45
Tyiꞌtɨ́j maj tyámuaꞌ naa tyuꞌtaxáj tɨꞌɨj huatyényeɨɨchej ɨ rey tɨ jɨn tyiꞌtyéjvee
Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj, aꞌɨ́jcɨ ɨ cuíinarij tɨ aꞌyan ántyapuaj tɨjɨn: “Ɨ tzuhuáaꞌ.” Ɨ nyúucarij tɨ naa huánamuajrii aꞌɨ́ɨmaj maj huóomuaꞌtziityej ɨ yójmuaꞌmuaꞌ aꞌɨ́jcɨ ɨ Coré. Chuíicarij maj jɨn huóoxɨeꞌveꞌen. Jéehua pu ɨ nyúucarij tɨ naa huánamuajrii nyamuaꞌtzíiraꞌaj tzajtaꞌ séejreꞌ
1 Nyatzájtaꞌ pu nyúucarij tásiseerii tɨ naa huánamuajrii,
ajta ɨ nyenyanúu pu aꞌyan een tɨꞌɨj ɨ tɨ jɨn tyéꞌyuꞌxaj aꞌɨ́jna ɨ tɨ tyámuaꞌ naa tyíꞌyuꞌxacaa.
¡Aꞌɨ́j nu nyij tyámuaꞌ naa tyuꞌtaxájtaj aꞌɨ́jcɨ jimi ɨ tɨ rey jɨn tyiꞌtyéjvee!
2 ¡Muáaj paj aꞌɨ́ɨn puéꞌeen ɨ tɨ jéetzeꞌ naa huaséꞌrin huaꞌ tzajtaꞌ ɨ tyétyacaa!
¡Muaꞌ tyenyij jitze pu séejreꞌ ɨ nyúucarij tɨ huápuɨꞌɨj naa huánamuajrii!
Aꞌɨ́j pu jɨn ɨ Dios tyámuaꞌ naa tyimuatyájtoo jusén jɨmeꞌ.
3 ¡Pataꞌaj tyámuaꞌ jáaꞌuurej aꞌ chúun aꞌɨ́jcɨ jitze ɨ paj jɨn aváꞌjɨꞌqueꞌ, muáaj paj jaayíꞌtɨn paj huanyoꞌseꞌen!
¡Aꞌɨ́j paj jɨn naa huápuɨꞌɨj huaséꞌrin!
4 Ajta ɨ paj jɨn naa huaséꞌrin aꞌɨ́j pu jitze séejreꞌ paj tyiꞌmuéꞌtɨj puaaméj,
pajta nyoꞌseꞌ aꞌɨ́jcɨ jitze maꞌcan ɨ tɨ jɨꞌréꞌcan jɨmeꞌ
pajta tyámuaꞌ tyihuaꞌxaꞌpuɨꞌɨntariꞌtzeꞌ aꞌɨ́ɨjma ɨ maj quee óotzaahuatyeꞌ.
¡Aꞌmuácaꞌ paj jɨn tyámuaꞌ tyíꞌuurej mej mij néijmiꞌi tyámuaꞌ tyoꞌtaséj!
5 Ɨ maj huacháatɨmee ɨ chájtaꞌnaj jitze aꞌɨ́ɨ mu eetávitzej joꞌpaj jaꞌraꞌɨ́ɨcajmee, taj rey,
aꞌɨ́jna ɨ tyiáꞌɨꞌrɨj huápuɨꞌɨj pu tyeꞌentyipityíijmee aꞌɨ́j pu jɨn tyíꞌrutyijve
huaꞌxɨéjnyuꞌcaa jitze aꞌɨ́ɨjma ɨ maj muájchaꞌɨɨreꞌ.
6 Ɨ paj jɨn tyíꞌijta, taj Dios, jusén pu jɨn séejreꞌ,
ajta aꞌɨ́ɨn puéꞌeen ɨ tɨ tyámuaꞌ naa tyíꞌijta.
7 Aꞌɨ́j paj xɨeꞌveꞌ ɨ tɨ xáꞌpuɨꞌ pajta jaxanaꞌveꞌ aꞌɨ́jcɨ ɨ tɨ jeꞌej puaꞌaj een.
Aꞌɨ́j pu jɨn ɨ Dios muaꞌantyíhuoo, aꞌ Dios,
ajta muaatáꞌ pej pij huatáꞌtyamuaꞌveꞌen
ajta muéetzij jéetzeꞌ tyámuaꞌ tyimuaatáꞌ quee ɨ séecan ɨ maj ajamuán ajaꞌseejreꞌ.
8 Néijmiꞌi ɨ tyiꞌacáanaa aꞌyaa pu tyiꞌtyáarɨeꞌ tɨꞌɨj aꞌɨ́jna ɨ ɨ́ɨjcua, tɨꞌɨj ɨ áloes ajta tɨꞌɨj ɨ canéelaj,
ajta ɨ cuíinarij a jitze séejreꞌ canárij tɨ jitze maꞌcan
pajta atyamuaꞌveꞌ aꞌájna joꞌmaj jeꞌráatyij ɨ maj vaꞌcán jɨn tyityetyuꞌuj.
9 Huaꞌ tzajtaꞌ ɨ úucaa ɨ maj aꞌjimi tyíꞌhuɨɨreꞌ aꞌɨ́ɨ mu majta séejreꞌ ɨ maj huápuɨꞌɨj naa huaséꞌrin,
aꞌmuácaꞌtaꞌ pujmuaꞌ aꞌɨ́jcɨ jitze ɨ paj jitzán acájca aꞌáa pu jáꞌsejreꞌ ɨ íitɨꞌ tɨ vaꞌcán jɨn tyiꞌtyéjvee,
ajta aꞌɨ́jna jɨn tyámuaꞌ huóoruuj ɨ ooroj tɨ jéetzeꞌ tyámuaꞌ een.
10 Náanamuajriꞌ, nyiyóoj paj íitɨꞌ,
tyámuaꞌ paj naa tyáanamuaj jeꞌej nyaj tyimuaatéꞌexaatyeꞌej,
huojoꞌhuáꞌxɨj aꞌtyéɨtyeristyamuaꞌ pajta ɨ maj tyámuaꞌ naa tyíꞌmuamuaꞌtyej,
11 jiꞌnye aꞌɨ́jna ɨ tɨ rey jɨn tyiꞌtyéjvee aꞌɨ́j pu séjramuꞌ ɨ paj jɨn naa huaséꞌrin,
aꞌɨ́ɨ pu aꞌ vástaraꞌ puéꞌeen, aꞌyaa puꞌij tyúuxɨeꞌveꞌ paj jaꞌráꞌastijreꞌen.
12 Íitɨꞌ vaꞌcán paj jɨn tyiꞌtyéjvee aꞌájna a Tiro,
aꞌɨ́ɨmaj ɨ chíjtyaanyiꞌij chájtaꞌ maj jaꞌchej
aꞌyaa mu tyáꞌxɨeꞌveꞌ maj tyiꞌtɨ́j tyimuaatapuéjveꞌen mej mij tyámuaꞌ aꞌjimi tyíꞌtyesejreꞌej.
13 ¡Aꞌyun pu iityárutyij ɨ íitɨꞌ vaꞌcán tɨ jɨn tyiꞌtyéjvee, huápuɨꞌɨj naa huaséꞌrihuaꞌaj!
¡Ajta aꞌyaa eenyeꞌ tyiꞌtyéechan tɨꞌɨj ɨ ooroj!
14 Tyámuaꞌ mu naa eenyeꞌ tyetyechéetyeꞌen matɨꞌɨj mij jáꞌviꞌtɨn aꞌɨ́jcɨ jimi ɨ rey,
majta jamuán ɨ úucaa maj jahuɨɨreꞌ,
ɨ maj majta séecan jamuán antyúunajchi.
15 Aꞌɨ́ɨ mu huajuꞌ jéehua muutyámuaꞌvaꞌaj,
aꞌyaa mu mij tyuutyámuaꞌveꞌej matɨꞌɨj aꞌúun joꞌtyárutyij joꞌtɨj jeꞌrájcaj aꞌɨ́jna ɨ rey.
16 Aꞌyóojmuaꞌ, taj rey,
aꞌɨ́ɨ mu huatyáraꞌsij joꞌmaj tyejéꞌijtacaꞌaj ɨ jaꞌhuásimuaꞌcɨꞌɨj,
pajta jeꞌen tyuꞌtáꞌsij mej mij néijmiꞌqueꞌ tyuꞌtaꞌíjtaj ɨ chuéj japua joꞌmaj joꞌcháatɨmee.
17 Nyáaj nu aꞌyan rɨnyij mej mij joꞌtámuaꞌreej jeꞌej paj ántyapuaj
ɨ maj huaꞌ jitze eerányesij,
ajta mej mij jusén jɨmeꞌ tyimuaatatyójtziꞌreꞌen ɨ maj huacháatɨmee ɨ chájtaꞌnaj jitze.