27
Chon Israel ra ngasala o chufengensefäl
27.1-13
1 Lon ena fansoun ewe Samol mi Lapalap epwe apwüngü Lefiatan ewe serepenit mi süla, epwe apwüngü Lefiatan ewe serepenit mi tö rikirik ren nöün ketilas mi ken me pöchökül me manaman. Iwe, epwe pwal niela ewe trakon a nom leset.
2 Lon ena fansoun Kot epwe apasa, “Oupwe kölü ewe tanipin wain mi mürina.
3 Ngang ewe Samol mi Lapalap üa tümwünü, üa pwal achöchönü iteiten fansoun. Iwe, üa mamasa lepwin me lerän, pwe esap wor eman epwe atai.
4 Üsap chüen song ngeni ewe tanipin wain. Are iräfölüföl me pötöwölingau repwe mär, üpwe äteriir o kenirela meinisin.
5 Nge are chon oputa nei aramas ra mochen eäniei lenien op, repwe akomwen afisätä kinamwe ngeniei. Ewer, repwe fokun afisätä kinamwe ngeniei.
6 Lon fansoun epwe feito, ekewe chon Israel, ir ekewe mwirimwirin Jakop, repwe apwükü warer usun efoch irä, repwe fasar me sot, repwe pwal amasoua unusen fanüfan ren uar.
7 Ifa usun, ewe Samol mi Lapalap a afeiengaua chon Israel usun an afeiengaua chokewe mi afeiengaueer? Ika ifa usun, a niela chon Israel usun an niela chokewe mi nirela?
8 Ewe Samol mi Lapalap a apwüngü nöün aramas ren an mwüt ngeniir pwe repwe oola. A asürela ren an asepwäl mi pöchökül a enito seni ötiu.
9 Nge än chon Israel tipis epwe chök musala, are ra atai ekewe rongen uluulun anümwäl, pwe föür repwe wiliti pwül moromor, are ra pwal ataela ekewe uluulun ewe anüfefin Astarot, pwal ekewe rongen asoren ötüöt, pwe resap chüen nom.
10 Iwe, ewe telinimw mi pöchökül tittin a tala, a eu leni esap chüen so usun chök fanüapö. Ikenan kow ra kütta ener, ra kon o mongö fetilin ewe leni.
11 Ekewe aramas ra wewe ngeni palen ekewe irä mi pwas, ra kuputiu. Iwe, fefin repwe feito o rusifengeniir pwe repwe eäniir amüch. Pun ir eu mwichen aramas resap mirit. Iei mine Kot ewe mi föriir esap tongeäsiniir, esap pwal ümöümöch ngeniir.
12 Lon ena fansoun ewe Samol mi Lapalap epwe achufengeni nöün aramas eman ngeni eman seni ewe chanpupu Oifrat tori ewe öüwön Isip, usun eman a achufengeni föün wiich mürin an aimwüfeseni seni pön.
13 Iwe, lon ena fansoun efoch rappwa epwe pu pwe epwe köri chokewe mi oola lon ewe fanü Asiria me ewe fanü Isip, pwe repwe liwinsefäl. Repwe feito o fel ngeni ewe Samol mi Lapalap won ewe chuk mi pin lon Jerusalem.