3
Jeezas grayta dahn Moaziz
1 Soh den, mi bradaz ahn sistaz, Gaad kaal unu fi bee fi hihn hoali peepl. Tink bowt Jeezas, weh Gaad sen fi bee fi wee apasl ahn di hai prees weh wi seh wi bileev eena.
2 Jeezas mi faytful tu Gaad, weh mi pik hihn, jos laik how Moaziz mi faytful eena how ih mi leed Gaad peepl dehn.
3 Bot Jeezas dizerv moa aana dahn Moaziz, jos laik how di persn weh bil wahn hows dizerv moa aana dan di hows ihself.
4 Kaa evri hows hafu ga sohnbadi weh bil it, bot da Gaad da di Wan weh mek evriting.
5 Soh den, Moaziz da-mi wahn faytful servant oava Gaad hows, weh da Gaad peepl, ahn ih mi-di shoa aal weh Gaad mi wahn seh eena di fyoocha.
6 Bot Krais, az Gaad Son, mi in chaaj a Gaad hows. Ahn wee da Gaad hows, weh da Gaad peepl, if wi kip op wi korij ahn ga kanfidens eena di hoap weh wi ga eena Krais.
How fi fain res eena Gaad
7 Soh den, jos laik weh di Hoali Spirit seh,
“Tudeh, if unu yehr Gaad vais,
8 unu noh fi haadn unu haat gens ahn,
laik weh unu ansesta dehn mi du
wen dehn ton gens Gaad eena di dezert,
wen dehn tes Gaad payshens.
9 Eevn doa dehn si weh aal Gaad mi du fi dehn,
dehn tes ih payshens fi faati yaaz.
10 Soh Gaad mi beks bad wid dehn
ahn ih seh, ‘Unu aalwayz di ton weh fahn mi.
Unu rifyooz fi du weh Ah tel unu.’
11 Gaad mi soh beks wid dehn dat ih pramis dehn seh,
‘Unu wahn neva goh eena di lan weh Ah mi wahn gi unu fi res eena!’ ”
12 Mi bradaz ahn sistaz, unu kyaaful! Mek shoar dat unu haat noh geh soh eevl ahn ful a dowt, dat ih mek unu ton weh fahn di livin Gaad.
13 Unu mos inkorij wan anada evri day, wail da stil “tudeh” soh dat sin noh fool non a unu ahn mek unu ton gens Gaad.
14 Kaa if wi faytful tu di en, ahn bileev Gaad jos laik how wi mi bileev eena ahn schrang-wan fahn di biginin, wi wahn ga shayr eena aal weh bilangz tu Krais.
15 Laik weh rait eena di Skripcha seh,
“Tudeh, if unu yehr Gaad vais,
unu noh fi haadn unu haat gens ahn,
laik weh unu mi du
wen unu ton gens Gaad.”
16 Da mi hoo dehn peepl weh mi yehr Gaad vais ahn stilyet ton gens ahn? Da neva dehn sayhn wan weh Moaziz mi leed owta Eejip?
17 Ahn da hoo da-mi di peepl dehn weh mi geh Gaad soh beks wid dehn fi faati yaaz? Da neva dehn wan weh mi sin ahn en op di jrap dong ded rait deh eena di dezert?
18 Ahn da hoo Gaad mi-di taak tu wen ih vow seh, “Unu wahn neva goh eena di lan weh Ah mi wahn gi unu fi res eena”? Ih mi-di taak bowt dehn wan weh neva obay ahn.
19 Soh wi si dat Gaad neva mek dehn gaan eena di lan, sayka weh dehn neva bileev ahn.