3
Sca ti cña jiꞌi̱ ycuiꞌ Ndyosi nduꞌni ca taꞌa nguꞌ nu nguluꞌu chaꞌ jiꞌi̱ Jesús
1 Cuꞌma tyaꞌa ngusñi na chaꞌ jiꞌi̱ ycuiꞌ Ndyosi, tyucui tyempo loꞌo ngutiꞌi̱ naꞌ ca slo ma̱ nu ngua tya liꞌ, ná ngua ꞌna chcuiꞌ naꞌ lcaa chaꞌ nu ngua tiꞌ naꞌ chcui̱ꞌ loꞌo ma̱, chaꞌ bilya xñi tsoꞌo ma̱ chaꞌ jiꞌi̱ Xtyiꞌi ycuiꞌ Ndyosi nu nda Ni jiꞌna. Xti ti chaꞌ nchcuiꞌ naꞌ loꞌo ma̱ liꞌ, chaꞌ ñaꞌa̱ ti cuxi ti ngulacua tiꞌ ma̱. Ñiꞌya̱ laca nu sube cuañiꞌ, juaꞌa̱ ngua cuꞌma̱, chaꞌ bilya xñi tsoꞌo ma̱ chaꞌ jiꞌi̱ ycuiꞌ Ndyosi;
2 biꞌ chaꞌ tiyaꞌ ti nguluꞌu naꞌ scaa chaꞌ jiꞌi̱ ma̱. Ñiꞌya̱ laca loꞌo sca cubiꞌ cuañiꞌ, styiꞌ xtyaꞌa̱ ti ntyiꞌ cubiꞌ biꞌ, chaꞌ ná nchca cacu tsoꞌo; juaꞌa̱ ngua cuꞌma̱, chaꞌ ná ngua cuna tsoꞌo ma̱ scaa chaꞌ. Masi juani tya lyiji cuaꞌni yala ma̱ chaꞌ ca tsaꞌa̱ tsoꞌo ma̱,
3 chaꞌ ñaꞌa̱ ti tya ndiya la tiꞌ ma̱ ñaꞌa̱ chaꞌ cuxi nu ndyuꞌni ñati̱ chalyuu. Nu loꞌo liyeꞌ tiꞌ ma̱ jiꞌi̱ tyaꞌa ñati̱ ma̱, nu loꞌo lye nxu̱u̱ tyaꞌa ma̱, tyaca̱ꞌ tyijyuꞌ chaꞌ ndiya la tiꞌ ma̱ chaꞌ cuxi nu ntsuꞌu nde chalyuu. Tya nduꞌni ma̱ ñiꞌya̱ nu nduꞌni ñati̱ cuxi.
4 Nu loꞌo ñacui̱ sca nguꞌ tyaꞌa ma̱ chaꞌ ndiꞌya̱: “Ñati̱ jiꞌi̱ Pablo laca ya”, cuati ñacui̱ xaꞌ la nguꞌ tyaꞌa ma̱ chaꞌ ndiꞌya̱: “Ñati̱ jiꞌi̱ Apolos laca ya”, ñiꞌya̱ nduꞌni ñati̱ cuxi, juaꞌa̱ nduꞌni ma̱ liꞌ.
5 ¿Tilaca laca nu Apolos biꞌ lacua? ¿Tilaca laca naꞌ lacua? ¿Ha siꞌi cña jiꞌi̱ ycuiꞌ Ndyosi ndyuꞌni ca taꞌa ya? ¿Ha siꞌi xquiꞌya chaꞌ nda ya chaꞌ loꞌo ma̱, biꞌ chaꞌ ngusñi ma̱ chaꞌ jiꞌi̱ Cristo liꞌ? Cua laca cña ndyuꞌni scaa ya, la cuiꞌ cña ñiꞌya̱ nu cua nda ycuiꞌ nu Xuꞌna na chaꞌ cuaꞌni ya.
6 Ñiꞌya̱ laca sca ñati̱ nu cataa sca siꞌyu, loꞌo liꞌ chaca laca nu suꞌba hitya su̱u̱ na cuiñii biꞌ, juaꞌa̱ laca cuare loꞌo ma̱; naꞌ laca̱ nu ya̱a̱ ndachaꞌ naꞌ chaꞌ biꞌ jiꞌi̱ ma̱ su clyo, loꞌo tiyaꞌ la liꞌ ñaa Apolos nda la chaꞌ biꞌ loꞌo ma̱. Pana sca ti ycuiꞌ Ndyosi laca nu nduꞌni chaꞌ tyanu tsoꞌo chaꞌ biꞌ neꞌ cresiya jiꞌi̱ ma̱;
7 ná nduꞌni chaꞌ tilaca laca nu cua nda chaꞌ biꞌ loꞌo ma̱ tya clyo la, ná nduꞌni chaꞌ tilaca laca nu tya nda la chaꞌ biꞌ loꞌo ma̱ ca tiyaꞌ la. Sca ti ycuiꞌ Ndyosi laca nu ndulo tsa chaꞌ jiꞌi̱, chaꞌ ycuiꞌ Ndyosi laca nu nduꞌni chaꞌ tyanu tachaa chaꞌ jiꞌi̱ Ni neꞌ cresiya jiꞌi̱ ma̱.
8 Sca ti cuayáꞌ nduꞌni ya loꞌo tyaꞌa ya, masi nda ya chaꞌ loꞌo cuꞌma̱ su clyo, masi nclyuꞌu tsoꞌo la ya chaꞌ biꞌ jiꞌi̱ ma̱ ca tiyaꞌ la. Ycuiꞌ Ndyosi ni, tya ta la Ni chaꞌ tsoꞌo jiꞌi̱ ya, tsa ñaꞌa̱ nu ndyuꞌni tsoꞌo ya cña jiꞌi̱ Ni.
9 Tyaꞌa ndyuꞌni ya cña jiꞌi̱ ycuiꞌ Ndyosi laca cuare; loꞌo cuꞌma̱ ni, nduꞌni Ni cña neꞌ cresiya jiꞌi̱ ma̱, cña jiꞌi̱ ycuiꞌ Ndyosi laca biꞌ.
Loꞌo juaꞌa̱ taca ta naꞌ chaca cui̱i̱ loꞌo ma̱ juani: ñiꞌya̱ si laca ma̱ sca niꞌi̱ tonu, juaꞌa̱ laca ma̱ cuentya jiꞌi̱ ycuiꞌ Ndyosi;
10 loꞌo naꞌ, ñiꞌya̱ ntiꞌ sca cuityi niꞌi̱ cuentya jiꞌi̱ ycuiꞌ Ndyosi, juaꞌa̱ laca naꞌ loꞌo cuꞌma̱, laja loꞌo nclyuꞌu naꞌ jiꞌi̱ ma̱ chaꞌ jiꞌi̱ ycuiꞌ Ni. Ndiꞌya̱ ndyuꞌni naꞌ loꞌo ma̱: ñiꞌya̱ ntiꞌ si cua ngusta tsoꞌo naꞌ quiyaꞌ sca niꞌi̱, loꞌo liꞌ ndyalaa xaꞌ la nguꞌ cuityi chaꞌ cuaꞌni lyiji nguꞌ chaꞌ tyaꞌ niꞌi̱ biꞌ, biꞌ laca ñati̱ nu tyaꞌa ndyaꞌa̱ naꞌ cña nu cua nguluꞌu tsoꞌo la jiꞌi̱ ma̱. Lcaa nguꞌ cuityi ngaꞌa̱ chaꞌ culacua tiꞌ clyo ñiꞌya̱ ñaꞌa̱ xana tyaꞌ niꞌi̱; loꞌo juaꞌa̱ lcaa ya tyaꞌa ndyuꞌni ya cña, ngaꞌa̱ chaꞌ cuiꞌya tsoꞌo ya cuentya ñiꞌya̱ nu caca culuꞌu tsoꞌo la ya chaꞌ biꞌ jiꞌi̱ ñati̱.
11 Juaꞌa̱ laca chaꞌ lacua: cua laca ngusta ycuiꞌ Ndyosi jiꞌi̱ Jesucristo, chaꞌ sca ti yu biꞌ caca su̱u̱ lcaa chaꞌ biꞌ, chaꞌ ycuiꞌ Jesús laca nu ntucua quiyaꞌ chaꞌ nu cua ngusñi na jiꞌi̱ ycuiꞌ Ndyosi Sti na; ngaꞌaa ntsuꞌu xaꞌ la joꞌó xaꞌ la ñati̱ nu laca su̱u̱ chaꞌ biꞌ.
12 Ntsuꞌu nguꞌ tyaꞌa na nu nclyuꞌu tsoꞌo la jiꞌi̱ lcaa tyaꞌa na, ñiꞌya̱ ntiꞌ si cuiñá chca nguꞌ sca niꞌi̱ tsoꞌo, ñiꞌya̱ laca si tyaꞌ niꞌi̱ biꞌ masi loꞌo oro, masi loꞌo plata, masi loꞌo quee ndubi nu quiñaꞌa̱ tsa ngaꞌa̱ tyaꞌ niꞌi̱ biꞌ. Pana ntsuꞌu xaꞌ la nguꞌ tyaꞌa na nu cuxi la nclyuꞌu jiꞌi̱ tyaꞌa, ñiꞌya̱ laca si cuiñá chca nguꞌ sca niꞌi̱ yaca ti, nu cantaꞌ ti tyaꞌ loꞌo quii loꞌo quixi̱i̱ ti.
13 Tiyaꞌ la liꞌ loꞌo ca̱a̱ Jesucristo chaca quiyaꞌ chaꞌ cuaꞌni cuayáꞌ jiꞌi̱ ñati̱ chalyuu, liꞌ quijeloo chaꞌ jiꞌi̱ ycuiꞌ Ndyosi ñiꞌya̱ ñaꞌa̱ cña nu nguaꞌni scaa nguꞌ. Tsa̱ biꞌ tsaa cña nu nguaꞌni scaa ñati̱ lo sca quiiꞌ tlyu, chaꞌ cuaꞌni cuayáꞌ Ni jiꞌi̱; si tyaqui̱ cña biꞌ, ná tsoꞌo ngua cña biꞌ liꞌ; si ná tyaqui̱, liꞌ caca cuayáꞌ tiꞌ Ni chaꞌ tsoꞌo tsa cña biꞌ liꞌ.
14 Nu loꞌo talo cña nu nguaꞌni sca ñati̱ loꞌo cua ndyaa lo quiiꞌ biꞌ, liꞌ ta Ni chaꞌ tsoꞌo nu tyacua jiꞌi̱ ñati̱ biꞌ.
15 Cuati ñati̱ nu tyaqui̱ cña jiꞌi̱ lo quiiꞌ biꞌ, ngaꞌaa ñaꞌa̱ nguꞌ jiꞌi̱ liꞌ; chcunaꞌ cña biꞌ tsiyaꞌ ti. Pana tya culaá Ni jiꞌi̱ nguꞌ biꞌ, masi tya xi tya lyiji chaꞌ tyaqui̱ ycuiꞌ nguꞌ.
16-17 Nu laa tlyu su nduꞌni tlyu nguꞌ judío jiꞌi̱ ycuiꞌ Ndyosi tyacaꞌa tsa jiꞌi̱ Ni laca biꞌ, chaꞌ cuentya jiꞌi̱ Ni ndyaꞌ niꞌi̱ biꞌ; tyaala tsa ycuiꞌ Ni si cuaꞌni ñuꞌu̱ ñati̱ jiꞌi̱ laa biꞌ. Loꞌo cuꞌma̱ ni, tyucui ñaꞌa̱ taju cuꞌma̱ nu ngusñi ma̱ chaꞌ jiꞌi̱ Cristo, tyacaꞌa tsa ma̱ cuentya jiꞌi̱ ycuiꞌ Ndyosi; na cua ndyanu Xtyiꞌi ycuiꞌ Ndyosi neꞌ cresiya jiꞌi̱ ma̱. Loꞌo juaꞌa̱ cuaꞌni tye ycuiꞌ Ni jiꞌi̱ cua ñaꞌa̱ ca ñati̱ nu cuaꞌni ñuꞌu̱ tyucui̱i̱ jiꞌi̱ sca ñati̱ nu tyaꞌa ngusñi na chaꞌ jiꞌi̱ Jesús.
18 Cua ngusñi na chaꞌ jiꞌi̱ Cristo, biꞌ chaꞌ tsoꞌo la si ná cñiloꞌo na jiꞌi̱ ycuiꞌ ca na chaꞌ ngua tsa jiꞌna, ñiꞌya̱ nduꞌni ñati̱ chalyuu nu ngua tsa jiꞌi̱ nguꞌ. Ná tsoꞌo si juaꞌa̱ nclyacua tiꞌ na; ngaꞌa̱ chaꞌ culacua tiꞌ na chaꞌ ná ngua jiꞌna tsiyaꞌ ti, loꞌo liꞌ taca cuaꞌni ycuiꞌ Ndyosi chaꞌ caꞌya sca chaꞌ liñi hique na.
19 Masi nduꞌni ñati̱ chalyuu chaꞌ ngua tsa jiꞌi̱, chaꞌ tsoꞌo tsa nclyacua tiꞌ nguꞌ, siꞌi juaꞌa̱ ntiꞌ ycuiꞌ Ndyosi ñaꞌa̱ Ni jiꞌi̱ nguꞌ biꞌ; ná tsoꞌo tsiyaꞌ ti chaꞌ nu nchcuiꞌ ñati̱ chalyuu ntiꞌ Ni. Cua nscua sca chaꞌ lo quityi cusuꞌ nu nchcuiꞌ ndiꞌya̱: “Nduꞌni ycuiꞌ Ndyosi chaꞌ quichi̱ yaa chaꞌ hique ñati̱ chalyuu, masi tsoꞌo tsa nduꞌni nguꞌ ntiꞌ nguꞌ”, nacui̱ lo quityi.
20 Loꞌo ndiꞌya̱ laca chaꞌ nu nscua chaca seꞌi̱ lo quityi biꞌ: “Cua jlo tiꞌ ycuiꞌ Ndyosi chaꞌ ná tsoꞌo tsiyaꞌ ti chaꞌ nu nchcuiꞌ ñati̱ chalyuu nu nchca tsa jiꞌi̱ nduꞌni”.
21 Biꞌ chaꞌ ngaꞌaa cuaꞌni tyixi ma̱ loꞌo tyaꞌa ma̱, ngaꞌaa tyuꞌu lcaꞌa̱ tsa ma̱ jiꞌi̱ sca ti ñati̱ tyaꞌa ya. Cuentya jiꞌi̱ cuꞌma̱ laca cua ñaꞌa̱ ca tyaꞌa ndyuꞌni ya cña,
22 masi naꞌ, masi Apolos, masi Pedro; loꞌo juaꞌa̱ cuentya jiꞌi̱ cuꞌma̱ laca cua ñaꞌa̱ ca chaꞌ nu ndyaca nde chalyuu, masi luꞌú na, masi cua ngujuii na, masi sca chaꞌ nu ndyaca juani, masi sca chaꞌ nu caca tyempo nde loo la; cuentya jiꞌi̱ cuꞌma̱ laca lcaa chaꞌ nu ndyaca nde chalyuu lacua.
23 Pana cuꞌma̱ ni, cuentya jiꞌi̱ Cristo laca ma̱; loꞌo nu Cristo biꞌ, cuentya jiꞌi̱ ycuiꞌ Ndyosi laca Ni.