1 Lon ena fansoun Moses a foleni epwi pwiin sip nöün semen pwülüan we itan Setiro ewe souasoren Mitian. A emwenala folenian sip lotoun ewe fanüapö o tori ewe chukun Kot itan Horep. 2 Iwe, ewe chon läng nöün ewe Samol mi Lapalap a pwä ngeni Moses lon pulopulen ekkei seni lon efoch iräfölüföl. Lupwen Moses a neneloi, a mefi pwe ewe irä a pulopul, nge esap karala. 3 Iwe, a apasa, “Üpwe feila ikenan o atola ei metoch mi amwarar, pun pwota enan iräfölüföl esap karala?” 4 Lupwen ewe Samol mi Lapalap a küna pwe Moses a feila ikenan, a kökköwu me lon ewe iräfölüföl, “Moses, Moses!” Moses a pälüeni, “Ngang iei.” 5 Iwe, Kot a apasa, “Kosap arapoto. Kopwe pwilitawu ipwom sus, pun ei leni ka ütä won a pin.” 6 A pwal apasa, “Ngang än om kewe lewo Apraham, Isaak me Jakop we Kot.” Iwe, Moses a pwölü mesan, pun a niuokus an epwe nenengeni Kot.

7 Mürin, ewe Samol mi Lapalap a apasa, “Üa küna riaföün nei aramas mi nonom Isip o rongorong ar siö pokiten än chon Isip nemenemengau ngeniir, üa pwal silei ar weires meinisin. 8 Iwe, üa feitiu pwe üpwe angaseer seni chon Isip, üpwe pwal emwenirewu seni ewe fanü o emwenirelong lon eu fanü mi öch o watte, eu fanü mi pwülüöch o fanüeräs, fanüen chon Kanaan, chon Hit, chon Amor, chon Peris, chon Hiw me chon Jepus. 9 Iei än ekewe aramasen Israel siö a toriei, üa pwal küna ar riaföü me ren chon Isip. 10 Etto, üpwe tinukela ren Farao pwe kopwe emwenawu nei kewe aramasen Israel seni lon Isip.” ✡ 11 Nge Moses a üreni Kot, “Ngang iö pwe üpwe tongeni feila ren Farao o emwenawu ekewe aramasen Israel seni lon Isip?” 12 Iwe, Kot a pälüeni, “Ngang üpwe etuk. Ei epwe eu asisil ngonuk pwe ngang üa tinuk: Are ka emwenawu ekewe aramas seni lon Isip, epwe fis pwe oupwe fel ngeniei won ei chuk.”

13 Mürin, Moses a kapas ngeni Kot, “Nge ika üpwe churi ekewe aramasen Israel o üreniir, ‘Än ämi kewe lewo we Kot a tinieito remi,’ nge ir repwe aisiniei, ‘Ifa itan?’ iwe, met üpwe pälüeni ngeniir?” ✡ 14 Nge Kot a üreni Moses, “Ngang ngang echök. Iei usun mine kopwe üreni ekewe aramasen Israel, ‘Ewe mi iteni Ngang a tinieito remi.’ ” ✡ 15 Iwe, Kot a pwal üreni Moses, “Kopwe kapas ngeni ekewe aramasen Israel: Ewe Samol mi Lapalap, än ämi kewe lewo Apraham, Isaak me Jakop we Kot a tinieito remi. Iei itei tori feilfeilachök, nge ren ei it oupwe chechemeniei seni eu täppin aramas tori eu täppin. 16 Iwe, kopwe feila o achufengeni ekewe souakomwen Israel, kopwe üreniir: Ewe Samol mi Lapalap, än ämi kewe lewo Apraham, Isaak me Jakop we Kot a pwä ngeniei o üreniei, ‘Üa nenengenikemi o küna mine a fis ngenikemi lon Isip. 17 Iwe, üa pwon ngenikemi pwe üpwe emwenikemiiwu seni lon Isip, ewe leni ia oua riaföü ie, o emwenikemiilong lon fanüen chon Kanaan, chon Hit, chon Amor, chon Peris, chon Hiw me chon Jepus, eu fanü mi pwülüöch o fanüeräs.’ 18 Iwe, repwe aüselinga om kapas, mürin ämi me ekewe souakomwen Israel oupwe feila ren ewe kingen Isip o üreni, ‘Ewe Samol mi Lapalap än chon Ipru we Kot a churikem. Iei aia tüngor ngonuk pwe kopwe mwüt ngenikem pwe aipwe saila lon fanüapö ükükün ülüngat rän, pun aipwe asor ngeni äm we Kot ewe Samol mi Lapalap.’ 19 Nge üa fen silei pwe ewe kingen Isip esap mwüt ngenikemi pwe oupwe feila, tori eman mi manaman a pöchökül ngeni. 20 Iei mine üpwe aitiela pei o afeiengaua chon Isip ren ekewe manaman meinisin ngang üpwe afisätä lefiler. Mürin epwe mwüt ngenikemi pwe oupwe feila. 21 Üpwe pwal föri pwe ekewe chon Isip repwe ümöümöch ngeni ekei aramas, pwe lupwen oupwe feila, ousap feila fän asöülapö. 22 Iwe, ekewe fefin meinisin repwe tüngor seni chon arur me chokewe ra imweimw rer fout seni silifer me kolt, pwal üf, pwe oupwe foute ngeni nöümi ät me nengin. Iei usun oupwe angeala pisekin chon Isip.” ✡