San Pablo Galácialachi
ereca jun pila
Caque fiqui: Galacia tobi weyan tsachila epele micarinaminlanue. Israelita itonlanan Jesucrístobe cayailaitori, israelítalachi mite nenanola joeque micarinaminlanue. Israelítalachi mite quidoca poraitunari, Diosichi cale sen itolajochunaeque micarinaminlanue. (Israelítalachi mite quidoca porenoca fécari miichun, “Caque Cosala” 17:1-14-bi quirade!) Junsi israelítalachi uyan mantacanan meránola jochunaeque micarinaminlanue.
Junni Páblori ya galácialaca mantucarichun in pila chutenue yape ya epe fiquica tennalaratusa. Diosichi Tenca Pábloca pila chutesa carinasa, duque tuca micarinue. Mantaca meracachi se lono podeituntsan joeque, Jesucrístobe cayaitosiri se lontsan joeque, micarinue. Wata 53 tsansite in pila chutenue.
1
1-2 La Páblori in pilaca quinayoe. Jesucrístochi Galacia tobi chumin tsachi bolonlachi erechun quinayoe. Crístochi mantá tan joto in pilaca quinayoe. Junni tsachilachi mantá catiyoe. Tsachilari Diosichi mantate laca mantá tan suwatucalae. Apa Diosi patsanan laca mantá tan suwacae. Yanan Jesucrístoca puyaca jominca mansoncarinue. Junto yabe Jesucrístobe laca mantá tan suwacalae. Junni labe jerale inte chumin Jesucrístochi tsachilabe nulachi saludo erelaquinayoe.
3 Chiquilachi Apa Diosibe chiquilachi Miya Jesucrístobe nulaca duque laquirasa rocainayoe. Nulaca wepanatuto pansi chularasa carideque rocainayoe.
4 Jesucrístori tencachiquenan cuwapoinue chiquilachi jutsa tenchi puyachun. Tsanque puyanue yape amana mate seiton quinaminlabe man parejori itolajosa. Apa Diosiri yaca tsanhisa munarasa tsanhiniinue.
5 Jun tenchi Apa Diosica numatotiya tsara sen joe tito polenola joyoe. Tsanque joe.
Mancasiri se larimin fiqui jonunca
6 Nulaca duque wepananayoe. Diosibe nasiri penenasiri yaca mantelaquepochi latinae. Diosiri nulabe panue. Cristo nulaca duque laquiraminbe cayaisa tinue. Nulari wari yaca mantelaquepoto, uyan sen fiqui tinunca quereichi latinae.
7 Tsan josanan, ya fiqui mantimini uyan sen fiqui natiya itoe. Nene micariminlari nulaca palapochique Crístoca paca sen fiquica jera canbiyacariminla joe.
8 Chiquilari nulaca tuca micariminla joyoe. Junni uyan quiraque micariminlaca Diosiri yucaquintsan joe tiyoe. Mo josatiya, o chiquila josatiya, o Diosichi to anjelila josatiya, tsanque micariminlacari Diosi yucaquintsan joe tiyoe.
9 Nulabe numa tsanque paca jotonan, manan mantsantichinayoe: Nulari numa quereica fiquica telaquepoto uyan fiquica manmicarinari, Diosi yalaca yucaquintsan joe tiyoe.
10 Junni lari tsanque pánato, ¿tsachilachi tenca munate tsantinawan? Tsachilari yape laca sen joe tilatisari tsantitiyoe. Diosisiri laca sen joe tisa pánayoe. Tsachilaca catennamanpari, Crístobe mantaimin itono jomin joinhie.
Pablo tsanque Crístochi mantá tan ica jonunca
11 Acola, soquila, nulacari miralarasa tenjae la micarinun sen fiqui tsachilachi fiqui itoeque.
12 Jun fiquicari tsachilabe miitucayoe. Tsachilari monantiya micaritulajoe. Jesucristo ya fiquica lachi tencabi miisa carie.
13 Maturi la israelítala tala canenano mate Jesucrístochi tsachilabe duque seiton jomanyoe. La tsan jomin jonunca nulari meracala jonhoe. Jesucrístochi tsachilaca junca telaqueposa carichique duque tenfemin jomanyoe.
14 Israelítala tala matu tatalachi miteri nenachique duque tenfemin jomanyoe. La tsansi unicala tala israelítalachi mica fécari miica jomanyoe.
15 Tsan josanan, laca na caitumincanan Diosi wenteca jominue. Junto laca duque laquirato, yabe cayaisa carie.
16 Yachi Naoca lachi quirawoe. Junsi yachi fiquica israelita itonlaca micarisa mantá cuwae.
Junni labe quiraica josari, yaca miichique tsachilabe panhatiyoe.
17 Jerusalénbiri weyanlari laca caquenan Crístochi mantá tanla jominue. Junni yalabenan miibi jitiyoe. Arabia toca nenabi jito, junbi nechi aman Damasco puebloca manjayoe.
18 Junto aman peman wata poletobi, Jerusalenca manjiyoe. Pédroca quirabi jito, palu tominco fecári yabe pechuto manjayoe.
19 Jacóbocanan moora quirayoe Miya Jesuchi acoca. Uyan Crístochi mantá tanlacari quiratiyoe.
20 Diosiri mirae laca nene patueque. La pila quinaminca ya quiranae.
21 Junte nechi Siria toca jito, junsi Cilicia toca jiyoe.
22 Judea tobi mantimini Crístochi tsachila laca caquiratumin jominlanue.
23 Meracachiri laca meraca jominlanue. Casaleri yalabe seiton jominnan, amanari Crístoca paca fiquica micarinatiequeri meraca jominlanue. Laca casaleri quereisa carituchi tinun fiquica lanan micarinatiequeri meraca jominlanue.
24 Junni laca tsanque meráto, Diosica tsarasica seque palaquinue la tenchi.