☰ 2 Corintios 4
4
1 Roma c'a ri', ri quitijoxic ri vinak chila'en chike* roma xpokonex kavech roma ri Dios, man juba' caca' kac'u'x nika'an-ka chupan. 2 Pa ruq'uexel ri', roj kabanon che ri kánima chi xa roj caminak chuvech ri nibanataj che'elek'el ri xa nuya' q'uix. Man nika'an ta tz'ucun tak tzij richin c'o nikajo-apu chique ri ye'ac'axan kichin, ni man nikajal ta* ruchojmil ruch'abel ri Dios ri achok riq'uin yekatijoj-vi. Xa chosakil chuvech Dios nikak'alajrisaj ri kitzij chiquivech, roma nikajo' chi conojel niquina' pa cánima chi ja ri kitzij ri nkutajin chubixic. 3 Pero si tz'apel* ruchojmil ri utzulaj ch'abel ri nikatzijoj roj ri nu'ij achique ruchojmil yecolotaj ri vinak, ri' xaxe chiquivech ri can richin vi chi man yecolotaj ta. 4 Ja vinak ri' ri rusatzon quino'oj ri rajaf* ri tiempo re'. Quiri' nu'on chique ri man niquinimaj ta ri Jesucristo, richin man tiquitz'et* ri sakil richin ri utzulaj ch'abel ri nic'utu ri nimalaj ruk'ij ri Jesucristo ri c'aslic ruvachibel ri Dios. 5 Quiri' nika'an che ri samaj, roma mana-ta katzijol roj ri nikaya'. Ri nikatzijoj, ja ri Jesucristo ri Ajaf pa ruvi' ronojel, y roj roj isamajela'* pa rubi' rija'. 6 Roma ri Dios ri x-in chi tik'alajin-pe sakil* chupan ri k'eku'n, ja rija' mismo niyo'on sakil pa tak kánima,* richin niketemaj chi riq'uin ri Jesucristo nitz'etetaj-vi ri nimalaj ruk'ij ri Dios.
Chuvi' ri koyo'en riq'uin ri Jesucristo, kac'uan-vi ri kac'aslen
7 Ri yitajin chubixic chive, jun beyomal yo'on chike roj ri xa roj achel relic tak bojo'y banon riq'uin ulef,* richin quiri' nik'alajin chi ri nimalaj uchuk'a' ri nic'atzin richin nibanataj rusamaj ri Dios, riq'uin rija' petenak-vi* y man kiq'uin ta roj. 8 Jalajoj c'ayef nikil pa kac'aslen,* pero man kayo'on ta ki' pa ruk'a'. Man nikil ta achique nika'an, pero man satznak ta kac'u'x. 9 Xa achique na lugar nkuk'ax-vi, ni'an pokon chike,* pero ri Dios c'o kiq'uin. Masque roj torin pan ulef, pero man roj camisan ta jumul. 10 Xa achique na lugar nku'e-vi, ri ka-cuerpo nijar benak pa ruk'a' ri camic, achel x-an che ru-cuerpo ri Jesús, richin quiri' ja jun ri ruc'aslen ri Jesús nik'alajin* pa ka-cuerpo. 11 Roma roj ri c'a roj q'ues na, achel can ta k'ij-k'ij roj jachon pa ruk'a' ri camic* roma rubi' ri Ajaf Jesús, richin quiri' ja jun ri ruc'aslen rija' nik'alajin chupan ka-cuerpo ri xa niq'uis. 12 Y can quiri' vi; can nisamaj ri camic pa ka-cuerpo, jac'a chive rix xa c'aslen ri richin jumul ruc'amon-pe.
13 Y roma kayo'on kánima riq'uin ri Dios, nika'an achel nu'ij ruch'abel ri Dios ri tz'iban can ri nu'ij: Xinya' vánima riq'uin y romari' nintzijoj.* Quiri' nu'ij ri tz'iban can. Romari', ja jun roj nikatzijoj ri achique kaniman, 14 roma keteman chi ri xc'ason-e* ri Ajaf Jesús chiquicojol ri anima'i', jari' mismo xkuc'ason-e roj, roma xa jun kabanon riq'uin ri Ajaf Jesús ri xkujeruc'utu' junan iviq'uin chuvech ri Dios.* 15 Roma ronojel ri nikak'asaj pa kac'aslen, xa roma yixkajo' rix,* richin quiri' más eq'uiy ye'ilo ru-favor ri Dios, y quiri' más eq'uiy xqueyo'on matiox* che ri Dios richin nuc'ul ruk'ij.
16 Romari' man juba' caca' kac'u'x* nika'an-ka, masque ri ka-cuerpo ri kac'uan vacami xa nirijix benak, jac'a ri ka-espíritu* xa k'ij-k'ij más nic'uje-e ruchuk'a'. 17 Roma ri juba' k'axomal* re nikak'asaj ri xa cha'anin* nik'ax, k'ij-k'ij más nutz'akatisaj ri kak'ij ri xtic'uje' richin jumul. 18 Roma ri kánima man pa ruvi' ta ri yetz'etetaj choch'ulef benak-vi, xa pa ruvi' ri man yetz'etetaj ta.* Roma ri yetz'etetaj, xa ronojel yeq'uis, jac'a ri man yetz'etetaj ta, erichin jumul.
* 4:1 2 Co. 3:6. * 4:2 1 Ts. 2:3. * 4:3 Is. 6:9. * 4:4 Jn. 12:31. * 4:4 Is. 6:10. * 4:5 1 Co. 9:19. * 4:6 Gn. 1:14-18; Sal. 27:1; 1 P. 2:9. * 4:6 Jn. 1:9; 8:12. * 4:7 2 Co. 5:1. * 4:7 1 Co. 2:5; Ef. 1:19. * 4:8 2 Co. 7:5. * 4:9 1 Co. 4:12. * 4:10 Gá. 6:17. * 4:11 Ro. 8:36. * 4:13 Sal. 116:10. * 4:14 Is. 26:19; Jn. 11:25, 26; 1 Co. 6:14; 15:20; 1 Ts. 4:14. * 4:14 2 Co. 5:1. * 4:15 2 Co. 1:6. * 4:15 2 Co. 1:11. * 4:16 2 Co. 4:1. * 4:16 Ro. 7:22. * 4:17 Hch. 20:23. * 4:17 Sal. 30:5; Is. 54:8. * 4:18 Ro. 8:24; 2 Co. 5:7.
☰