebom,
Somo wa fanuha bena E felem mate u anꞌetai.
Alinana Solomon ya bui, iyen,
7 Guyau egu Yaubada aho te, em tau paisowa wa tolegu baꞌisa, tamagu Deiwidi falau damahina. In moho yau doha wawaya kiukiu. Yo tanuwaga paisowana sonogana hige ya sibai.
8 Em dodoga wa fasinabodi ganahewadi yai, yau em tau paisowa. Sa ouli wananaha, hige gonowana sai haba i fatilidi.
9 Aee–, nuwatuhu sibasiba u felegu haba heyaya yo dudulai E ita lobahidi. Haba em dodoga itaꞌita watanidi E sibai. Yena hige u felegu hige gonowagu haba em nuꞌu laꞌilaꞌi te ya ita watan.
10 Yaubada iyen,
Solomon, em anꞌeta E fanuha.
11 Egoba miya lofalofa yo fagogo anꞌetadi wa anꞌetaidi e am waiyunu bena E wunuidi anꞌetana wa anꞌeta. In moho sibasiba wa etai be haba dudulai yai dodoga wa foyahidi.
12 Lisina yai, haba sibasiba E felem be wa sonoga diꞌoi. Hige sai hesa beyabeyana e fuya matada yai ena sibasiba doha.
13 Yo hinaga somo um hige u anꞌetai mate haba E felem. Haba wa fagogo yo haba sa faꞌatitiyem em miya fuyandi yai. Yo hesam haba ya laꞌi, habahim kin mahudoꞌidi.
14 Yena wa awa abiyegu yo egu laugagayo wa lau watanidi doha tamam Deiwidi, haba wa miya lofalofa.
15 Solomon ya eno obiyo ya nuwatuhu lobahi mate Yaubada ya libama lisina eno suwai yai.
Wawahin Luwaga edi Pilipili Solomon ya Fadudulai
1 Kin 3:16-28
16 Wawahin matamata heyayadi luwaga sa laoma kin Solomon sa ita be edi pilipili ya fadudulai.
17 Hesauna iyen,
Egu baꞌisa, waihin te luma esega yai ꞌe gogogo. Maꞌegu ꞌe miyamiya na natugu taumoho E yosi.
18 E yosi na lahai faihona mulidi yai, waihin te hinaga natuna taumoho ya yosi. Ibomai lumana yai ni ꞌe miyamiya, hige sai laꞌi maꞌemai.
19 Iꞌipana yai, waihin te natuna ya eno hafiti be ya peꞌi.
20 Iꞌipa atipuna E eno tau ꞌwafuꞌwafu na natuna peꞌipeꞌina ya leyama ya faꞌeno nuwanuwagu yai. Na natugu ya lawen ya faꞌeno nuwanuwana yai.
21 Hwalahwalalana E obiyo bena natugu E fanom na E ita mate peꞌipeꞌina! Ya ifi tatatalima na E ita komakomaniꞌi mate hige natugu.
22 Solomon matana yai wawahin luwaga te, sa liba faiꞌabi. Hesa iyen,
Higeꞌe! Peꞌipeꞌina um natum na mwahumwahulina yau natugu.
Na waihin bwaꞌibwaꞌina ya liba fuyo, iyen,
Higeꞌe, mwahumwahulina, yau natugu.
23 Habahim, Kin iyen,
Itete iyebom, “Gwama peꞌipeꞌina te um natum na mwahumwahulina yau natugu,” na hesa iyen, “Higeꞌe, mwahumwahulina yau natugu na peꞌipeꞌina um natum.”
24 Yo fede, ya liba fuyo iyen,
Baineti au leyama.
Yo fede baineti sa leyama sa felen.
25 Habahim iyen,
Gwama mwahumwahulina au tala dagi be hesa ena tefa na, hesa ena tefa.
26 Waihin bwaꞌibwaꞌina natuna ya fanuwatohatohaen be ya libalau kin lebena iyen,
Aee–, egu baꞌisa! Gwama tabu u tala dagi! Ma mwahumwahulina waihin ni u felen!
Na waihin hesa iyen,
Higeꞌe, u tala dagi! Tabu sai u felen.
27 Yo fede kin iyen,
Tabu au tala dagi! Waihin bwaꞌibwaꞌina au felen. In tinana wananaha!
28 Baꞌisa Solomon wawahin sidohana ena fafadudulaidi, Isalaela dodogadi sa atahiyen be sa noꞌoꞌen, paꞌana sa ita lobahi mate Yaubada sibasiba ya felen be dudulai yai ya paisowa.