7
Liba Famahata
Diyebusi dodogadi mate Yelusalem yai sa miyamiya yo fede, Deiwidi ena tau hiyala ya foyahidi sa lau be Yelusalem taonna laꞌilaꞌi sa asi halahalaen. Amainiya Deiwidi ena luma ya ginauli. Habahim, tatau hahaisa ya foyahidi sa lau Yaubada ena laugagayo aba husanina sa bahei sa lawen Yelusalem be Palai Tabuna yai sa faꞌota.
Yaubada Deiwidi ya Liba Fasunuma
2 Samuwela 7:1-5, 8-17
1 Waiyunu Deiwidi sa miya fataꞌiꞌili. In moho Guyau ya itaꞌita watan yo ya saguhi be ana waiyunu ya lei hafihafitidi. Mulina yai, ya miya daumwali ena luma loholohona yai. Lumana ni oyagi loholohona hesana sida, lisina yai sa ginauli.
2 Mulina yai, ya libalau Peloweta Neitan lebena iyen,
Yau amaiteꞌi luma loholohona sida yai sa ginauli amainiya E gogogo, na Yaubada ena Laugagayo Aba Husanina hola ya otaꞌota palai yai.
3 Neitan kin alinana ya bui iyen,
Somo wa nuwatuhui u ginauli. Paꞌana Guyau maꞌem.
4 In moho, iꞌipana yai Guyau ya libalau Neitan lisina iyen,
5 U lau be egu tau paisowa Deiwidi, u faliba uwen, “Guyau ya liba doha ite: ‘Um hige, logem, bena egu luma u ginauli!”
8 Guyau ya liba boda iyen,
Aho ite, egu tau paisowa Deiwidi u faliba uwen, “Guyau Tau Gigibwali ya liba doha ite: E abifahim, sipi wa itaꞌita watanidi edi aba anꞌanban yai na, aho te, E abim be wa famala egu dodoga Isalaela tau foyafoyahidi.
9 Em aba lau somo yai mate yau maꞌem. Na am waiyunu mahudoꞌidi matam yai haꞌa E lei hafihafitidi. Aho te hesam haba E falaꞌi, doha tatau fafahesadi tanoꞌubu yai te.
10-11 Yau haba egu dodoga, Isalaela edi tanohi E feledi be ya famala edi nuꞌu, be ai lisina haba E famiya komakomanidi. Tau foyafoya egu fuya faꞌobiyodi yai mate nuꞌu hahaisa dodogadi heyaheyayadi Isalaela dodogadi sa tulutulufidi. Ibege ti ginauli fuyoi doha, yo ibege ami waiyunu ti guwe fuyoimiu, haba ami miya daumwali.
“Guyau ya angwala lebem yai mate In iyabona haba ya fafaꞌobiyomiu kin, um yo laulauwewem.
12 Yena wa peꞌi be sa boꞌusaim wahawaham edi aba toledi yai, haba laulauwewem hesa E faꞌobiyo, ya lau fadamahim. In haba natum hesa na ena tanuwaga yai haba E faꞌadidili.
13 In logena hesagu yai haba egu luma ya ginauli, yo haba E faꞌobiyo kin, hige anadan.
14 Yau haba tamana, na in haba natugu. Ibe heyaya ya ginauli haba ai mada E pidili doha tau tamatama natuna ya pidili.
15 Haꞌa Saulo lebena yai egu gadosisi E abifahi be kin yai E kamfahi na um E faꞌobiyom, wa lau fadamahi. In moho egu gadosisi lebena yai hige gonowana ya abifahi.
16 Am boga haba ya tadada yo laulauwewem haba sa obiyo kin hige anadan.”
17 Guyau liba mahudoꞌina ya liba famahata Neitan lebena yai mate Deiwidi ena ya liba.