7
1 Tsonsi majan fariseondeccu Jesúsnga catse'fa. Toya'caen majan Chiga manda'choma atesiansundeccu'qque Jerusaléne jipa tisenga catse'fa.
2 Tsa'caen jipa atte'fa majan Jesúsma shondosundeccu asettumbe'yi injanga otishimbe an'fa. Tise'pa nafattian'choma injiengembe'yi an'fasi afase'fa.
3 Nane fariseondeccu, poiyi'cco israendeccu'qque tise'pa tayopi'su coenzandeccu nafattian'choma in'jan'fa. Tsa'camba tsain'bitsse otishimbi'ta an'fambi.
4 Toya'caen anqque'su tiendane ji'a'qque otishimbi'ja an'fambi. Tsain'bitsse asettuye atesu'fa. Nane tasa, api, canderoma'qque tsa'caen giya'tsse cashi'fa.
5 Tsa'camba fariseondeccu, Chiga manda'choma atesiansundeccu Jesúsma iñajampaña'fa:
—¿Micomba tsu quema shondosundeccuja tayopi'su coenzandeccu nafattian'choma cati'fa? Nane asettu'choma injiengembe'yi tsu otishimbe an'fa.
6 Jesúsja su:
—Tansintsse tsu tayopi'su Isaíasja que'i ño'ame attiamba afopoensundeccune condase. Nane qquen tsu tiseja Chiga su'choma tevaen:
Va a'ija aqquia aya'fai'ccuyi Ñane ñotsse afa'fa.
Tsa'ma tisupa injama'chonijan Ñama chi'ga'fa.
7 Aqquia tsu Ñame in'janqquia'caen tsincon'fa.
Nane tise'pa atesian'jen'cho aqquia a'i in'jamba manda'choma tsu atesian'jen'fa.
8 Que'ija Chiga manda'choma catipa a'i nafattian'choma nafattu'fa. Tsa'camba qui tasa, api, canderoma'qque tsain'bitsse cashiye atesu'fa. Nane osha'choma'qque qui tsa'caen atesu'fa.
9 Toya'caen tsu Jesúsja su:
—Ñoa'me Chiga manda'choma qui cati'fa que'i coenzandeccu nafattian'choma nafattuye.
10 Tayopi'su Moisésta tsu su: “Paña'faja que yaya, que mamama.” Toya'caen “Majan tise yaya, tise mamama egae afa'ta tsu paya'cho.”
11 Tsa'ma que'ita qui antte'fa cuintsu dutssi'ye tise yaya, tise mamama suye: “Oshambi gi quema fuiteye. Pa'cco ña quema fuiteya'cho tsu ‘Corban’.” (Nane ‘Corban’ tsu ‘Chiganga afe'cho’ qquen su'cho.)
12 Tsa'caen su'ta qui que yaya, que mamama fuitembe cañe atesu'fa.
13 Nane tsa'camba qui Chiga Aya'fa su'choma pañambiqquia'caen antte'fa que'i a'i nafattian'choma pañañe. Tsa'caeñi qui osha'choma'qque tsincon'fa.
14 Qquen supa Jesús ccase aindeccuma ttu'sepa su:
—Poiyi'cco pañamba in'jan'faja.
15 Me'i tsu a'i aña'choma ansi injama'choma dañoñe. Tsa'ma egae in'jamba afasi egae afa'je'cho tsu tise injama'choma dañoña.
16 Majan tsosinapaja paña'faja.
17 Jesúsja afa nanimba a'i'ye joqquitssipa tsa'onga ca'ni. Ca'nisi tisema shondosundeccu tsa condase'chone tisema iñajampaña'fa.
18 Iñajampañasi Jesúsja su:
—¿Que'i'qque ti qui paña'fambi? Atesu'fambi ti qui osha'cho an'choja a'i injama'choma dañoña'bi.
19 Nane an'choja injama'chonga ca'nimbi. Tsa'ma ttopanga japa ccopai'ccu catiyeya'cho.
Jesúsja tsa'caen supa, osha'cho anqque'suja añe ñotssi qquen tsu su.
20 Toya'caen tsu su:
—A'i egae in'jamba afasi egae afa'je'cho tsu tise injama'choma dañoña.
21 Nane injama'cho tsosine egae in'jaensi a'ija egae in'jan'fa. Tsa'caen in'jamba tsu casara'chondeccu faesui'ccu egae can'se'fa. Injanga tsandie pushesu anttembi'chondeqquia fae'ngae egae can'se'fa. Cca'na'fa. Fi'tticco'fa.
22 Faesumbema an'biañe in'jan'fa. Egae canse'fa. Afopoen'fa faesuma egae tsoñe. A'tatsse egae tsincon'fa. Tisu injama'choni faesuma se'pi'fa. Afase'fa. Quinsepoen'fa. Nane sumbie daqquia'caen injanga tsincon'fa.
23 Pa'cco tsa'caen tson'cho tsu injama'cho tsosine sombo'cho. Sombopa tsu a'ima dañoña.
Faesu ande'su pushesu Jesúsve in'jan
(Mt 15.21-28)
24 Tse'ttie sombopa Jesúsja Tiro, Sidón canqque jini'su andeni ja. Napipa tsa'onga ca'nimba a'tutsse can'jeñe in'jan. Tsa'ma tayo a'i paña'fa tise can'jen'choma.
25 Tse'faei'ccuyi fae pushesu tisema pañamba jipa Jesús tsutteccofanga ccaru dyai. Tsambe onque'ngeja cocoya ca'ni'cho.
26 Tsa pushesuja griego a'i Sirofenisia andenga isu'cho. Tsa jipa Jesúsma iñajan cuintsu tise onque'nge'ye cocoyama joqquitssiañe.
27 Tsa'ma Jesúsja tisema su:
—Antteja cuintsu o'tie dushundeccu an tteppu'faye. Ñotssimbi tsu du'shu an'jen'choma itsapa ainga o'fiañe.
28 Tsa'ma tsa pushesuja su:
—Ju, na'su, ñotsse qui su. Tsa'ma ainshavaja an'jen'cho mesa tsosiccuni ccuipa dushundeccu an'jensi sheque'je'choma an'jen'fa.
29 Qquen susi Jesúsja su:
—Ñotsse qui su. Jaye qui osha. Tayo tsu cocoyaja que onque'nge'ye joqquitssi.
30 Tsa'caen susi tsaoni japa tise onque'ngema atte tayo cocoya joqquitssisi ana'jen'choni ccui'choma.
Jesúsja ccushaen tsonsinambima
31 Tsomba Jesúsja Tiro ande'ye sombopa Sidón canqquengae panshamba Decápolis andengae panshamba Galilea marnga napi.
32 Tseni napisi fae tsandie ayafambipa tsonsinambima Jesúsnga i'fa. Ipa Jesúsma iñajan'fa cuintsu tise tivei'ccu pporaemba ccushaeñe.
33 Tsonsi Jesúsja tsonsinambima a'i sheque'cho ccafanga anga. Angapa tisu tsimian'ccoi'ccu tsambe tsonsinama tsomi. Tsomba attuipa menzanza'fama'qque pporaen.
34 Tsomba sefacconima camba qquendyaccopa su:
—¡Efata! (Fettayeja, qquen tsu su.)
35 Tse'faei'ccuyi tsonsina fettayesi paña. Menzanza'fa'qque ccushasi tsu ñotsse afa.
36 Tsomba Jesús poiyi'ccoma mandapa su:
—Majangayi'qque conda'fajama.
Tsa'ma ti'tsse'tsse se'pi'choma tise'paja ti'tsse condase'fa.
37 Nane ñotsse can'boemba su'fa:
—Osha'choma tsu ñotsse tson. Tsonsinambima'qque pañaen. Ayafambima'qque afaen.
Jesús cuatro mil a'ima o'fian
(Mt 15.32-39)