☰ APOCALIPSIS 9
9
1 Y can jac'ari' tok ri ruvo' (ro') ángel xuxupuj ri ru-trompeta, y xintz'et c'a chi c'o jun achi'el ch'umil ri xtzak-pe chila' chicaj y chuvech ruvach'ulef xka-vi. Y pa ruk'a' c'a rija' xjach-vi ri llave richin ri itzel jul ri ruyon k'eku'n rupan.* 2 Ri jun c'a achi'el ch'umil ri', xberujaka-pe ri ruchi' ri itzel jul ri k'eku'n rupan. Y chupan c'a ri jul ri' xbe'el c'a pe janíla sib, achi'el xa ta ri jul ri' jun ta nimalej horno. Ri sib c'a ri xbe'el-pe ri chiri' chupan ri itzel jul ri k'eku'n rupan, xutz'apej c'a ruvech ri k'ij,† y xunojisaj ri caj. 3 Y chupan ri sib ri' xebec'ulun c'a pe sac',‡ y xebe pa ruvi' ri ruvach'ulef. Y xban c'a chique ri sac' ri' chi xe'oc achi'el ri alacrán, roma can niquiben-vi ch'a'oj achi'el niquiben ri alacrán. 4 Y xbix c'a chique chi man tiquiben§ ch'a'oj chique ri che', ri tico'n o ri k'ayis.* Pero tiquibana' ch'a'oj chique ri vinek ri manek quetal nic'aj-quivech,† roma xa can man e richin ta ri Dios. 5 Pero man richin ta chi yequicamisaj ri vinek, xaxe richin chi yequiya' pa k'axomal vo'o' ic'. Y ri k'axomal c'a ri', can achi'el c'a ri k'axomal ri niquiya' ri alacrán tok niquiti' can (niquich'op can) jun vinek. 6 Y je k'ij c'a ri' tok ri vinek xtiquicanola' ri quicamic roma ri k'axomal ri niquic'ovisaj, pero xa man jun c'a xtiquic'ulvachij. Can janíla vi c'a xtiquirayila' ri quicamic,‡ pero ri camic xa xtanmej chiquivech.
7 Y ri quibanic c'a ri sac' ri',§ achi'el ri quiej ri banon chic el cutzil richin yebe pan oyoval. Ri pa quijolon (quivi') quic'uan c'a jun achi'el corona ri can achi'el k'anapuek nitzu'un, y ri quipalej can achi'el c'a quipalej vinek. 8 Can c'o c'a chuka' rusmal quivi' achi'el ri rusmal quivi' ri ixoki'. Ri quey achi'el quey ri coj.* 9 Ri quij can achi'el c'a ch'ich'. Ri quixic' can janíla c'a nik'ajan, achi'el yek'ajan e q'uiy carruajes e kiriren coma quiej y junanin e benek richin yebe pan oyoval.† 10 Ri quijey achi'el ri quichin ri alacrán, y chutza'n c'o ri quich'utal. Y riq'uin ri quich'utal ri' yetiquir c'a yequiya' pa k'axomal ri vinek, vo'o' ic'. 11 Y ri qui-rey‡ ri sac' ri', ja ri ángel ri rajaval ri itzel jul ri k'eku'n rupan. Ri qui-rey ri sac' ri' Abadón c'a nibix chire ri pa kach'abel roj israelitas, y Apolión c'a nibix chire ri pa quich'abel ri vinek aj-Grecia.
12 Xk'ax c'a re jun ruc'ayeval re',§ pero c'a c'o chic ca'i' yecanej can.
13 Y tok ri ruvak (ruvakak) ángel xuxupuj ri ru-trompeta, xinvac'axaj c'a jun ch'abel ri xel-pe ri chiquicojol ri caji' uc'a' ri ec'o chire ri altar banon riq'uin k'anapuek,* ri altar ri c'o-apo chuvech ri Dios. 14 Y ri ch'abel ri' xubij c'a chire ri ruvak (ruvakak) ángel ri xxupun ri trompeta: Que'asolo' c'a ri caji' ángeles ri e ximil can chuchi' ri nimalej raken-ya' Eufrates,† xuche'ex.
15 Y que c'a ri' tok xebesol can ri caji' ángeles, richin yequicamisaj ri vinek. Roma ri caji' ángeles ri' can e yacon c'a richin ri hora, ri k'ij, ri ic' y ri juna' ri'. Y jubama nic'aj chique ri vinek ri ec'o chuvech ri ruvach'ulef ri xquequicamisaj. 16 Y ri caji' ángeles ri', can e janíla c'a achi'a' richin oyoval ec'o quiq'uin y can que c'a chuka' ri' ri quiej.‡ Can yejinin. Y c'ari' yin Juan xinvac'axaj c'a chi ri achi'a' richin oyoval, ec'o c'a ca'i' ciento millones. Y can que chuka' ri' ri quiej ec'o quiq'uin.
17 Y can chupan c'a ri achi'el vachic' ri xinben, chiri' tok xentz'et ri quiej.§ Y ri e ch'ocolbeyon ri quiej ri', e quicusalon c'a ch'ich' ri niquitobej ri ruva tak quic'u'x, y ri ch'ich' ri' quek, k'en y azul c'a ri yetzu'un. Ja chic c'a ri quiquiej man choj ta rujolon (ruvi') quiej, xa achi'el ri quichin ri coj,* queri'. Y k'ak', sib y azufre ri nel c'a ri pa tak quichi'. 18 Y can jac'a ri k'ak', sib y azufre ri ye'el ri pa tak quichi' ri quiej, jari' ri xeq'uison jubama nic'aj chique conojel ri vinek ri ec'o chuvech ri ruvach'ulef. 19 Re quiej c'a re', ja ri quichi' y ri quijey† ri yebanon ch'a'oj, roma ri pa quichi' nel k'ak', sib y azufre. Y ri quijey achi'el cumetz, roma can riq'uin chuka' ri' niquiben-vi ch'a'oj.
20 Jac'a ri vinek ri c'a xec'ase' na can y man xka' ta ri ruc'ayeval pa quivi', can man c'a xtzolin ta pe quic'u'x. Xa can c'a xequibanala' na ri itzel tak banobel.‡ C'a xequiyala' na quik'ij ri itzel tak espíritu,§ xequiyala' na quik'ij ri vachibel ri e quibanon* riq'uin k'anapuek, sakipuek, abej, che' y riq'uin ri ch'ich' nibix bronce chire. Jari' ri xequiya' quik'ij ri vinek ri', y xa e dios ri man yetzu'un ta, ni man ye'aq'uex ta y ni man yebiyin ta chuka'. 21 Man xtzolej ta c'a pe quic'u'x ri vinek ri' riq'uin ri Dios, richin xequiyala' ta can ri camisanic, ri itz y ri elek', y richin ta chuka' chi ri achi'a' y ri ixoki' ri niquicanola-qui' richin yemacun, xquimestaj ta can, pero xa man que ta ri' xquiben.
* 9:1 Ap. 17:8; 20:1. † 9:2 Jl. 2:2, 10. ‡ 9:3 Ex. 10:4. § 9:4 Ap. 6:6; 7:3. * 9:4 Ap. 8:7. † 9:4 Ez. 9:4; Ap. 14:1. ‡ 9:6 Job 3:20-22; 7:15; Is. 2:19; Os. 10:8; Ap. 6:16. § 9:7 Jl. 2:4. * 9:8 Sal. 57:4; Jl. 1:6. † 9:9 Jl. 2:5. ‡ 9:11 Jn. 8:44; 12:31; 14:30; Ef. 2:2; 2 Ts. 2:3-10. § 9:12 Ap. 8:13. * 9:13 Ex. 30:3; Ap. 8:3. † 9:14 Gn. 2:14; 2 S. 8:3; Jer. 51:63; Ap. 16:12. ‡ 9:16 Ez. 38:4. § 9:17 Is. 5:28. * 9:17 1 Cr. 12:8. † 9:19 Is. 9:15. ‡ 9:20 Dt. 31:29; 2 Cr. 28:22; Jer. 5:3. § 9:20 Dt. 32:17; Sal. 106:37. * 9:20 Sal. 115:4; Is. 2:8; Jer. 44:8; Dn. 5:23; Hch. 17:29.
☰