86
Muáaj papuꞌuj Dios puéꞌeen
Jeꞌej tɨ tyuꞌtyéenyuj aꞌɨ́jna ɨ David
1 Tavástaraꞌ, aꞌtzúj cuiꞌ náanamuaj,
jiꞌnye huápuɨꞌɨj nu nyaxaamujrityeꞌ nyajta quee jeꞌej tyéejviicueꞌ;
2 tyámuaꞌ paj tyináachaꞌɨɨn, jiꞌnye tyámuaꞌ nu eenyeꞌ aꞌ jimi séejreꞌ.
Muáaj paj nyaj Dios puéꞌeen;
¡pataꞌaj japuan huatányuunyij aꞌíjcɨ ɨ tɨ muéetzij muahuɨɨreꞌ ajta aꞌ jitze tyíꞌcaꞌnyej!
3 Tavástaraꞌ, nyéetzij náꞌancuꞌvaxɨꞌ
ɨ nyaj muéetzij jimi aꞌnáj tɨnaꞌaj jahuoo.
4 Tavástaraꞌ, pataꞌaj caꞌnyíjraꞌaj jaatáꞌan aꞌɨ́jcɨ ɨ tɨ muéetzij muahuɨɨreꞌ,
jiꞌnye aꞌ jitze maꞌcan nu huatyényuusij.
5 Jiꞌnye muáaj, Tavástaraꞌ, tyámuaꞌ paj tyihuojóꞌmuaꞌraj pajta tyúꞌuunyiꞌ;
néijmiꞌi paj jɨn huaꞌxɨeꞌveꞌ aꞌɨ́ɨjma ɨ maj muéetzij jimi jahuoo.
6 Tavástaraꞌ, huánamuaj jeꞌej nyaj aꞌ jimi tyáꞌhuoo
¡pajta aꞌyan huárɨnyij jeꞌej nyaj tyíꞌmuahuaviij!
7 Muéetzij jimi nu huatyényuusij nyatɨꞌɨjta quee jeꞌej jájtyooveꞌen,
jiꞌnye muáaj paj naatájeevij.
8 ¡Capu sɨ́ɨj ajtáhuaꞌaj séejreꞌ tɨ aꞌyan eenyeꞌ patɨꞌɨj muáaj, Tavástaraꞌ!
¡Capu sɨ́ɨj ajtáhuaꞌaj jaayíꞌtɨn tɨ aꞌyan tyuꞌmuárɨeꞌen patɨꞌɨj muáaj!
9 Muáaj paj Tavástaraꞌ,
muáaj paj néijmiꞌcaa huátahuaacaꞌ ɨ tyeɨ́tyee,
aꞌɨ́ɨ mu mij mujoꞌváꞌjuꞌuj muáꞌjuꞌun mej mij muatyáanajche,
ajta mej mij tyámuaꞌ tyeetyátoonyij ɨ paj jɨn ántyapuaj.
10 Jiꞌnye muáaj papuꞌuj Dios puéꞌeen,
¡muáaj paj vaꞌcán jɨn tyíꞌmuarɨeꞌ ajta naa tyihuaꞌséjratyeꞌ aꞌ jitze tɨ tyíꞌsejreꞌ!
11 Nyavástaraꞌ, naataséjratyeꞌ aꞌ juyéj,
nyej nyij nyáaj jɨꞌréenyaꞌaj aꞌɨ́j jitze ucájrutyej.
Tyámuaꞌ paj jáaꞌuurej ɨ nyaj xɨéjnyuꞌcaa taꞌaj ij muaatyátzaahuatyeꞌen.
12 Nyavástaraꞌ pajta nyaj Dios,
néijmiꞌi nu ɨ nyaxɨéjnyuꞌcaa jɨn tyimuaatatyójtziꞌreꞌej
nyajta aꞌnáj tɨnaꞌaj tyámuaꞌ tyaataxájta ɨ paj jɨn ántyapuaj.
13 ¡Vaꞌtɨ́j pu nye jitze séejreꞌ ɨ paj jɨn nyaxɨeꞌveꞌ!
¡Nyaj japua paj huatanyúj nyej nyij quee aꞌáa joꞌtyáꞌɨtzeereꞌen joꞌmaj tyityajáꞌavaꞌtacaa!
14 Nyaj Dios, mueꞌtɨ́j mu ɨ maj axáa tyíꞌjepeꞌ majta ɨ tɨ huaꞌráanajchi maj junyoꞌsiꞌtyeꞌej
ɨ maj quee muéetzij muamuaꞌtyej,
aꞌɨ́ɨ mu nyéetzij nyéjchaꞌɨɨreꞌ majta jaxɨeꞌveꞌ maj naajéꞌcaj.
15 Pajta muáaj, Tavástaraꞌ,
Dios paj puéꞌeen tɨ tyámuaꞌ tyihuojóꞌmuaꞌraj pajta tyihuaꞌcuꞌvej,
pajta quee jiyeꞌtzín tyinyúꞌcacaa, muáaj paj jɨꞌréꞌcan jɨn taxɨeꞌveꞌ.
16 Naaséj, nyéetzij náꞌancuꞌvaxɨꞌ.
¡Pataꞌaj japuan huatányuunyij aꞌɨ́jcɨ ɨ tɨ muahuɨɨreꞌ!
¡Caꞌnyíjraꞌaj paj jaatáꞌan!
17 Tyámuaꞌ paj naa tyinaataséjratyeꞌen ɨ paj jɨn tyámuaꞌ tyíꞌtyevij,
mataꞌaj mij huatóotyeviꞌraꞌastaj matɨꞌɨj jaaséj aꞌɨ́ɨmaj ɨ maj nyaxanaꞌveꞌ.
¡Muáaj, Tavástaraꞌ, muáaj paj nyahuɨɨreꞌ pajta tyámuaꞌ tyinaatyéjeevij!