3
Te junihe mwomwon ana e pwo wo Padué
1 Kona ade aceli piwéden ne ko pa *Juif koja ni béén? Kona te junihe pwonaado ne ko a *tegoop?
2 Éa, te junihe wâé ne kon, ne he ni naado na hiwon. Be wo Padué, ke e mi ne te lépwo Juif a pwooti ten, beme lé wéihi.
3 Hemepie ce béé Juif, ke me time lé uce cile nina lé caa te mi pii ânebun, ke kona wo Padué, ke time e o uce cile nina e caa te mi pii ânebun?
4 Uhuu! Be mepie lé gele ne ni apulie, kehe e te mwomwon wo Padué, ke e te penem ha a juuju. Be caa te tii ne he ni tii iitihi pie:
Me go cihe, [go Padué]
ke go cihe ha a juuju.
Lé o tai temehi a pwooti tem.
Mepie lé tautiko, ke go te piwéden
koja nina lé tautiko.
Psaume 51.6
5 Mepwo é ne ko ni huô tenye na ta, ke lé habwii pie, te tice ta ko Padué. Ke é mu ko anaa, ke lé pii ne ni béén pie: «Time uce wâé, hemepie e pwocuhinaado tenye wo Padué, [be ni huô tenye na ta, ke e habwii a bwo wâé nang]!»
6 Ûhu! Be hemepie time e uce mwomwon wo Padué, ke kona e o woté ko ace bwo tauti ni apulie pwo bwohemwo?
7 [Ke wieli go niimihi pie]: ‘É mu ko a gele tong, ke me e tuiebeele a juuju te Padué, ke me e habwii *a wâé ten, ke é ko ade na e mwo tee pwocuhinaado tong?’
8 [Ûhu. Go nemwo pii anaa. Be te pwohewiin] heme nye pii pie «Genye pwo ana ta, beme e wie a wâé.»
Kehe pwo ni béén na lé pipé ne kome pie, geme pii anaa. Ke lé te ju hane me lé pwocuhinaado.
Te tice pace céiu apulie celi e mwomwon
9 Genye o pii pie woté, ne ko wogeme lépwo Juif? Kona geme piwéden koja ni béén [ne he pwahamii Padué]? Ûhu! É caa habwii tewé pie: wo lépwo Juif me lépwona time lé uce Juif, ke lé tai mu ha a pihuô te a ta.
10 Be caa te tii ne he ni tii iitihi pie:
Te tice pace céiu apulie
celi e mwomwon
ne he pwahamii Padué.
Te tice paceli te ju céiu nang!
11 Te tice pace céiu apulie
celi e hane a juuju.
Te tice paceli e hane Padué!
12 Lé te tai jéilé ne ko Padué,
be tai ni apulie na ta jélé.
Te tice paceli e pwo aceli wâé.
Te tice paceli te ju céiu nang!
Psaume 14.1−3
13 Me lé cihe, ke te junihe ta;
be piapwong ni upehelé.
Ke lé pipwohuô te ni béén.
Psaume 5.10
Ni pwooti na lé pii,
ke mucenihi ni apulie.
Be e pwolé a tabepwo ni bwien.
Psaume 140.4
14 Ubwo a apwohi ne pwolé,
ke cunu genye ko ni bwo cihe telé.
Psaume 10.7
15 Lé te ju téte,
me lé â taunuhi apulie.
16 É he na lé â lang,
ke lé pwotahinaado.
17 Time lé uce temehi
a pwaadeni a péém.
Ésaïe 59.7−8
18 Be time lé uce paciiti Padué.
Psaume 36.2
19 Mepwo é ne ko ni patén, me ni pwooti na e hen, ke e mi ti ko lépwona e ne me delé ni patén, [wo lépwo Juif]. E habwii ati ni huô te ni apulie, na time uce *mwomwon ne he pwahamii Padué, ke e bo tautilé kon. Ke o te tice pace céiu apulie pwo bwohemwo celi jan me e pipwopain.
20 Be te tice pace céiu apulie celi me e pii pie, mwomwon nang ne he pwahamii Padué, ko ace bwo piténedehi nen den ni patén. Be a ju penem de ni patén, ke me lé temehi ne ni apulie pie, woélé ke ta jélé.
genye mwomwon mu ko a céihi tenye
(Pwahamii tii: 3.21―5.21)
21 É jenaa ni, ke e caa habwii wo Padué a bwopwonen, me genye mwomwon ne he pwahamiin. É he e te pwo, ke te tice patén. Be ni *patén de Moosé, me ni pwooti te lépwo péroféta, ke lé te ju *pajuujuhi cehi nina e pwo wo Padué.
22 Be wo Padué, ke e pwo me lé mwomwon ne ni apulie mu ko a céihi telé ne ko Iésu Kériso. Ke e te pwo te ati ni apulie na lé céihi ne ko Kériso, be te tice pipwoinen hadeniilé.
23 Be nye tai pwo nina ta, ke tai wogenye ité koja a wâé te Padué.
24 Ke wo Padué, ke é mu ko a *pipwoééhe tice ja kon den, ke e ne tenye a âpipati na wonaa: [a péém na e ne ha awiemenye me weeng. Ke e ne me pwohewiin heme time nye mu uce pwo celi ta] beme wogenye ni apulie na nye mwomwon ne he pwahamiin. Anaa, ke a âpipati ten ne tenye, na e pwaadeniin bé wo Kériso Iésu, pana e tuwokenye koja nina ta.
25-26 Ke e ne Kériso, beme e *âpwailo me denye. É mu ko a cewéhe Kériso, ke e pineuhi ni ta pwo tenye, wogenye nina nye céihi ne kon. Ke weengaa a béhabwiinen pie, mwomwon nina e pwo wo Padué, ânebun ke é jenaa. Be é ânebun, ke e te picani ne konye, ke time e uce pwocuhinaado tenye ko ni ta pwo tenye. Ke é jenaa, ke e pwo me nye mwomwon ne he pwahamiin, wogenye nina genye céihi ne ko Kériso.
E pajuujuhi ni patén na a céihi tenye
27 É mulang, ke o te tice watihen me nye pipii denye, ke o te piticenaado ne ko a bwo piténedehi ne ni patén. Be ana a junaado, ke a céihi.
28 Be é pii tewé pie: Wo Padué, ke e pwo me nye mwomwon ne he pwahamiin, mu ko a céihi tenye. Kehe time uce é mu ko a bwo pacuwohi nen denye ni patén.
29 Woté, [go niimihi pie] wo Padué, ke te Padué he lépwo Juif cehi? Ke kona time uce Padué he ce béén mwo? Uhuu, be Padué he a bwohemwo ati!
30 Be te céiu cehi Padué. Ke weeng pana e bo pwo me lé mwomwon ne he pwahamiin wo lépwo Juif, mu ko a céihi telé. Ke weeng mwo, na e bo pwo me lé mwomwon ni béé puapulie, mu ko a céihi telé mwo.
31 Kehe icehi ana nye nemwo niimihi pie, piticenaado ne ko ni patén, wonaa mu ko a céihi tenye. Ûhu! Time uce wonaa! Be a céihi tenye, ke e *pajuujuhi ni patén.