79
Matɨꞌɨj huatóoxaamujrityej aꞌɨ́jcɨ jɨmeꞌ tɨ ɨ Jerusalén huatyuꞌuunyiꞌhuacaꞌ
Chuíicarij Asaf tɨ jaꞌaꞌrij
1 ¡Taj Dios, aꞌɨ́ɨmaj ɨ maj quee tyáꞌtzaahuatyeꞌ aꞌɨ́ɨ mu tyeꞌentyipuáꞌrityej muéetzij tyíꞌmuaꞌaꞌrij!
¡Majta aꞌúun joꞌtyájrupij aꞌ tyeyúuj joꞌtɨj néijmiꞌi tyámuaꞌ tyejéꞌeen
ajta néijmiꞌi huatyuꞌuunyiꞌhuacaꞌ ɨ chájtaꞌnaj Jerusalén!
2 ¡Aa mu huajaꞌajtoo ɨ huaꞌ tyéviraꞌ ɨ maj muahuɨɨriaꞌcaꞌaj,
ɨ maj muéetzij jimi tyámuaꞌ tyityetyúuchaꞌɨɨcaꞌaj,
mej mij aꞌyan tyuꞌtyáhuɨɨreꞌen tɨꞌɨj cueꞌráj
aꞌɨ́ɨjma jimi ɨ muáꞌrɨeꞌcajtzij ajta tyiꞌtyán simuáruunyij jimi!
3 Aꞌyaa mu tyaꞌajxɨ́rej ɨ huaꞌ xuureꞌ tɨꞌɨj jájtyij tɨ puéꞌeenyeꞌ
néijmiꞌqueꞌ aꞌájna a Jerusalén,
ajta quee ajaꞌ aꞌtɨ́j tɨꞌij tyityáaꞌavaataj.
4 Aꞌtzísiꞌ tu séejreꞌ aꞌɨ́ɨjma jimi ɨ maj avéjriꞌ antacháatɨmee,
néijmiꞌi mu jeꞌej puaꞌaj tyíꞌtaxaj aꞌchu maj puaꞌmáj atacháatɨmee.
5 Muáaj Tavástaraꞌ,
¿aꞌchunyéj ooj áꞌtyeeren ɨ paj jɨn nyúꞌcamuɨꞌ?
¿Nyi jusén jɨmeꞌ aꞌtáaj jaꞌmej ɨ paj jɨn nyúꞌcamuɨꞌ tɨꞌɨj ɨ tɨéj?
6 ¡Cheꞌ ɨ paj jɨn nyúꞌcamuɨꞌ aꞌɨ́ɨjma japua rájvetyij ɨ maj quee tyáꞌtzaahuatyeꞌ
ɨ maj quee muamuaꞌtyej majta quee muéetzij jimi jahuoo!
7 Jiꞌnye aꞌɨ́ɨmaj mu jeꞌej puaꞌaj jáaruuj aꞌɨ́jcɨ ɨ Jacob
majta néijmiꞌi huatyuꞌuj ɨ chuéj joꞌtɨj aꞌɨ́ɨn jáꞌchajcaꞌaj.
8 Capáj tyiꞌtáꞌcareꞌen tyej tyij ityáj huaꞌ jɨmeꞌ tyuꞌnájchitaj
tyiꞌtɨ́j maj jɨn jeꞌej puaꞌaj huarɨ́j aꞌɨ́ɨmaj ɨ tahuásimuaꞌcɨꞌɨj,
¡cheꞌ caꞌnácan mujoꞌvéꞌmeꞌen aꞌɨ́jna ɨ paj jɨn taxɨeꞌveꞌ,
jiꞌnye catu cheꞌ jeꞌej jájtyoovej jeꞌej tyaj huárɨnyij!
9 Taj Dios, muáaj paj aꞌɨ́ɨn puéꞌeen ɨ tɨ tajapuá huatányuusij,
taatáhuɨɨreꞌ, tajapuá huatányuuchij pajta tyitaatúꞌuunyiꞌ,
aꞌɨ́jcɨ jitze maꞌcan ɨ tɨ naa huánamuajrii ɨ paj jɨn ántyapuaj.
10 Capu juxɨeꞌveꞌ maj aꞌyan tyíꞌxajtaj ɨ maj quee tyáꞌtzaahuatyeꞌ yee:
“¿Joꞌnyij jeꞌej jeꞌen ɨ huaꞌ Dios?”
¡Taatáꞌ tyej tyij jaaséj ɨ paj jɨn tyoꞌriáꞌrɨeeraj aꞌɨ́jcɨ jɨmeꞌ maj huoꞌcuij ɨ maj muéetzij muahuɨɨreꞌ!
¡Micheꞌ aꞌɨ́ɨmaj majta jáamuaꞌreej ɨ maj quee tyáꞌtzaahuatyeꞌ!
11 Huoꞌnamuaj jeꞌej maj tyíꞌxaj aꞌɨ́ɨmaj ɨ maj námiꞌ,
pajta huaꞌ japua huatányuunyij aꞌɨ́jcɨ jɨmeꞌ ɨ paj néijmiꞌi jɨn putyíꞌuurej
aꞌɨ́ɨjma ɨ maj meríj aꞌyan tyihuoꞌtaxájtacaꞌ mej mij huóꞌcuiꞌnyij.
12 Muáaj Tavástaraꞌ, aráahuaꞌpuaj puaꞌmáj paj tyoꞌriáꞌrɨeeraj aꞌɨ́ɨjma jimi ɨ maj tajimí avéjriꞌ joꞌcháatɨmee
aꞌɨ́jcɨ jɨmeꞌ maj jeꞌej puaꞌaj tyimuaaxájtacaꞌ,
13 tyajta ityáj, ɨ tyaj aꞌtyéɨtyeristyamuaꞌ puéꞌeen,
tyaj aꞌáa jáꞌsejreꞌ tɨꞌɨj cányaꞌxɨɨ tyaj puéꞌeenyeꞌ aꞌájna joꞌpaj muáaj tyámuaꞌ tyojoꞌruuj,
aꞌnáj tɨnaꞌaj tu tyiꞌmuatyóotziꞌreꞌej táꞌjuꞌun,
¡tyajta muéetzij jimi jusén jɨmeꞌ tyiꞌchuíicaj táꞌjuꞌun!