MARKA
Marka Nganmi Jesuh Khrih ih Thuthangṭha
Thuhmaṭhi
Thukam Thar sungah Jesuh Khrih ih thuanthu ngankhummi cabu pali lakah Marka Nganmi Jesuh Khrih ih Thuthangṭha khaw hi a tel ve. Cuvai cabu pali pawl cu “thuthangṭha” tiah kawh an i. Jesuh ih thih hnukah Matthai, Marka, Luka le Johan pawl ih nganmi an i. Marka ih nganmi Thuthangṭha hi thuthangṭha cabu pali lakah a tawibik mi cabu a i. Thuthangṭha cabu pali lakah Marka ih nganmi Thuthangṭha hi hmasabik ih nganmi a i ih Khrih ih suah hnuk kum 65–70 karlak hrawngah nganmi a i, tiah zupnak a um. Rome khua ih a ummi Khristian pawl thazang pek ding tumtahnak thawn, Rome khua ah nganmi a i thok tiah Baibal thiam tampi nih zupnak an nei.
Marka hi Johan Marka tiakhaw an ko ih forhthlah Paul le Barnabas pawl thawn rualpi fa an i ih mission ṭuanṭuan in khual khaw an tlawn khat. Asinain an khualtlawnnak lamlak in Marka nih a kir ta hnei (Forh 13.13). Neta ah, Barnabas thawn khual an tlawn khat leh sal (Forh 15.37–39). Cun Marka hi Peter thawn khaw rualpi ṭha an i (1 Pet 5.13). Marka hi ama rori nih Jesuh hmutu le a thuzirhmi theitu a i lo na in, Peter ih zirhnak pawl a ngankhum colh ih cucu Thuthangṭha cabu a ngan theinak hrampi a si thok, tiah Baibal thiam pawl nih, zupnak an nei. Marka ih nganmi Thuthangṭha cabu sungah, Marka nih, dungthluntu sihnak le can neta thu thawn pehpar in Jesuh ih zirhmi pawl cu thupi ngai ih a nganmi cabu a i.
Thutlangpi
1. Thuthangṭha hramthoknak (1.1–13)
2. Cule, Marka nih Jesuh Galilee a um lai ih a ṭuanṭuannak a ngan (1.14—8.21)
3. Cun, Marka nih Jerusalem ih Jesuh khualtlotnak a sim (8.22—10.52)
4. Marka nih Jesuh ih thihnak le thawhsalnak pawl tel in, Jerusalem ih a um lai thuhla thawn a ne ter (11.1—16.8)
1
Baptisma Petu Johan ih Thusipnak
(Matthai 3.1–12; Luka 3.1–18; Johan 1.19–28)
1 Pathian Fapa, Jesuh Khrih ih Thuthang Ṭha ih hramthawhnak cu hitih in a si.
2 Profet Isaiah ih nganmi mangin:
“ ‘Zohhnik, na hmai ah ka palai ka thlah thok,
Ani nih na zalam a timtuah thok.’
3 Ramṭhing ih mi pakhat hehnak aw nih,
‘Bawipa ih zalam timtuah uh;
A zalam cu dingter uh,’ a ti.”
4 Baptisma petu Johan cu ramṭhing la in a ban ih, sual ngaihthiamnak hrangah sirfaknak baptisma thu a sim. Ani nih mipi pawl sinah, “Nan sual sir uh la baptisma la uh. Cun Pathian nih nan sual pawl nan ta ngaihthiam thok,” tiah a ti.
5 Cun Judea peng pumpi le Jerusalem mi zate pawl cu a sinah an feh. An sualnak pawl an phuang ih Johan hmangin Jordan tikua ah baptisma an co.
6 Johan cu kalauk hmul ih tuahmi hnipuan a hru ih a tai ah saphaw taikap a kap. Cun khabawk le hramlak khuailawti cu caw ah a ei.
7 Cun, a thusipmi cu, “Ka dungih a tiang dingmi pa hi kei nakin a picang sawn, a hmai ah kun pit in a kedap hri phoihsaktu ding hmanah kei cu ka tlak lo.
8 Kei cu ti in baptisma nan ta pe; asinain ani cu Thlarau Thianghlim thawn baptisma nan ta pe thok,” tiah a i.
Jesuh ih Baptisma le Tukforhnak
(Matthai 3.13—4.11; Luka 3.21–22; 4.1–13)
9 Cuvai ni ah Jesuh cu Galilee peng Nazareth khua in a ban ih Johan hmangin Jordan tikua ah baptisma a la.
10 Cun Jesuh cu ti sungih a hang suah cangka in van a hong fa ih Thlarau cu thute mangin a tlunih a rong ṭum cu a hmu.
11 Cun van in aw pakhat nih, “Nang cu ka duhdawt ngaimi ka Fapa na si, na cungah ka lung a kim setak,” tiah a ti.
12 Hmakhatte ah Thlarau nih Jesuh cu ramṭhing ah a ṭhita.
13 Cun cuvai hmun ah ni sawmli a um ih Seihtan nih a tukforh. Ramsa pawl thawn an um ih vancungmi pawl nih an tuamhlawm.
Jesuh nih Nga Tlaitu Pali A Ko
(Matthai 4.12–22; Luka 4.14,15; 5.1–11)
14 Johan thawng an thlak hnukah Jesuh cu Galilee peng ah a feh ih Pathian ih Thuthang Ṭha a sim.
15 Jesuh nih, “Tikcu a kim i ih Pathian uknak a nai i! Nan sual sir u la Thuthang Ṭha cu zum uh!” tiah a sim.
16 Jesuh cu Galilee Tili kap ih a feh laiah, Simon le a unaupa Andru cu nga tlaitu an ih ruangah, tili sungah sur an vorh berbo lai a hmu hnei.
17 Cun Jesuh nih an sinah, “Ka thlun uh, cule minung tlaitu ah nan ta tuah thok,” tiah a ti hnei.
18 Hmakhatte ah an ni nih an sur pawl an ramta ih a dung an thlun.
19 Cun Jesuh cu a hlat deuhnak ah a feh ih, Zebedi ih fapa James le a unaupa Johan lawng sungih an sur pawl an rep berbo lai a hmu hnei.
20 Hmakhatte ah Jesuh nih a ko hnei ih, an pa Zebedi cu an tlakfa pawl thawn lawng sungah an ramta ih a dung an thlun.
Thlarau Sia ih Molhmi Pa
(Luka 4.31–37)
21 Jesuh le a dungthluntu pawl cu Kapernaum khua ah an feh, a zingla Sabbath ni ah Jesuh cu Sinakok ah a lut ih thuzirh a thok.
22 A thuzirhmi ah an mang a bang, zangahtihle Daanthiam pawl mang i lo in, ani cu thuneitu pakhat mangin a zirh.
23 Cuvai can ah thlarau sia ih molhmi pa pakhat cu Sinakok sung ah a tiang ih,
24 “Nazareth mi Jesuh, zangtu ah kan na ṭul? Kan na siatsuah dingah maw na tiang? Hu na si tih ta fiah — nang cu Pathian ih mi Thianghlim Pakhat na si,” tiah a hek.
25 Cun Jesuh nih cupa cu, “Daite in um, cupa ih sung in suak!” tiah a tai.
26 Thlarau sia nih cupa cu thangai in a caihter ih thangngai a heh hnuk ah, cupa ih sung in a suak.
27 Cun an zatein an mangbang colh ih, “Aimang thil cu zangtih in a i? Zirhnak thar maw a i? Thlarau sia pawl hman thuneihnak thawn thu a pe hnei ih a thu an thlun!” tiah pakhat le pakhat an sutfa.
28 Cutin Jesuh ih thuhla cu hmakhatte ah Galilee peng zate ah a thang colh.
Jesuh nih Mi Tamngai A Damter
(Matthai 8.14–17; Luka 4.38–41)
29 Jesuh cu Sinakok ih a suah cang in Simon le Andru teiʼ inn ah James le Johan thawn an lut.
30 Simon nupi ih nu cu khurhfah in a fak ih a it; Jesuh a tian cang in cuvai thu cu an sim lohli.
31 Jesuh cu a sin a va feh ih a kut in a han tho. A khurhfahnak cu a dam ih a tuamhlawm hnei.
32 Ni a pil ih simla a tian tikah, mi fak pawl le thlarau sia ih molhmi pawl hmahhmah cu Jesuh sinah an tianpit.
33 Cun an khawpawh in cuvai inn suahka hmai ah an hmuakkhawmfa.
34 Jesuh nih fahnak phunphun ih a fakmi pawl a damter, cule khawsia tamngai khaw a dawisuak hnei. Khawsia pawl cu ṭon a sian hnei lo; zangahtihle hutu a si tih an fiah.
Galilee ah Jesuh Thu A Sim
(Luka 4.42–44)
35 Zingmaw khawvang hlan ah Jesuh cu a tho ih inn leng ah a suak. Thawngṭhingnak hmun ah a feh ih thla a cam.
36 Simon le a rualpi pawl nih Jesuh cu an hrawl,
37 an hmuh tikah, “Mi hmahhmah nih ta hrawl eng,” tiah an sim.
38 Jesuh nih, “Khua kiangkap dang ah feh uh sing. Thu ka sim hnei thok. Zangahtihle cucu ka tiannaksan a i,” tiah a sawn hnei.
39 Cun Galilee peng hmahhmah ah a feh ih an sinakok pawl ah thu a sim ih khawsia pawl khaw a dawisuak.
Jesuh nih Miphar Pakhat A Damter
(Matthai 8.1–4; Luka 5.12–16)
40 Miphar pa pakhat cu Jesuh sin a feh ih, khuk bil in bopnak a hler ih, “na duh ah cu, ka na thiangter thei,” tiah a ti.
41 Jesuh nih a thinfak ih a kut dawh pit in a tham. Cule a sinah, “Ta ka thianter ka duh, thiang i,” tiah a ti.
42 Hmakhatte ah a pharfah a dam ih a thiang.
43 Jesuh nih fak ngai in ralrinnak a pe ih a hlatnak ah a fehter lohli,
44 Cun a sinah, “Ngai hnik! Hutu sinah zangkhaw sim hlah. Cunakin puithiam sinah va feh cih la tak zohfel seh; mi hmahhmah nih na dam tihmi an fiahnak dingah Moses ih thupekmi mangin mithiang na sihnak dingah thawinak pe,” tiah thu a pe.
45 Sikhawsehla cupa cu a feh ih a damnak thu cu duhsah ngaiin a sim ih khawhra a thang. Curuangah Jesuh cu mi ih hmuhhngan in khaw sungah a lut thei i lo. Khaw lengah a um ih a sinah hmunzakip in mi nih an pha.