37
Ewe pworofel a för
37.1-9
(Eks 25.10-22)
1 Iwe, Pesalel a föri ewe pworofel seni ewe irä akasia, langataman ükükün faik me limu inis, nge chölapan me tekian ükükün rüe me fisu inis.
2 A apacha ngeni kolt mi mürina lon me lükün o föri elingen ünükün me won seni kolt mi chipwechip.
3 Iwe, a föri fofoch ring seni kolt o apacheretä ngeni pwokukun me rüanü, ruofoch ring me epek, pwal ruofoch me epek.
4 Mürin a falei ämwär seni ewe irä akasia o apachätä kolt wor.
5 A sökalong ekewe ämwär lon ekewe ring mi pachetä lepekin ewe pworofel, pwe aramas ra tongeni ämwära.
6 A föri öppüngün seni kolt mi mürina, langataman ükükün faik me limu inis, nge chölapan rüe me fisu inis.
7 A pwal nechei uluulun ruoman kerop seni kolt won lesopun ewe öppüng me ruosop,
8 eman kerop won me esop, nge eman won me pwal esop. Iwe, ewe öppüng me ekewe kerop mi nom lesopun me ruosop ra chök förunusfengen.
9 Iwe, pöükässin ekewe kerop ra itila o meresila, pwe ra ochunoi won ewe öppüng, nge won meser ra sapefengen o wenetiu ngeni ewe öppüng.
Ewe chepel a för
37.10-16
(Eks 25.23-30)
10 Iwe, a pwal föri eu chepel seni ewe irä akasia, langataman ükükün ilik me wonu inis, chölapan ükükün engol me walü inis, nge tekian rüe me fisu inis.
11 Mürin a apacha ngeni kolt mi mürina o föri elingen ünükün me won seni kolt mi chipwechip.
12 Iwe, a pwal föri aamen won pwelin ünükün, tekian ükükün ülüngat inis, o föri och eling won seni kolt mi chipwechip.
13 A föri fofoch ring seni kolt o pacheretä ngeni pwokukun me rüanü ia ekewe fofoch pechen ra nom ie.
14 Ekewe ring ra kükü ngeni aamen ewe chepel, pun ekewe ämwär ra sökulong lor, pwe aramas ra tongeni ämwära.
15 Iwe, a falei ämwärin ewe chepel seni ewe irä akasia o apachätä kolt wor.
16 A pwal föri pisekin won ewe chepel seni kolt mi mürina: sepi me peleich, kap me rume fän iten ewe asoren ün.
Ewe lenien atittin a för
37.17-24
(Eks 25.31-40)
17 Mürin a föri eu lenien atittin seni kolt mi mürina, nge motongan me popun a auluul o nechenech ngeni ama. Iwe, elingan meinisin, ekewe uluulun pön irä me kirupun ra förunus me ewe lenien atittin.
18 A pwal wor wonofoch keangan ra keang seni ewe popun, ülüfoch me epek, pwal ülüfoch me epek.
19 Iwe, won eu me eu keangan a wor ülüpö uluulun pön irä usun chök pön ewe irä itan almont, nge iteiten pön irä a wor kirupun me fan. Ina usun lapalapen ekewe wonofoch keang mi keang seni popun ewe lenien atittin.
20 Nge won popun a wor fapö uluulun pön irä usun chök pön ewe irä almont, a pwal wor föföü kirupur.
21 Iwe, a wor äkääföü kirup a nom fän iteiten ekewe leni ia ekewe fofoch keang ra keang seni ie.
22 Nge ekewe kirup me ekewe keang ra förunus. Ina usun unusen ewe lenien atittin a för seni kolt mi mürina, a auluul o nechenech ngeni ama.
23 Iwe, a pwal föri fisu lamp fän iten ewe lenien atittin, ekewe fich me lenien mooch seni kolt mi mürina.
24 Ewe lenien atittin me pisekin meinisin a föriir seni ina epwe ükükün fik me limu paun kolt mi mürina.
Ewe rongen asoren ötuöt a för
37.25-28
25 Mürin a föri eu rongen asoren ötüöt seni ewe irä akasia, langataman me chölapan ra chök nönnöfengen ükükür engol me walü inis. Iwe, tekian ükükün ilik me wonu inis, nge mächän kewe fofoch ra förunusfengen me ewe rongen asor.
26 Iwe, a apacha kolt mi mürina ngeni won me lepekin meinisin, pwal ngeni mächän kewe, a pwal elinga ngeni kolt mi chipwechip ünükün me won.
27 A föri ruofoch ring seni kolt o apacheretä fän alingan we me epek. A pwal föri ina usun me epek, pwe ekewe ämwär ra sökulong lor, pwe aramas ra tongeni ämwära.
28 A falei ekewe ämwär seni ewe irä akasia o apachätä kolt wor.
Ewe löön epit me ewe apach mi pwokus ra för
37.29
(Eks 30.22-38)
29 Iwe, a pwal föri löön epit mi pin me apach mi pwokus usun chon föri lö ra föri.