SALMOS
1
Ɨ tɨ jɨꞌréꞌcan jɨmeꞌ tyámuaꞌviꞌraꞌaj puéꞌeen
1 Cheꞌ huatóotyamuaꞌveꞌen aꞌɨ́jna ɨ tyáatɨꞌ
tɨquee aꞌɨ́ɨjma namuaj jeꞌej maj tyihuáꞌixaatyeꞌ ɨ maj jeꞌej puaꞌaj tyityetyúuchaꞌɨj,
ajta quee ɨ juyéj jitze huaméj ɨ maj jitzán ucáajuꞌ ɨ maj tyiꞌijxánaꞌcɨraꞌ,
capu ajta huaꞌantyáanaꞌaxcaj ɨ maj jeꞌej puaꞌaj tyáꞌxaj ɨ Dios,
2 sulu aꞌɨ́j pu jitze jutyamuaꞌveꞌ ɨ nyúucariaꞌraꞌ ɨ Tavástaraꞌ
ajta aꞌɨ́j jitze tyúuꞌiteerityeꞌ tújca ajta tɨ́caꞌ.
3 Aꞌɨ́jna ɨ tyáatɨꞌ aꞌyaa pu een tɨꞌɨj ɨ ítyeɨꞌrij
tɨ aꞌáa véjriꞌ jaꞌtyáhuastiꞌ ɨ játyaꞌnaj jitze,
tɨ ajta tajcaa tɨꞌɨjta aꞌájna atyojoꞌréꞌnyej aꞌnáj tɨ huatatácaꞌan
ajta quee aꞌnáj cávesij ɨ xámueꞌraꞌ.
¡Néijmiꞌi tyiꞌtɨ́j tɨ jɨn jeꞌej rɨcɨj, tyámuaꞌ pu atyojoꞌréꞌnyinyii!
4 Ajta aꞌɨ́ɨjma jimi ɨ maj jeꞌej puaꞌaj tyityetyúuchaꞌɨj capu aꞌyan tyéꞌyiꞌij,
jiꞌnye aꞌyaa mu een tɨꞌɨj ɨ xɨéerij áacaj tɨ yoꞌcuíꞌnaj.
5 Aꞌɨ́j mu jɨn ɨ maj jeꞌej puaꞌaj tyityetyúuchaꞌɨj Dios pu aꞌɨ́ɨjma puéjtzij huoꞌtaꞌsij
ajta quee tyiꞌtɨ́j huáꞌcɨꞌtyij aꞌáa tɨ tyejéꞌsejreꞌ aꞌɨ́ɨjma jimi ɨ maj tyámuaꞌ tyityetyúuchaꞌɨj.
6 Tavástaraꞌ pu huáꞌchaꞌɨj huaꞌ juyéj jitze aꞌɨ́ɨjma ɨ maj tyámuaꞌ tyityetyúuchaꞌɨj,
ajta ɨ huaꞌ juyéj ɨ maj jeꞌej puaꞌaj rɨcɨj aꞌáa pu jóꞌnyee joꞌmaj jóꞌvesij.