6
1 Cuꞌma̱ nguꞌ cuañiꞌ ni, tucuá ma̱ cña nu culo nguꞌ cusuꞌ jiꞌi̱ ma̱, chaꞌ cua ntiꞌ tsa ycuiꞌ Ndyosi nu Xuꞌna na chaꞌ cuaꞌni ma̱ juaꞌa̱.
2 Sca chaꞌ nu nda ycuiꞌ Ndyosi loꞌo ñati̱ tya clyo, ndiꞌya̱ nscua chaꞌ biꞌ: “Cuaꞌni chi̱ ma̱ loo sti ma̱, loo xtyaꞌa̱ ma̱”. Loꞌo liꞌ nda ycuiꞌ Ndyosi chaca chaꞌ loꞌo na si cuaꞌni na juaꞌa̱:
3 “Chaꞌ juaꞌa̱ caca tsoꞌo tyiquee ma̱; loꞌo liꞌ quiñaꞌa̱ yija̱ talo ma̱ tyiꞌi̱ ma̱ chalyuu”, nacui̱ ycuiꞌ Ndyosi.
4 Cuꞌma̱ nu laca ma̱ sti nu sube ni, ná suꞌba ñasi̱ꞌ ma̱ jiꞌi̱ sñiꞌ ma̱. Laja loꞌo ndyuꞌni cuꞌú ma̱ jiꞌi̱ sñiꞌ ma̱, tyaꞌni nguꞌ xi si chañi chaꞌ cuxi ndyuꞌni nguꞌ; culuꞌu tsoꞌo ma̱ jiꞌi̱ nguꞌ chaꞌ taca taquiyaꞌ nguꞌ chaꞌ jiꞌi̱ ycuiꞌ nu Xuꞌna na.
5 Cuꞌma̱ nguꞌ msu nu ngüiꞌya ñati̱ jiꞌi̱ ma̱ chaꞌ cuaꞌni ma̱ cña jiꞌi̱ nguꞌ laja ti, cuaꞌni ma̱ lcaa cña nu culo xuꞌna ma̱ jiꞌi̱ ma̱ nde loyuu chalyuu. Cube xi tiꞌ ma̱ ñiꞌya̱ nu cuaꞌni ma̱ cña jiꞌi̱ nguꞌ, chaꞌ tyucui tyiquee ma̱ cuaꞌni ma̱ cña biꞌ; cuaꞌni ma̱ cña biꞌ ñiꞌya̱ laca si cña jiꞌi̱ Cristo laca cña nu ndyuꞌni ma̱.
6 Cuaꞌni ma̱ cña jiꞌi̱ nguꞌ lacua; siꞌi na cuaꞌni ti ma̱ juaꞌa̱ chaꞌ tyanu tsoꞌo ma̱ loꞌo nguꞌ, nu loꞌo ndu̱ ti nguꞌ ndyiꞌya nguꞌ cuentya jiꞌi̱ ma̱ si ndyuꞌni ma̱ cña. Tsoꞌo la si tyiꞌu tiꞌ ma̱ chaꞌ la cuiꞌ msu jiꞌi̱ Cristo laca ma̱, biꞌ chaꞌ tyucui tyiquee ma̱ cuaꞌni ma̱ lcaa ñaꞌa̱ cña nu ntiꞌ ycuiꞌ Ndyosi chaꞌ cuaꞌni na.
7 Tsoꞌo ti cuaꞌni ma̱ lcaa cña lacua, tyiꞌu tiꞌ ma̱ chaꞌ cña jiꞌi̱ ycuiꞌ nu Xuꞌna na laca nu ndyuꞌni ma̱, siꞌi cña jiꞌi̱ ñati̱ chalyuu ti.
8 Ná nduꞌni chaꞌ masi msu nu ngüiꞌya ti ñati̱ laca ma̱, masi msu nu ndiꞌi̱ tsoꞌo ti laca ma̱; cua jlo tiꞌ na chaꞌ ycuiꞌ nu Xuꞌna na tya chaꞌ tsoꞌo jiꞌi̱ lcaa ñati̱ nu nduꞌni cña tsoꞌo cuentya jiꞌi̱ Ni.
9 Nu cuꞌma̱ nguꞌ xuꞌna msu biꞌ ni, la cuiꞌ juaꞌa̱ ngaꞌa̱ chaꞌ cñaꞌa̱si̱i̱ tsoꞌo ma̱ jiꞌi̱ msu jiꞌi̱ ma̱. Ná xcutsi̱i̱ ma̱ jiꞌi̱ nguꞌ, ni ná cuaꞌni tyaala ma̱ loꞌo nguꞌ biꞌ; tyiꞌu tiꞌ ma̱ chaꞌ sca ti nu Xuꞌna na laca loo jiꞌi̱ cuꞌma̱ loꞌo jiꞌi̱ nguꞌ biꞌ, loꞌo juaꞌa̱ sca ti cuayáꞌ nduꞌni Ni loꞌo cua ñaꞌa̱ ca ñati̱.
Yaꞌ xña nu cuaꞌnijoꞌo jiꞌi̱ nguꞌ nu ngusñi chaꞌ jiꞌi̱ Cristo, chaꞌ xu̱u̱ tyaꞌa nguꞌ loꞌo nu xñaꞌa̱
10 Juani ni, cuaꞌni ma̱ chaꞌ caca nguula tiꞌ tyiquee ma̱, chaꞌ stuꞌba ti nduꞌni ma̱ cña loꞌo ycuiꞌ nu Xuꞌna na, loꞌo juaꞌa̱ nguula tsa juersa ntsuꞌu jiꞌi̱ ycuiꞌ Ni.
11 Lcaa tyempo tyiꞌu tiꞌ ma̱ lcaa chaꞌ nu cua nda ycuiꞌ Ndyosi loꞌo ma̱, chaꞌ taca cuaꞌa ma̱ jiꞌi̱ ycuiꞌ ca ma̱, chaꞌ ná cñiloꞌo nu xñaꞌa̱ jiꞌi̱ ma̱.
12 Siꞌi na nxu̱u̱ tyaꞌa na loꞌo ñati̱ chalyuu ti, siyaꞌ la juersa ntsuꞌu jiꞌi̱ nguꞌ biꞌ; tyaꞌa cusu̱u̱ na laca lcaa cuiꞌi̱ cuxi nu ntsuꞌu nde cua̱. Nguula tsa nu biꞌ, hasta ngua tiꞌ biꞌ tyiji̱loo jiꞌi̱ ycuiꞌ Ndyosi; pana ná ngua jiꞌi̱. La cuiꞌ laca nu ngua tiꞌ caca xuꞌna chalyuu, loꞌo juaꞌa̱ nclyo biꞌ cña jiꞌi̱ ñati̱ chaꞌ cuaꞌni nguꞌ lcaa lo chaꞌ cuxi nde chalyuu juani.
13 Pana chaꞌ nu cua nchcuiꞌ ycuiꞌ Ndyosi loꞌo na ni, ñiꞌya̱ laca steꞌ sendaru nu ndyaꞌa̱ cusu̱u̱, juaꞌa̱ laca chaꞌ biꞌ; xcuiꞌ chcua̱ laca steꞌ sendaru chaꞌ cuaꞌa jiꞌi̱ ycuiꞌ ca nguꞌ. Taquiyaꞌ ma̱ jiꞌi̱ chaꞌ biꞌ, xñi tsoꞌo ma̱ jiꞌi̱ chaꞌ biꞌ juani; loꞌo tyalaa tyempo cuxi biꞌ, liꞌ taca talo ma̱ chaꞌ xu̱u̱ tyaꞌa ma̱ loꞌo nu xñaꞌa̱, chaꞌ ngusñi ma̱ chaꞌ tsoꞌo biꞌ, masi tyaꞌa cusu̱u̱ na laca nu xñaꞌa̱ biꞌ. Si juaꞌa̱ cuaꞌni ma̱, nu loꞌo tye chaꞌ cusu̱u̱ biꞌ, liꞌ tya tyu̱ ma̱ ñiꞌya̱ nu ndu̱ ti ma̱.
14 Biꞌ chaꞌ cuaꞌni tajuaꞌ ma̱ lacua; ñiꞌya̱ loꞌo ndyaaca̱ꞌ neꞌ sendaru loꞌo juata chaꞌ xñi caꞌa̱ tsoꞌo steꞌ nguꞌ, juaꞌa̱ cuꞌma̱, xñi tsoꞌo ma̱ chaꞌ nu nchcuiꞌ Ni biꞌ. Xcuiꞌ chaꞌ liñi chcuiꞌ ma̱, chaꞌ liꞌ taca xu̱u̱ tyaꞌa ma̱ loꞌo nu cuxi. Sca sendaru ni, ndyacu̱ꞌ chcua̱ lo tyiquee yu loꞌo nde chu̱ꞌ yu, chaꞌ cuaꞌa yu jiꞌi̱ tyiquee yu. Loꞌo juaꞌa̱ cuꞌma̱, ná taca sta nguꞌ quiꞌya jiꞌi̱ ma̱ si xcuiꞌ chaꞌ liñi nduꞌni ma̱.
15 Ndyuꞌu xapatu quiyaꞌ sendaru. Loꞌo juaꞌa̱ cuꞌma̱ ni, quiñi tiꞌ ma̱ chaꞌ tsaa chcuiꞌ ma̱ chaꞌ jiꞌi̱ ycuiꞌ Ndyosi loꞌo ñati̱; chcuiꞌ ma̱ chaꞌ taca cuaꞌni lyaá Ni jiꞌi̱ nguꞌ biꞌ chaꞌ taca cuaꞌni Ni chaꞌ ti̱ ti tyiꞌi̱ tyiquee nguꞌ.
16 Loꞌo juaꞌa̱ ndacui sca chcua̱ cuajaꞌ yaꞌ sendaru; nu loꞌo cu̱ tyaꞌa cusu̱u̱ yu clya nu ngaꞌa̱ quiiꞌ lo jiꞌi̱ yu, liꞌ cuaꞌa yu jiꞌi̱ ycuiꞌ ca yu loꞌo chcua̱ cuajaꞌ biꞌ. Juaꞌa̱ caca jiꞌi̱ ma̱ si chañi chaꞌ ngusñi ma̱ chaꞌ jiꞌi̱ ycuiꞌ Ndyosi, taca cuaꞌa ma̱ jiꞌi̱ ycuiꞌ ca ma̱ lcaa hora chaꞌ ná cuaꞌni lyaꞌ tiꞌ nu cuxi jiꞌi̱ ma̱.
17 Smalyu chcua̱ ntucua hique nguꞌ sendaru chaꞌ cuaꞌa jiꞌi̱ hique nguꞌ. Loꞌo juaꞌa̱ cuꞌma̱, cua nguaꞌni lyaá Ni jiꞌi̱ ma̱, biꞌ chaꞌ ntsuꞌu nu ñaꞌa̱si̱i̱ jiꞌi̱ ma̱ liꞌ. Xñi ma̱ lcaa chaꞌ nu nda Xtyiꞌi ycuiꞌ Ndyosi loꞌo ma̱ chaꞌ caja ñiꞌya̱ nu chcuiꞌ ma̱ loꞌo sca ñati̱, ñiꞌya̱ laca si cua ngusñi ma̱ sca maxtyi cusu̱u̱ jiꞌi̱ sendaru.
18 Chcuiꞌ ma̱ loꞌo ycuiꞌ Ndyosi nu loꞌo nxu̱u̱ tyaꞌa ma̱ loꞌo nu cuxi, chaꞌ jña ma̱ chacuayáꞌ jiꞌi̱ Ni; lcaa tyempo xtyucua Xtyiꞌi ycuiꞌ Ndyosi jiꞌi̱ ma̱ chaꞌ taca chcuiꞌ ma̱ loꞌo Ni. Loꞌo juaꞌa̱ chcuiꞌ ma̱ loꞌo Ni cuentya jiꞌi̱ lcaa ñati̱ nu cua ngusñi chaꞌ jiꞌi̱ Ni. Biꞌ chaꞌ lacua, tii ti tiꞌ ma̱ chcuiꞌ ma̱ loꞌo Ni, chaꞌ ná ca taja tiꞌ ma̱.
19 La cuiꞌ juaꞌa̱ tsoꞌo si chcuiꞌ ma̱ loꞌo ycuiꞌ Ndyosi Sti na cuentya jnaꞌ, chaꞌ tya ta la Ni chaꞌ nu chcuiꞌ naꞌ loꞌo ñati̱, chaꞌ caca tlyu la tyiquee naꞌ chcuiꞌ naꞌ loꞌo ñati̱ ñaꞌa̱ cuayáꞌ nu ca cuayáꞌ tiꞌ nguꞌ chaꞌ taca cuaꞌni lyaá Cristo jiꞌi̱ nguꞌ yaꞌ nu cuxi; sca chaꞌ nu bilya cuna nguꞌ laca biꞌ.
20 Cua ngusubi Ni ꞌna chaꞌ tsaꞌa̱ tyijyuꞌ, chaꞌ ta naꞌ chaꞌ biꞌ loꞌo ñati̱; biꞌ chaꞌ laca naꞌ preso juani. Chcuiꞌ ma̱ loꞌo ycuiꞌ Ndyosi cuentya jnaꞌ lacua, chaꞌ taca chcuiꞌ liñi naꞌ chaꞌ biꞌ loꞌo ñati̱, ñiꞌya̱ nu ngaꞌa̱ chaꞌ chcuiꞌ naꞌ.
Ngusalyaꞌ Pablo loꞌo nguꞌ
21 Cua nda naꞌ jiꞌi̱ yu Tíquico chaꞌ ca̱a̱ slo ma̱. Tsoꞌo tsa ntsuꞌu tyiquee ya chaꞌ stuꞌba tsa nduꞌni ya cña jiꞌi̱ ycuiꞌ nu Xuꞌna na loꞌo yu. Cachaꞌ lyiji yu jiꞌi̱ ma̱ lcaa chaꞌ ñiꞌya̱ nu ndyaca ꞌna ca nde, ñiꞌya̱ cña nu ndyuꞌni naꞌ.
22 Biꞌ chaꞌ cua nda naꞌ jiꞌi̱ yu lijya̱ yu slo cuꞌma̱, chaꞌ tsoꞌo la tyanu tyiquee ma̱ loꞌo cuna ma̱ ñiꞌya̱ nu ndyaca chaꞌ jiꞌi̱ cuare.
23 Chcuiꞌ naꞌ loꞌo ycuiꞌ Ndyosi Sti na, loꞌo juaꞌa̱ loꞌo Jesucristo nu Xuꞌna na cuentya jiꞌi̱ cuꞌma̱ tyaꞌa ngusñi na chaꞌ jiꞌi̱ Cristo; cuaꞌni Ni chaꞌ ti̱ ti tyiꞌi̱ tyiquee ma̱, chaꞌ tsoꞌo ti tyuꞌu tyiquee ma̱ ñaꞌa̱ ma̱ jiꞌi̱ tyaꞌa na, chaꞌ lcaa tyempo jlya tiꞌ ma̱ jiꞌi̱ ycuiꞌ Ndyosi.
24 Loꞌo juaꞌa̱ ntiꞌ naꞌ chaꞌ ñaꞌa̱ ti cuaꞌni Ni chaꞌ tsoꞌo loꞌo lcaa cuꞌma̱ nu ntsuꞌu tyiquee ma̱ jiꞌi̱ Jesucristo nu Xuꞌna na, cuꞌma̱ nu ngaꞌaa ntiꞌ tyaꞌa̱chu̱ꞌ ma̱ jiꞌi̱ Cristo. Chañi chaꞌ juaꞌa̱ caca chaꞌ biꞌ.