☰ 2 JUAN 1
Ri ruca'n carta ri xutz'ibaj can ri apóstol San Juan
1
Ri Juan nuchop tzij
1 Yin Juan, ri uc'uey* quichin ri kach'alal, nintek c'a el re carta re' chave rat vach'alal ri at cha'on roma ri Dios. Nintek c'a el rutzil-quivech ri aval. Can kitzij yixinvajo'.† Y man xe ta yin ri yinajovan ivichin, xa can yixcajo' chuka' conojel ri ch'aka' chic ri quetaman chic ri kitzij. 2 Y roma c'o ri kitzij ri pa tak kánima, romari' nikajovala-ki'. Y ri kitzij xtic'oje' c'a kiq'uin richin jantape'. 3 Y ri utzil, ri joyovanic y ri uxlanen ri petenek chila' riq'uin ri Dios Tata'ixel y riq'uin chuka' ri Ajaf Jesucristo ri Ruc'ajol ri Dios Tata'ixel, jari' ri xtic'oje' ri pa tak ivánima.‡ Can xtic'ul-vi c'a ronojel re', roma icukuban ic'u'x riq'uin ri kitzij y roma chuka' ri yixajovan.
4 Yin janíla quicoten xuya' pa vánima tok xenvil chi ri ch'aka' chique ri aval cojkan ri kitzij,§ can achi'el nubij ri Katata' Dios chike chupan ri ruch'abel. 5 Y vacami vach'alal, ninchilabej c'a chave chi tabana' ri nubij ri Dios, chi can tikajovala-ki'. Y re tzij re' man c'ac'a'* ta. Xa can jare' ri chilaben-pe chike tok xkanimaj ri Dios. 6 Y vi can ja ri yerubij ri Dios ri yekaben, can nikajovala-ki'.† Roma rija' nubij chi can tikajovala-ki'. Y rix ivetaman chi queri' nubij, roma xivac'axaj yan pe tok xinimaj ri Dios.
Can ec'o-vi k'olonela'
7 E q'uiy c'a k'olonela' yebiyaj chuvech re ruvach'ulef ri yebin chi ri Jesucristo tok xpe vave' chuvech re ruvach'ulef man xoc ta achi'el roj vinek. Y ri nibin queri' chirij ri Jesucristo, jac'ari' ri k'olonel ri netzelan richin ri Cristo‡ y nuben chi can ja rija' ri Cristo. 8 Jac'a rix ri jebel isamajin-pe ri Dios, tichajij c'a ri ic'aslen, richin queri' man ta xtisach can juba' chire ri lok'olej sipanic§ ri xtic'ul roma ri isamaj. Can ta tz'aket tok xtic'ul.
9 Ec'o vinek ri niquibij chi c'o más etamabel quiq'uin chirij ri tijonic richin ri Cristo, y xa man que ta ri'. Roma rije' xa pa ruq'uexel yejel-apo riq'uin ri Cristo, xa ye'el-el riq'uin. Re yebin c'a quere', manek c'a ri Dios quiq'uin. Jac'a roj ri man nikaya' ta can ri tijonic ri richin ri Cristo, can c'o ri Tata'ixel y ri C'ajolaxel kiq'uin. 10 Vi c'o jun xtapon chi'ivachoch y man ja ta ri tijonic* richin ri Cristo ri ruc'uan-apo chive, man c'a tic'ul ni man tibij chuka' el chire: Ri Dios xtito'on avichin. 11 Roma vi xtic'ul y xtirayij ronojel utzil pa ruvi', can xtivejkalej† chuka' rix ri itzel tak rubanobal ri jun ri'.
Ri ruq'uisibel tak ch'abel
12 Y c'o q'uiy ri ninvajo' ninbij chive.‡ Pero man ninvajo' ta nintz'ibaj más chupan re carta re'. Roma can ninrayij yinapon na iviq'uin richin c'ari' ninbij chive, richin queri' ri kánima can ta quicoten nuna'.§
13 Ri e ral ri avach'alal niquitek-el rutzil-avech. Re avach'alal re' can cha'on-vi roma ri Dios. Can que vi ri'.
* 1:1 1 P. 5:1. † 1:1 2 Ts. 2:13; 1 Jn. 3:18. ‡ 1:3 1 Ti. 1:2; Ap. 1:4. § 1:4 3 Jn. 3. * 1:5 1 Jn. 2:7, 8. † 1:6 Jn. 14:15, 21; Ro. 13:8; 1 Jn. 2:24; 5:3. ‡ 1:7 1 Jn. 2:22. § 1:8 He. 10:32, 35. * 1:10 Ro. 16:17; Ga. 1:8, 9. † 1:11 1 Ti. 5:22. ‡ 1:12 3 Jn. 13. § 1:12 Jn. 15:11.
☰