5
Diosichi tsachila itsanque nenanola jonunca
1 Diosi laquiranun nalala jotori, ya cuwenta nenalarana!
2 Cristo chiquilaca laquiramin joto, tencachiquenan Diosichi cuwapoito puyanue chiquilachi jutsa tenchi. Tsanque cuwapoito, Diosichi tsara uraran pubanca epe cuwaca cuwenta jominue. Junni Crístonan nulaca laquiramin jonun tenchi nula talanan laquiracaato nenalarana!
3 Uyan sonalabe o uyan unilalabe nosa seitonque nenalaratuna! Uyanlachi cosaca munaito quiratulajona! Ticatiya jelenquira quito nenalaratuna! Diosichi tsachila joto, tsanquinoca nin pantiya quilaquituna!
4 Epe cuenta quin, seiton cuentaca quin, quitulajona! Tsantin nenatuto, Diosibe acradeseito nenanola joe.
5 Nulari inca numa seque jera miralarae: Uyan sonalabe seitonque nenaminla, o seitonque tenca caminla, o uyanlachi cosaca munaito quiraminlari, Diosi mantananun tsachi bolonbi pewino podeilaituchunae Crístochibi. Uyanlachi cosaca munaito quiraminlari seiton jolajoe epe diosi joe tinun moldechi cale telenhiminla cuwenta.
6 Weyanla mantimini tsanque nenano se joe timinla joe. Junto yala nene pato, encanachi timinla joe. Yala tsanlatinasatiya, tina meralaquituna! Diosica merátuchi timinlaca Diosiri casticaquinato, tsanquenan seitonque nenaminla jonun tenchi casticaquino jochunae.
7 Junni tsantiminlabe tina penenatulajona!
8 Casaleri nulachi tencabi jutsa poto, tencabi nemen jominlanue. Tsan jominlaca Miya Jesucristo nulachi tencaca jera tsen mansuwanue. Aman tsente nenaminla joto, seque nenalarana!
9 Diosichi Tencabe mantaitori, tsarasica pato, jeralelabe sen jolajochunae.
10 Miya Jesucrístori chiquilaca niyaque nenasa munaranunca miichique tenfelaina!
11-12 Seitonla nemente nenaminla cuwenta joto, epele quito nenaminla joe. Yala ticatiya nosa quinanunca panori chiquilari luranola joyoe. Junni junlaberi penenalaratuna! Seque nenalarana! yape uyanlari junlaca seitonla joeque tenhilaisa.
13 Yari itsanque jochunae: Yalari nemente cuwenta nenalaranari, natiya miituntsan jochunae ti quilaquinanunca. Nula mantimini tseno tan cuwenta jolajochunae. Junni yalaca tseto quiranari, quirailaichunae. Jeralela yala ti seiton quilaquinanunca quiralaquichunae.
14 Diosichi Pilabi junca pila chuteca joe. Itsanque chuteca joe:
Catson tsominla, mansonhilaide!
Puyaca jotonan, mansonhilaide!
Junni Cristo nulachi tencaca tsen suwachunaeque chuteca joe.
15 Tencabe nenalarana! Tenca itonla cuwenta nenatuto, duque tenca tan cuwenta nenalarana!
16 Amana materi tsachila duque seitonque nenaminla joe. Junni nulari lan chularatuna! Diosichi tenchi sen quinoca tenfeto chularana!
17 Tenca itonla cuwenta itolajona! Miya Jesucrístori chiquilaca niyaque nenasa munaranunca miichique tenfelaina!
18 Winan itori, lu piyayan ticaalaquichunae. Junni jun tenchi winan ituto, Diosichi Tencabe jera mantaito nenalarana!
19 Nula tala Diosica canta quito, Salmo canta quilaquina! Nulachi tencabi Miya Jesucrístoca se tito yaca canta quilaquina!
20 Numasitiya, ti tenchitiya, Apa Diosibe acradeseilaina! Chiquilachi Miya Jesucrístochi tsachila joto, Diosibe acradeseilaina!
Unilabe sonabe niyaque nenanola jonunca
21 Diosica respetaiminla joto, nula talanan respetaicaato sonnalarana!
22 Sonalanan, Miya Jesucrístoca meránun cuwenta, nulachi unilalacanan meralaquina!
23 Crístori chiquilachi misu cuwenta joto chiquilaca mantamin joe. Chiquila yabe se lominlari yachi puca cuwenta jolajoyoe. Junto yabe mantaiminlayoe. Junni jun tsanquenan unilala yalachi sonalachi misu cuwenta joto yalachi sonalaca mantaminla joe.
24 Junni Crístochi tsachila yabe mantainun cuwenta, sonala jun tsanquenan yalachi unilalabe numasitiya mantaino jolajoe.
25 Unilalari, Cristo yachi tsachilaca laquiranun cuwenta nulanan nulachi sonalaca laquiralarana! Crístori chiquilaca duque laquirato, tencachique cuwapoinue
26 chiquilaca Diosichi tsachila suwachun. Junto Diosichi fiquica seque meráto, chiquila mumunhinunbi seide seide jisa carichunae.
27 Yabe pechuno junlari tsara senla josa munarae. Man piti jutsa itonla jono joe. Jun tenchi chiquilaca se suwanae chiquila sen itobi yabe pechularasa.
28-30 Meralaquede! Chiquilari Crístochi tsachila joto, yachi puca cuwenta jolajoyoe. Junni yari chiquilaca duque laquirato, seque cuidaimin joe. Junni unilalanan yalachi sonalacanan duque laquiranola joe. Tencachique pucaca laquiranun cuwenta yalachi sonalaca laquiranola joe. Yalachi sonalaca laquiraminlari tencachiquenan laquiraminla jochunae. Monantiya tencachique pucaca paituminlayoe. Chiquila tencachique pucaca duque laquirato cuidaiminlayoe Cristo yachi tsachilaca seque cuidainanun cuwenta. Junni unilala jun tsanquenan yalachi sonalaca laquirato seque cuidainola joe.
31 Jun tenchi Diosichi Pilabi itsanque chuteca joe:
Unilalari sona cato, yalachi apaca, ayanca purato, unilabe sonabe manca puca junnique sonnalarachunaeque chuteca joe.
32 Ya fiquica seque meráno tenfe joe. Junnan Crístocanan paca joe tiyoe yabe yachi tsachilabe man junni jolajoyoeque.
33 Junni nula jeralelanan tencachique laquiranun cuwenta, nulachi sonalacanan laquiralarana! Sonalanan, nulachi unilalaca respetailaina!