138
Jeꞌej tyaj tyityeetyényuunyij ɨ Tavástaraꞌ jimi tyej tyij tyaatatyójtziꞌreꞌen
David tɨ jaꞌaꞌrij
1 Nyetyimuatatyójtziꞌreꞌej, Tavástaraꞌ, néijmiꞌi ɨ nyaxɨéjnyuꞌcaa jɨmeꞌ;
nyajta muéetzij jimi tyuꞌtáchuiicaj aꞌɨ́ɨmaj metyiꞌséeracaj ɨ maj muéetzij muahuɨɨreꞌ.
2 Aꞌáa nu pujmuaꞌ jaꞌajtunutaj joꞌtɨj joꞌtyéjvee aꞌ tyeyúuj
nyej nyij tyimuaatatyójtziꞌreꞌen aꞌɨ́jcɨ jɨmeꞌ paj nyaxɨeꞌveꞌ ajta ɨ tɨ muéetzij jimi jɨꞌréꞌcan jɨmeꞌ,
jiꞌnye muáaj paj jaataséjratacaꞌ ɨ paj jɨn ántyapuaj pajta aꞌnyúucaa
néijmiꞌqueꞌ tɨꞌɨj naꞌaj puaꞌmáj tyíꞌsejreꞌ.
3 Nyatɨꞌɨj muéetzij jimi huatyéenyuj, muáaj paj náanamuajriꞌ,
pajta jéetzeꞌ caꞌnyíjraꞌaj naatáꞌ.
4 Néijmiꞌi mu tyimuaatatyójtziꞌreꞌej aꞌɨ́ɨmaj ɨ maj tyíꞌijta ɨ cháanacaj japua
matɨꞌɨj jáanamuaj tyiꞌtɨ́j paj jɨn tyaꞌtáꞌratziiriꞌ.
5 Aꞌɨ́ɨ mu tyaatatyójtziꞌreꞌej ɨ Tavástaraꞌ aꞌɨ́jcɨ jɨmeꞌ jeꞌej tɨ aꞌɨ́ɨn tyuꞌtaꞌíjtacaꞌ,
jiꞌnye vaꞌtɨ́j pu séejreꞌ ɨ Tavástaraꞌ tɨ jɨn naa huaséꞌrin.
6 Tyij ajta ɨ Tavástaraꞌ jútyeꞌ ɨmuáj jáꞌsejreꞌ,
aꞌɨ́j pu jitze rányeej ɨ tyévij tɨ quee óotzaahuatyeꞌ,
ajta aꞌɨmuáj jáꞌsejreꞌ aꞌɨ́ɨjma jimi ɨ maj óotzaahuatyeꞌ.
7 Tɨꞌɨjta jeꞌej puaꞌaj nye jimi tyíꞌrɨjcaj,
muáaj paj nyechaꞌɨɨj puáꞌmej nyej nyij nyooj júurij;
muáaj paj uyoꞌtaꞌítyij ɨ paj jɨn néijmiꞌi putyíꞌuurej pajta nyajapuáj huatányuusij
aꞌɨ́jcɨ jimi ɨ maj jɨn nyajaaxɨejviꞌ aꞌɨ́ɨmaj ɨ maj nyéjchaꞌɨɨreꞌ.
8 ¡Tavástaraꞌ pu néijmiꞌi jɨn tyámuaꞌ tyíꞌuurej
tyiꞌtɨ́j tɨ arí nye jimi aꞌyan tyuꞌtaxájtacaꞌ!
Tavástaraꞌ, jusén jɨmeꞌ pu séejreꞌ ɨ paj jɨn taxɨeꞌveꞌ;
¡capáj jataxáꞌhuataꞌan tyiꞌtɨ́j paj períj jɨn uhuatyéꞌchej!