95
Tyicheꞌ tatyámuaꞌveꞌej tyetyuꞌtáchuiicaj ɨ Tavástaraꞌ jimi
1 Musioꞌváꞌjuꞌ, tyicheꞌ tatyámuaꞌveꞌej tyetyuꞌtáchuiicaj ɨ Tavástaraꞌ jimi;
tyicheꞌ tyuꞌtáchuiicaj aꞌɨ́jcɨ jimi ɨ tɨ tachaꞌɨj ajta tajapuá huatányuusij.
2 Tyicheꞌ tyeꞌtyóotziꞌreꞌej aꞌúun tyoꞌtyájrutyej joꞌtɨj aꞌɨ́ɨn jáꞌsejreꞌ,
tyajta jeꞌen jitzán maꞌcan tyuꞌtáchuiicaj.
3 Jiꞌnye aꞌɨ́jna ɨ Tavástaraꞌ ɨ Dios vaꞌcán pu jɨn séejreꞌ,
aꞌɨ́jna ɨ tɨ Rey jɨn tyiꞌtyéjvee néijmiꞌcaa jimi ɨ tajapuá maj tyíꞌhuɨɨreꞌ.
4 Aꞌɨ́ɨ pu ɨ jumuácaꞌ jitze jiꞌtyáaꞌ
néijmiꞌi ɨ cháanacaj ajta néijmiꞌi ɨ tɨ jitzán tyíꞌsejreꞌ,
aꞌɨ́ɨ pu jaꞌaꞌrij ɨ jɨríj tɨ jéetzeꞌ ajtɨ́tɨꞌɨjmee.
5 Aꞌɨ́ɨ pu ajta jaꞌaꞌrij ɨ jájrij, jiꞌnye aꞌɨ́ɨ pu jaatyátaahuacaꞌ,
jumuácaꞌ pu jɨn jaatyátaahuacaꞌ aꞌɨ́jcɨ ɨ chuéj tɨ huáchij.
6 Musioꞌváꞌjuꞌ, tyicheꞌ tyítunutaxɨꞌɨn tyajta jeꞌen jaatyáanajche,
tyicheꞌ tyítunutaxɨꞌɨn aꞌɨ́jcɨ jimi ɨ Tavástaraꞌ,
jiꞌnye aꞌɨ́ɨ pu táataahuacaꞌ.
7 Aꞌɨ́ɨ pu taj Dios puéꞌeen, tyajta ityáj tu tyeɨ́tyeristyamuaꞌmeꞌen puéꞌeen;
ityáj tu cányaꞌxɨɨ puéꞌeen tyaj aꞌáa jaꞌtávee joꞌtɨj aꞌɨ́ɨn tyajaꞌtachuéj.
Xáanamuajriꞌ ijíij jeꞌej tɨ aꞌɨ́ɨn tyíꞌxaj tɨ aꞌyan tɨjɨn:
8 “Caxu tyóonaamuan ɨ juxɨéjnyuꞌcaa tzajtaꞌ siatɨꞌɨj huarɨ́j aꞌájna a Meribá,
siatɨꞌɨj séej xɨcáaraꞌ jitze huarɨ́j aꞌájna a Masá, aꞌájna joꞌtɨj quee jáꞌtyiꞌtɨj,
9 matɨꞌɨj naatáhuaviiriꞌ nyaj tyiꞌtɨ́j jɨn aꞌyan huárɨnyij aꞌɨ́ɨmaj ɨ jáꞌmuahuasimuaꞌcɨꞌɨj,
tyij majta meríj tyíꞌsejracaꞌaj jeꞌej nyaj tyíꞌmuarɨeꞌcaꞌaj.
10 Huáꞌpuatyej nyinyiꞌraꞌaj nu áꞌtyeej nyaj nyúꞌcamuɨꞌ
aꞌɨ́ɨjma jimi ɨ tyeɨ́tyee,
nyajta aꞌyan tyuꞌtaxájtacaꞌ tɨjɨn: Aꞌíimaj ɨ tyeɨ́tyee huápuɨꞌɨj mu jeꞌej puaꞌaj tyityaajúꞌ,
¡camu jaꞌastej ɨ nyúucarij ɨ nyaj jɨn tyuꞌtaꞌíjtacaꞌ!”
11 Aꞌɨ́j nu jɨn nyenyuꞌcamuꞌuj aꞌyan nyetyaꞌtányaratziiriꞌ
maj quee aꞌáa joꞌtyáꞌɨtzeereꞌej joꞌmaj nye jimi jaꞌhuóosoꞌpeꞌen.”