Chru MATHIƠ 13

Pơgăp-Pơmơyơu Mư̆ng Lơgăr Yàng Pô Lơngì

1 Kŭng lăm hơrơi nư̆n, Yàng Jêsu tơbiă mư̆ng sàng, truh dò guh tơ gah ia-tơsì. 2 Buơl làng pơtòm-pơgùm gơŭ tòmdăr Pô lô biă, tơ̆l truh Pô păl trŭn lăm gơlài bloh dò guh; abih tơrpuơl buơl làng nư̆n dò dơ̆ng tơ gah ia. 3 Pô angui pơnuaĭ pơgăp-pơmơyơu bloh đờm pơto buơl guñu lô pơnuaĭ. Pô đờm:

“Hũ sa aràng mơnih tơbiă nau drà găr-pơjeh. 4 Lăm tŭ drà, hũ du găr lĕ rò gah jơlàn, c̆ĭm truh 'bơ̆ng abih. 5 Du găr pơkơ̆n lĕ iơŭ lăm anih lơ̆n pơtơu, la anih 'buh hũ lô lơ̆n, nư̆n tơmuh tơgồ mư, kơyoa lơ̆n 'buh dơrlăm. 6 Bloh tŭ ia-hơrơi tơgồ, kŏng pơđiă gruă, sơ̆ng kơyoa 'buh hũ akha, nư̆n păl mơtai thu. 7 Du găr pơkơ̆n lĕ iơŭ lăm puk druơi, druơi đì yùm, ngă tơ ñu mơtai bơrhăt. 8 Hũ du găr pơkơ̆n lĕ iơŭ lăm anih lơ̆n siàm, nư̆n tơbiă boh: sa găr tơbiă hũ sa rơtùh, sa găr tơbiă hũ năm pluh, halài sa găr tơbiă hũ klơu pluh. 9 Aràng sơi hũ tơnia, nư̆n păng bĕ!”

Kơđa Hơgĕ Yàng Jêsu Angui Pơnuaĭ Pơgăp-Pơmơyơu

(Mak 4:10-12; Luka 8:9-10)

10 Du mơnih tui-mơgru truh jĕ Pô, tơnia lài: “Kơđa hơgĕ Pô-Pơto angui pơnuaĭ pơgăp-pơmơyơu tô đờm sơ̆ng buơl guñu?” 11 Pô đờm lài: “Kơyoa buơl guhã nư̆n hũ brơi pơnuaĭ anĭt tô wờng-thơu du pơnuaĭ tơrđơŭ-dơrlăm Lơgăr Lơngì, bloh mư̆ng pơ-ơnah buơl guñu nư̆n 'buh hũ brơi thơu. 12 Kơyoa aràng sơi hũ, rơŭ hũ brơi pơtơ̆l wơ̆, sơ̆ng buơl guñu rơŭ hũ dơlah-dơlài; bloh mơnih lơi 'buh hũ, nư̆n găm pơnuaĭ buơl guñu hũ, kŭng rơŭ kŏng suă mă rơi. 13 Kơyoa nư̆n, Kơu angui pơnuaĭ pơgăp-pơmơyơu tô đờm sơ̆ng buơl guñu, kơyoa buơl guñu c̆ơ bloh 'bu 'buh, pơh tơnia păng bloh 'buh mơhư̆, sơ̆ng 'buh wờng hơgĕ. 14 Mư̆ng buơl guñu, nư̆n pơnuaĭ mơnih gơnuăr-hwơ̆r Êsai đờm hũ tơbiă iơŭ tơpă lài:

Buơl guhã pơh tơnia păng, bloh 'buh wờng,

Mă mơta c̆ơ, bloh 'bu 'buh hơgĕ.

15 Kơyoa hơtai-hơtiàn buơl làng ni hũ tơbiă jiơ̆ng kră-khăng;

Tơnia buơl guñu traŭ,

Mơta buơl guñu pì,

Huơĭ lài mơta buơl guñu 'buh jiơ̆ng,

Tơnia buơl guñu mơhư̆ jiơ̆ng,

Sơ̆ng hơtai-hơtiàn buơl guñu wă-wờng jiơ̆ng,

Bloh buơl guñu gài pơsơlih wơ̆,

Sơ̆ng Kơu rơŭ pơsồ-pơsaih tơ buơl guñu.” *

16 Bloh lơngai-pơtuah tơ mơta buơl guhã, kơyoa 'buh jiơ̆ng; lơngai-pơtuah tơ tơnia buơl guhã, kơyoa mơhư̆ jiơ̆ng! 17 Iơŭ biă, Kơu đờm sơ̆ng buơl guhã, hũ lô mơnih gơnuăr-hwơ̆r sơ̆ng lô mơnih rĭng-tơpă lơkơu-khiăng 'buh tơgrơ̆ pơnuaĭ buơl guhã 'buh, bloh 'buh hũ 'buh; lơkơu-khiăng mơhư̆ tơgrơ̆ pơnuaĭ buơl guhã mơhư̆, bloh 'buh hũ mơhư̆.

18 “Yơu nư̆n, buơl guhã păng bĕ pơnuaĭ mơblàng mư̆ng pơnuaĭ pơgăp-pơmơyơu mơnih drà găr-pơjeh. 19 Tŭ sa aràng mơnih păng pơto-akhàn mư̆ng Pơnuaĭ Lơgăr Lơngì, bloh 'buh wờng, nư̆n kơmlài mơsak-jơhà truh tămblah-mă thĭt tơgrơ̆ pơnuaĭ hũ drà lăm hơtai-hơtiàn mơnih nư̆n. Ni la găr-pơjeh hũ lĕ rò gah jơlàn. 20 Găr-pơjeh lĕ iơŭ lăm anih lơ̆n pơtơu, la mơnih tŭ păng Pơnuaĭ, nư̆n sờh-sài đồ-mă mư, 21 bloh Pơnuaĭ 'buh tơmuh akha lăm hơtai-hơtiàn, mĭn dò sơdăng lăm sa-sĭt tŭ soh; truh tŭ păp bruă gleh-glăr, halài kŏng mă-pơkơŭ kơyoa Pơnuaĭ, nư̆n sơnĕ lơbuh mư. 22 Găr-pơjeh lĕ iơŭ lăm puk druơi, nư̆n la mơnih păng Pơnuaĭ, bloh kơyoa pơnuaĭ sơnư̆ng kơ-ù mư̆ng rài ni, sơ̆ng pơnuaĭ hàm-khiăng ngă mơda, hũ ngă tơ Pơnuaĭ kơđòng gơrềt-bơlhăt, nư̆n 'buh tơbiă bơnga boh. 23 Bloh găr-pơjeh drà lăm anih lơ̆n siàm, nư̆n la mơnih păng Pơnuaĭ sơ̆ng wờng; mơnih nư̆n rơŭ tơbiă bơnga boh, sa găr tơbiă hũ sa rơtùh, sa găr tơbiă hũ năm pluh, sa găr tơbiă hũ klơu pluh.”

Pơgăp-Pơmơyơu Mư̆ng Rơ̆ Yŭl Sơ̆ng Bơdai

24 Yàng Jêsu đờm sơ̆ng buơl guñu sa pơnuaĭ pơgăp-pơmơyơu pơkơ̆n: “Lơgăr Lơngì mơhiơ̆ yơu mơnih dih drà găr-pơjeh siàm lăm hơma drơi. 25 Bloh tŭ tơgrơ̆ mơnih dò đih, nư̆n mơnih mơbai-tămdră sơ̆ng mơnih nư̆n truh, drà rơ̆ yŭl lăm tơkrah hơma bơdai, bloh nư̆n nau. 26 Tŭ bơdai sroh tơgồ sơ̆ng tơbiă bơnga, nư̆n rơ̆ yŭl kŭng tơbiă rơi. 27 Du mơnih hơlŭn-hơlă truh đờm sơ̆ng mơnih pô sàng lài: ‘Ơ pô, 'buh iơŭ pô hũ drà găr-pơjeh siàm lăm 'blàng hơma pô ơu? Yơu nư̆n, rơ̆ yŭl kơyoa mư̆ng lơi bloh hũ?’ 28 Mơnih pô đờm: ‘Sa aràng mơnih mơbai-tămdră hũ ngă pơnuaĭ nư̆n.’

Du mơnih hơlŭn-hơlă đờm lài: ‘Yơu nư̆n, pô hũ khiăng buơl dơlhă buĭ abih du rơ̆ nư̆n ơu?’ 29 Mơnih Pô đờm: ‘Juơi ngă yơu nư̆n, kơyoa huơĭ lài tŭ buĭ rơ̆ yŭl, buơl guhã buĭ asŭ găm phŭn bơdai. 30 Kừ luơi abih dua găm sơ̆ng gơŭ tơgồ prŏng tơ̆l truh tơ blàn yuă; tŭ tơma blàn yuă, kơu rơŭ đờm kơkơi du mơnih yuă: Tơrgùm abih rơ̆ yŭl dơlhơu, c̆aŭ wơ̆ jiơ̆ng c̆aŭ, bloh nư̆n c̆uh abih lăm apui; dò bơdai nư̆n tơrgùm-pioh bĕ lăm bŭng tơ kơu.’ ”

Pơgăp-Pơmơyơu Mư̆ng Găr Sơmbơi Sơ̆ng Tơpơi

(Mak 4:30-32; Luka 13:18,19)

31 Yàng Jêsu đờm sơ̆ng buơl guñu sa pơnuaĭ pơgăp-pơmơyơu pơkơ̆n: “Lơgăr Lơngì mơhiơ̆ yơu sa găr sơmbơi bloh mơnih dih mă dơnih lăm apùh ơñiăm drơi. 32 Găr nư̆n la tìt rơlau abih lăm tơgrơ̆ găr-pơjeh, bloh tŭ tơmuh tơgồ, nư̆n prŏng rơlau tơ du jơi ơñiăm sơla, sơ̆ng tơbiă jiơ̆ng yơu phŭn kơyơu, tơ̆l truh c̆ĭm lơngì truh ngă sruh lăm thàn ñu jiơ̆ng.”

33 Yàng Jêsu kŭng đờm sơ̆ng buơl guñu sa pơnuaĭ pơgăp-pơmơyơu pơkơ̆n: “Lơgăr Lơngì mơhiơ̆ yơu tơpơi bloh mơnih kơmơi dih mă jrơu lăm klơu thŭng tơpŭng, tơ̆l truh tơ tŭ tơpŭng rồ abih.”

34 Yàng Jêsu angui pơnuaĭ pơgăp-pơmơyơu tô đờm pơto tơgrơ̆ pơnuaĭ nư̆n tơ buơl làng, 'buh sa pơnuaĭ lơi Pô đờm pơto tơ buơl guñu bloh 'buh angui pơnuaĭ pơgăp-pơmơyơu. 35 Pơnuaĭ nư̆n hũ ngă iơŭ tơpă yơu pơnuaĭ mơnih gơnuăr-hwơ̆r hũ đờm dơlhơu lài:

“Kơu rơŭ pơh kàng tô đờm du pơnuaĭ pơgăp-pơmơyơu,

Kơu rơŭ đờm tơbiă tơgrơ̆ pơnuaĭ bơdơŭ-tơrđơŭ mư̆ng tŭ c̆ơmrừp c̆rơ̆ng-tơbiă lơngì-tơsì tơnah-rơya.” †

36 Hơdơi tŭ brơi buơl làng nau wơ̆, Yàng Jêsu tơma lăm sàng. Du mơnih tui-mơgru truh jĕ, bloh tơnia Pô lài: “Yòng Pô-Pơto mơblàng-tơbiă pơnuaĭ pơgăp-pơmơyơu mư̆ng rơ̆ yŭl lăm 'blàng hơma bơdai tơ buơl dơlhă.” 37 Pô đờm: “Mơnih drà găr-pơjeh siàm la Anà Mơnih; 38 'blàng hơma la dun-ya; găr-pơjeh siàm la du anà Lơgăr Lơngì; rơ̆ yŭl la du anà kơmlài mơsak-jơhà; 39 mơnih mơbai-tămdră drà rơ̆ yŭl la kơmlài-jĭnràk; blàn yuă la hơrơi luĭ-dŭt rài dun-ya; mơnih yuă la du mơnih gơdrưh. 40 Yơu rơ̆ yŭl kơđòng tơrgùm wơ̆ sơ̆ng c̆uh lăm apui hơyơu lơi, nư̆n hơrơi luĭ-dŭt rài dun-ya ni kŭng yơu nư̆n rơi. 41 Anà Mơnih rơŭ pơđăr du mơnih gơdrưh Pô duơ̆n tơrgùm abih tơgrơ̆ mơnih ngă pơnuaĭ glài-sơnoh sơ̆ng tơgrơ̆ mơnih ngă pơnuaĭ mơsak-jơhà klàh mư̆ng lơgăr Pô, 42 bloh nư̆n prah guñu lăm rơhồng-apui, la anih rơŭ hũ hia-c̆ŏ sơ̆ng kĕ tơgơi. 43 Tŭ nư̆n, du mơnih rĭng-tơpă rơŭ kơc̆rà-sơrdah yơu ia-hơrơi lăm lơgăr Ama drơi. Aràng sơi hũ tơnia, păng-mơhư̆ bĕ!”

Pơgăp-Pơmơyơu Mư̆ng Phơ̆n C̆ơk-Màng

44 “Lơgăr Lơngì mơhiơ̆ yơu phơ̆n c̆ơk-màng dơ̆r bơdơŭ lăm 'blàng hơma. Hũ sa aràng mơnih dih duah hũ nư̆n bơdơŭ wơ̆, bloh nư̆n sờh-sài gài mơrai wơ̆ pơblơi abih tơgrơ̆ hơgĕ drơi hũ, tô blơi 'blàng hơma nư̆n.”

Pơgăp-Pơmơyơu Mư̆ng Găr Pơtơu C̆ơk-Màng

45 “Lơgăr Lơngì kŭng mơhiơ̆ yơu sa aràng mơnih akă-bơnia dih nau duah pơtơu c̆ơk-màng, 46 tŭ duah hũ sa găr pơtơu c̆ơk-màng, mơnih nư̆n gài nau wơ̆ pơblơi abih tơgrơ̆ phơ̆n hơgĕ drơi hũ tô blơi găr pơtơu c̆ơk-màng nư̆n.”

Pơgăp-Pơmơyơu Mư̆ng Sơñuăl Akàn

47 “Lơgăr Lơngì kŭng mơhiơ̆ yơu sa boh sơñuăl dăng trŭn lăm ia-tơsì, mă tơ̆l abih tơgrơ̆ mơta akàn. 48 Tŭ sơñuăl baŭ, aràng kơtŭng đì tơ gah ia, bloh nư̆n dò guh rơwah akàn siàm pioh lăm bài, dò du akàn jơhà nư̆n prah luơi abih. 49 Truh hơrơi luĭ-dŭt rài dun-ya ni kŭng yơu nư̆n rơi. Du mơnih gơdrưh rơŭ truh, pơklah-krơi mơnih mơsak-jơhà klàh mư̆ng mơnih rĭng-tơpă, 50 sơ̆ng prah du mơnih mơsak-jơhà tơma lăm rơhồng-apui, tơ anih nư̆n rơŭ hũ hia c̆ŏ sơ̆ng kĕ tơgơi.”

51 “Buơl guhã hũ wờng tơgrơ̆ pơnuaĭ nư̆n ơu?” Du mơnih tui-mơgru đờm: “Buơl dơlhă wờng.” 52 Pô đờm lài: “Kơyoa nư̆n, du mơnih gơnuăr-pơto pơnuaĭ adăt-adia hũ mơgru thơu mư̆ng Lơgăr Lơngì, kŭng mơhiơ̆ yơu mơnih pô sàng dih, mă tơbiă mư̆ng anih pioh phơ̆n c̆ơk-màng drơi găm phơ̆n bơrhơu sơ̆ng phơ̆n klă.”

Yàng Jêsu Mơrai Wơ̆ Tơ Nasaret

(Mak 6:1-6; Luka 4:16-30)

53 Hơdơi tŭ Yàng Jêsu đờm pơto du pơnuaĭ pơgăp-pơmơyơu nư̆n, Pô nau klàh mư̆ng anih nư̆n. 54 Pô gài nau wơ̆ tơ plơi phŭn, bloh nư̆n pơto-mơblàng lăm sàng pơtòm, buơl làng mă ngă c̆rih-takơtuă đờm lài: “Kơyoa mư̆ng lơi bloh mơnih ni hũ pơnuaĭ jak-khờh sơ̆ng ngă jiơ̆ng du bruă gơnăp-gơnuăr yơu nư̆n? 55 Ni 'buh iơŭ la anà lơkơi mơnih khờh trah kơyơu ơu? Ame ñu 'buh iơŭ la Mari, sơ̆ng adơi-ai ñu la Jakơ, Jôsep, Simôn, sơ̆ng Juđe ơu? 56 Abih du gơŭ kơmơi ñu 'buh iơŭ la dò hơdiŭ tơkrah buơl gudrơi ơu? Yơu nư̆n, kơyoa mư̆ng lơi bloh mơnih ni hũ tơgrơ̆ pơnuaĭ nư̆n?” 57 Sơ̆ng buơl guñu sơnĕ lơbuh lăm pơnuaĭ sŭng kơyoa Pô. Bloh Yàng Jêsu đờm sơ̆ng buơl guñu: “Mơnih gơnuăr-hwơ̆r mĭn 'buh hũ aràng c̆ơ prŏng-màng lăm plơi-lơgăr phŭn sơ̆ng sàng dơnò drơi soh.” 58 Pô 'buh ngă lô bruă gơnăp-gơnuăr tơ anih nư̆n, kơyoa buơl guñu 'buh păng-tui.

* 13:15 Êsai 6:9-10. † 13:35 Pơđik Adoh Mơyòm 78:2.