4
Ñiꞌya̱ ngua jiꞌi̱ Abraham
1 Juani ta naꞌ sca chaꞌ loꞌo ma̱ ñiꞌya̱ ngua jiꞌi̱ Abraham, nu jyoꞌo cusuꞌ jiꞌna nu ngua tya saꞌni.
2 Ycuiꞌ ca Abraham ni, ná ngua cuaꞌni yu chaꞌ ca tsoꞌo cresiya jiꞌi̱ ycuiꞌ ca yu cuentya jiꞌi̱ ycuiꞌ Ndyosi, ni ná ngua jiꞌi̱ yu xacui̱ yu chaꞌ jiꞌi̱ ycuiꞌ Ndyosi chaꞌ ngua jiꞌi̱ ycuiꞌ yu.
3 Nde laca chaꞌ nu nscua lo quityi jiꞌi̱ ycuiꞌ Ndyosi: “Ngusñi Abraham chaꞌ nu nda ycuiꞌ Ndyosi loꞌo yu; biꞌ chaꞌ ngüiñi chaꞌ jiꞌi̱ Ni loꞌo yu chaꞌ caca tsoꞌo cresiya jiꞌi̱ yu, xquiꞌya chaꞌ jlya ti tiꞌ yu jiꞌi̱ Ni”. Juaꞌa̱ nscua lo quityi biꞌ.
4 Loꞌo ndyaꞌa̱ na neꞌ xña jiꞌi̱ ñati̱ ni, nda nguꞌ xcayaꞌ na liꞌ; siꞌi na nda laja ti nguꞌ cñi jiꞌna, cñi nu ndacui nguꞌ jiꞌna laca, chaꞌ nguaꞌni na cña.
5 Pana nu loꞌo jlya ti tiꞌ na jiꞌi̱ Jesús chaꞌ ngulotsuꞌ yu yabeꞌ nu ntsuꞌu jiꞌna, liꞌ taca xquiñi Ni chaꞌ jiꞌi̱ Ni loꞌo na chaꞌ caca tsoꞌo cresiya jiꞌna, masi ná sca na ndacui Ni jiꞌna.
6 Tya saꞌni la nacui̱ jyoꞌo David chaꞌ tsoꞌo tsa ntsuꞌu tyiquee ñati̱ nu cua laca nguaꞌni lubii ycuiꞌ Ndyosi cresiya jiꞌi̱. Cua nacui̱ Ni chaꞌ lubii cresiya jiꞌi̱ nguꞌ, masi ná sca cña nguaꞌni nguꞌ cuentya jiꞌi̱ Ni chaꞌ caca lubii ycuiꞌ nguꞌ.
7 Liꞌ nacui̱ David ndiꞌya̱:
Tsoꞌo ntsuꞌu tyiquee na loꞌo cuaꞌni clyu tiꞌ Ni jiꞌna jiꞌi̱ quiꞌya nu ntsuꞌu jiꞌna, loꞌo culotsuꞌ Ni yabeꞌ nu ntsuꞌu jiꞌna, nacui̱.
8 Tsoꞌo ntsuꞌu tyiquee na si ngaꞌaa cuaꞌni Ni cuentya jiꞌi̱ lcaa chaꞌ cuxi nu cua nguaꞌni na.
9 Siꞌi xcuiꞌ nguꞌ judío ti nu tsoꞌo ntsuꞌu tyiquee nguꞌ juaꞌa̱, taca ñacui̱ na chaꞌ loꞌo nguꞌ xaꞌ tsuꞌ caca tsoꞌo tyiquee nguꞌ juaꞌa̱. Cua nchcuiꞌ ca ti na chaꞌ ngusñi Abraham chaꞌ nu nda ycuiꞌ Ndyosi loꞌo yu, biꞌ chaꞌ cua nacui̱ Ni jiꞌi̱ yu chaꞌ ca tsoꞌo cresiya jiꞌi̱ yu cuentya jiꞌi̱ ycuiꞌ Ndyosi, xquiꞌya chaꞌ jlya ti tiꞌ yu jiꞌi̱ Ni.
10 ¿Ni jacuaꞌ ngua chaꞌ biꞌ? ¿Ha cua laca chaꞌ cua nsiꞌyu lo quiji̱ yu ñiꞌya̱ nu nduꞌni nguꞌ judío chaꞌ clyacua̱ nguꞌ? Siꞌi. Tya lyiji xiꞌyu nguꞌ quiji̱ yu tyempo biꞌ;
11 ca tiyaꞌ la, liꞌ ngulacua̱ yu juaꞌa̱. Sca cuayáꞌ ti ngua biꞌ, chaꞌ caca cuayáꞌ tiꞌ nguꞌ chaꞌ ngua tsoꞌo cresiya jiꞌi̱ yu cuentya jiꞌi̱ ycuiꞌ Ndyosi, nu loꞌo jlya ti tiꞌ yu jiꞌi̱ Ni. Yala la ngua chaꞌ ngusñi yu chaꞌ jiꞌi̱ ycuiꞌ Ndyosi, tiyaꞌ la ngulacua̱ yu. Biꞌ chaꞌ lcaa ma̱ nu ntsuꞌu ma̱ xaꞌ tsuꞌ nu ngusñi ma̱ chaꞌ jiꞌi̱ Jesús, laca ma̱ ñiꞌya̱ laca si Abraham laca jyoꞌo cusuꞌ jiꞌi̱ ma̱ nu ya̱a̱ chalyuu tya clyo la. Loꞌo xñi cua ñaꞌa̱ ca na chaꞌ jiꞌi̱ Jesús, liꞌ quiñi chaꞌ jiꞌi̱ ycuiꞌ Ndyosi loꞌo na chaꞌ caca lubii cresiya jiꞌna.
12 La cuiꞌ juaꞌa̱ laca tyiquee nguꞌ judío tyaꞌa na nu stuꞌba ti ngusñi chaꞌ jiꞌi̱ Jesucristo loꞌo na. Chañi chaꞌ Abraham ngua jyoꞌo cusuꞌ jiꞌi̱ nguꞌ; pana tsoꞌo la chaꞌ jlya ti tiꞌ nguꞌ jiꞌi̱ ycuiꞌ Ndyosi, ñiꞌya̱ jlya tiꞌ nu jyoꞌo Abraham biꞌ, masi tya lyiji clyacua̱ yu.
Ngüiñi chaꞌ jiꞌi̱ Ni loꞌo ñati̱ xquiꞌya chaꞌ jlya tiꞌ nguꞌ jiꞌi̱ cña nu nguaꞌni Jesús
13 Loꞌo juaꞌa̱ ngua chaꞌ ngüiñi chaꞌ jiꞌi̱ ycuiꞌ Ndyosi loꞌo jyoꞌo Abraham, loꞌo ñati̱ jiꞌi̱ Abraham nu ñaa chalyuu ca tiyaꞌ la; nacui̱ Ni chaꞌ tyucui ñaꞌa̱ chalyuu caca jiꞌi̱ nguꞌ biꞌ ca tiyaꞌ la. Pana bilya ta Ni chaꞌ loꞌo jyoꞌo Moisés nu ngua liꞌ, chaꞌ bilya cala nu Moisés biꞌ; biꞌ chaꞌ ná ndaquiyaꞌ jyoꞌo Abraham jiꞌi̱ cña nu ngulo Moisés, chaꞌ tya lyiji caja chaꞌ biꞌ jiꞌi̱ nguꞌ. Ngua tsoꞌo cresiya jiꞌi̱ nguꞌ biꞌ cuentya jiꞌi̱ ycuiꞌ Ndyosi xquiꞌya chaꞌ jlya tiꞌ nguꞌ jiꞌi̱ chaꞌ nu nchcuiꞌ Ni, biꞌ chaꞌ ngüiñi chaꞌ jiꞌi̱ Ni loꞌo nguꞌ.
14 Ná ntiꞌ ycuiꞌ Ndyosi chaꞌ tsa lo cua ti nguꞌ caja chalyuu cucui jiꞌi̱ nguꞌ, nguꞌ nu taquiyaꞌ jiꞌi̱ lcaa chaꞌ nu nda jyoꞌo cusuꞌ loꞌo nguꞌ; tya ntiꞌ Ni chaꞌ xñi cua ñaꞌa̱ ca ñati̱ chaꞌ jiꞌi̱ Jesús, chaꞌ juaꞌa̱ ti taca quiñi chaꞌ jiꞌi̱ ycuiꞌ Ndyosi loꞌo nguꞌ liꞌ.
15 Xcuiꞌ na xcubeꞌ ti Ni jiꞌna, nu loꞌo caca cuayáꞌ jiꞌna slo ycuiꞌ Ndyosi cuentya jiꞌi̱ chaꞌ cusuꞌ biꞌ; pana ná caja ñiꞌya̱ nu sta Ni quiꞌya jiꞌna si ná nscua sca chaꞌ nu ndacaꞌa jiꞌna juaꞌa̱.
16 Ngüiñi chaꞌ jiꞌi̱ Ni loꞌo jyoꞌo Abraham loꞌo ngusñi ti yu chaꞌ jiꞌi̱ Ni, chaꞌ caca cuayáꞌ tiꞌ lcaa na chaꞌ xcuiꞌ chaꞌ tsoꞌo ntsuꞌu tyiquee Ni; biꞌ chaꞌ nda Ni chaꞌ biꞌ loꞌo na. Ndyanu chaꞌ biꞌ jiꞌi̱ lcaa ñati̱ jiꞌi̱ Abraham nu cala chalyuu ca nde loo la. Ni siꞌi tsa lo cua ti ñati̱ nu taquiyaꞌ jiꞌi̱ chaꞌ cusuꞌ ti laca nu tyanu chaꞌ tsoꞌo biꞌ jiꞌi̱, la cuiꞌ juaꞌa̱ tyanu chaꞌ biꞌ jiꞌi̱ lcaa ñati̱ tyaꞌa na nu xñi na chaꞌ jiꞌi̱ ycuiꞌ Ndyosi ñiꞌya̱ ngusñi ycuiꞌ Abraham chaꞌ jiꞌi̱ Ni; juaꞌa̱ ntiꞌ na loꞌo nacui̱ na chaꞌ sti lcaa na ngua jyoꞌo Abraham biꞌ cuentya jiꞌi̱ ycuiꞌ Ndyosi.
17 Ndiꞌya̱ nchcuiꞌ chaꞌ nu nda Ni loꞌo Abraham, nu nscua lo quityi: “Cua nda naꞌ chacuayáꞌ chaꞌ caca nuꞌu̱ sti tyu̱u̱ lo tyaꞌa ñati̱ nu catu̱ chalyuu nde loo la”, nacui̱ Ni jiꞌi̱ Abraham. Cua ngüiñi chaꞌ jiꞌi̱ ycuiꞌ Ndyosi loꞌo jyoꞌo Abraham saꞌni, chaꞌ ngusñi yu chaꞌ nu cua nchcuiꞌ ycuiꞌ Ndyosi loꞌo yu, la cuiꞌ Ni nu ndyuꞌni chaꞌ tyuꞌú jyoꞌo chaca quiyaꞌ. Loꞌo juaꞌa̱ ngulo Ni cña chaꞌ tyuꞌu tucua lcaa chaꞌ nde loo la, chaꞌ nu cua nacui̱ Ni jiꞌi̱ yu loꞌo nchcuiꞌ Ni ñiꞌya̱ si cua laca ndiꞌi̱ chaꞌ biꞌ jiꞌi̱ yu nu ngua liꞌ.
18 Masi ngua tiꞌ jyoꞌo Abraham chaꞌ ná caja sñiꞌ, ná ndube tiꞌ yu; jlya tiꞌ yu jiꞌi̱ ycuiꞌ Ndyosi, ntajatya yu ni jacuaꞌ caja sñiꞌ yu. Biꞌ chaꞌ ngua jyoꞌo Abraham sti tyu̱u̱ tyaꞌa ñati̱ nu ndyatu̱ lo yuu ca nde loo la, ñiꞌya̱ nu cua nchcuiꞌ Ni loꞌo yu: “Quiñaꞌa̱ tsa ñati̱ tyuꞌu jinuꞌu̱ tyempo nde loo la”, nacui̱ Ni jiꞌi̱ yu.
19 Ná ngujlyaa tiꞌ Abraham chaꞌ biꞌ; ñaꞌa̱ ti jlya tiꞌ yu chaꞌ nu cua nda ycuiꞌ Ndyosi loꞌo yu, masi ndube tiꞌ yu chaꞌ ngusuꞌ tsa yu, chaꞌ cua tyalaa ti sca siyento yija̱ ntsuꞌu yu. Jlo tiꞌ yu chaꞌ cua ngulala ti cajaa tyucuaa nguꞌ, loꞌo ycuiꞌ, loꞌo maꞌ Sara clyoꞌo yu; ngaꞌaa ntsuꞌu tyempo chaꞌ caja sñiꞌ Sara, ngua tiꞌ yu.
20 Pana ná ngutaꞌa̱chu̱ꞌ yu, ná ngujlyaa tiꞌ yu chaꞌ nu cua nchcuiꞌ Ni loꞌo yu; jlya tsoꞌo tiꞌ yu chaꞌ biꞌ. Nguaꞌni tlyu yu jiꞌi̱ ycuiꞌ Ndyosi,
21 chaꞌ jlo tiꞌ yu chaꞌ taca jiꞌi̱ Ni cuaꞌni lyiji Ni jiꞌi̱ chaꞌ nu ngüiñi jiꞌi̱ Ni loꞌo yu.
22 Biꞌ chaꞌ nda Ni chacuayáꞌ chaꞌ caca tsoꞌo cresiya jiꞌi̱ yu, xquiꞌya chaꞌ jlya tsa tiꞌ yu jiꞌi̱ Ni.
23 Juaꞌa̱ nscua lcaa chaꞌ biꞌ lo quityi nu nchcuiꞌ chaꞌ ngüiñi chaꞌ jiꞌi̱ Ni loꞌo nu Abraham biꞌ, chaꞌ ngua tsoꞌo cresiya jiꞌi̱ yu loꞌo ngusñi ti yu chaꞌ jiꞌi̱ ycuiꞌ Ni. Siꞌi cuentya jiꞌi̱ jyoꞌo Abraham ti nscua chaꞌ biꞌ,
24 masi loꞌo cuentya jiꞌna nscua chaꞌ caca juaꞌa̱; loꞌo jiꞌna cua nchcuiꞌ ycuiꞌ Ndyosi chaꞌ caca tsoꞌo cresiya jiꞌna cuentya jiꞌi̱ ycuiꞌ Ni si xñi na chaꞌ jiꞌi̱ Ni, la cuiꞌ Ni nu nguaꞌni chaꞌ ndyuꞌú Jesús nu Xuꞌna na chaca quiyaꞌ loꞌo ngujuii yu.
25 Nda Ni chacuayáꞌ cujuii nguꞌ jiꞌi̱ Jesús, chaꞌ cuityi̱ quiꞌya nu ntsuꞌu jiꞌna; loꞌo liꞌ ndyuꞌú Jesús chaca quiyaꞌ, chaꞌ caca tsoꞌo cresiya jiꞌna cuentya jiꞌi̱ ycuiꞌ Ndyosi.