5
Jesucrístobe penenaminlaca payinunca
1-2 Jesucrístochi tsachila tala mantá tanlacanan payichinayoe. Diosichi tsachilaca cuidainola joe opisaca cuidaiminla cuwenta. Junni lanan nula cuwenta mantá tan pejoto, tsanque payinayoe. La Jesucristo padeseinaminca quiracayoe. Junni ina uraran mantá tan manquirainasanan, lanan yabe man junni pejoichunae. Junto nulaca payichinayoe. Nulari Diosichi tsachilaca laquirato, seque cuidainola joe cuidaino muquetue tituto. Encanato cala cachiqueri cuidaituntsan joe; Diosichi tsachilaca ayudaichunni yalaca cuidailaina! Nulabe miiminlaca sonba mantato patron cuwenta itulajona! Yalabe seque nenalarana! Junni yalari Diosichi opisala cuwenta joto, nulaca quirato, tsanquenan seque nenalarachunae. Aman Jesucrístori jerale Diosichi tsachilaca cuidaimin joe opisa tsacumin cuwenta. Junni nulari yachi tenchi Diosichi tsachilaca seque cuidailainari, yari manquiraitobi, nulacanan beconan seque quichunae yape numatotiya seque mantá tan joto polelaisa.
Junni mantaminlaca payisi, mosolacanan payichinayoe. Nulari unicalaca meralaquina! Junsi jeralelacanan itsanque payichinayoe: Monantiya fe jochi tituntsan joe. Uyanlacari fe jolajoe tintsan joe. Beco beco tsanque tenca cato nenantsan joe. Diosichi Pilabi junca itsanque chuteca joe:
Fe joyoe timinlaca Diosiri paichunae.
Fe joyoe tituminlaca laquirato ayudaichunaeque chuteca joe.
Junni Diosi duque sonban joto, nulaca niyantiya isa carinari, tsanhino muquetue titulajona! Tsantitulajonari, inale Diosiri nulaca fe josa carichunae. Yari nulaca cuidainae. Junni yaca tennato, ticanantiya wepanatulajona!
Yucan nulaca pa joto, luquela cuwenta atide nenae niyanlacatiya mancato fichique. Jun tenchi seque tenca cato tencabe nenalarana! Diosica seque tennato, yucanca merátuchique tenfelaina! Padeseinatotiya yucanbe mantaituchique tenfelaina! Jerale tótenan Diosichi tsachila nula cuwenta padeseilainae. 10 Junni nulari nasi padeseinunbi, Diosiri nulaca jera manse patarito, jera sonba tenca mansuwachunae. Nulaca laquirato, niyaquetiya se quimin joe. Junsi Jesucrístobe cayaisa ticae yape numatotiya yabe uraran tsente pechuto polelaisa. 11 Diosiri numatotiya mantamin joto poleno jochunae. Tsanqueri joe.
Saludo erenunca
12 Silvano in pilaca lachi tenchi chutenae. Lachi tencari yari Diosica seque quereimin aco joe.
In pila nacábiri nulaca payito, tuca cuenta quinayoe. Inni Diosi tsarasica paca fiqui joe tinayoe tsachilaca laquirato se suwamin joeque. Junni jun fiquica tennato, natiya peleilaituna!
13 Babilóniabi chumin Jesucrístobe penenaminlanan jera layaito, nulachi saludo erelaquinayoe. Chiquilanan nula cuwentanan Diosi wenteca jun jolajoyoe. Junni Márconan, lachi nao cuwenta joto, saludo peerenae. 14 Nulari duque laquiracaato, caforole mo tito saludaicaalaquina! Jerale Jesucrístobe cayaica junlaca pansi wepanatuto chusa tenjae.