8
Chalyuu cucui nu ntsuꞌu jiꞌi̱ nguꞌ xquiꞌya Xtyiꞌi ycuiꞌ Ndyosi
1 Pana juani ni, ndiꞌya̱ nguaꞌni ycuiꞌ Ndyosi: Ngaꞌaa ndyanu yabeꞌ hichu̱ꞌ na, si stuꞌba ntsuꞌu chaꞌ jiꞌna loꞌo Jesucristo; ngaꞌaa taca jiꞌi̱ nu cuxi nu ntsuꞌu chalyuu cojolaqui jiꞌna juani, chaꞌ Xtyiꞌi ycuiꞌ Ndyosi laca loo jiꞌna loꞌo ndiꞌi̱ na nde chalyuu.
2 Nu loꞌo laca Xtyiꞌi ycuiꞌ Ndyosi loo jiꞌna, liꞌ caja chalyuu cucui jiꞌna xquiꞌya Jesucristo, chaꞌ stuꞌba ntsuꞌu chaꞌ jiꞌna loꞌo Ni; na cua ngulo Ni jiꞌna yaꞌ nu cuxi nu ndyuꞌni chaꞌ chcunaꞌ chalyuu jiꞌna.
3 Cua nguaꞌni Ni sca chaꞌ tlyu nu ná ngua cuaꞌni nu chaꞌ cusuꞌ nu nda jyoꞌo Moisés loꞌo ñati̱ nu ngua saꞌni. Ná ngua cña chaꞌ biꞌ, xquiꞌya chaꞌ cuxi tsa tyiquee ñati̱ chalyuu na; pana ngua jiꞌi̱ ycuiꞌ Ndyosi cuaꞌni chaꞌ tlyu biꞌ, nu loꞌo nda Ni jiꞌi̱ Sñiꞌ ycuiꞌ ca Ni ya̱a̱ chalyuu re chaꞌ ngua ñati̱. Nda Ni jiꞌi̱ nu Jesús biꞌ ya̱a̱, chaꞌ caca yu sca msta̱ luꞌú; biꞌ laca msta̱ nu ngua jiꞌi̱ cuityi̱ quiꞌya nu ntsuꞌu jiꞌna. Ngua Jesús ñati̱; stuꞌba ti ngua yu ñiꞌya̱ laca cua ñaꞌa̱ ca ñati̱ chalyuu, chaꞌ juaꞌa̱ ngua jiꞌi̱ yu cuaꞌni tye yu jiꞌi̱ quiꞌya nu ntsuꞌu jiꞌi̱ ñati̱ cuxi na. Biꞌ chaꞌ ngua Ni ñati̱.
4 Loꞌo nu juani taca cuaꞌni na cña nu ngulo Ni jiꞌna, la cuiꞌ cña laca nu nchcuiꞌ chaꞌ cusuꞌ biꞌ chaꞌ cuaꞌni na; taca cuaꞌni na jiꞌi̱ juani, xquiꞌya chaꞌ ngaꞌaa caca cojolaqui nu cuxi nu ntsuꞌu chalyuu jiꞌna, chaꞌ Xtyiꞌi ycuiꞌ Ndyosi laca loo jiꞌna loꞌo ndiꞌi̱ na chalyuu juani.
5 Nu loꞌo cuaꞌni na ñiꞌya̱ nu nduꞌni ñati̱ chalyuu ti, la cuiꞌ chaꞌ cuxi nu ntsuꞌu jiꞌi̱ ñati̱ biꞌ, biꞌ laca loo neꞌ cresiya jiꞌna liꞌ; pana si Xtyiꞌi ycuiꞌ Ndyosi laca loo jiꞌna loꞌo ndiꞌi̱ na chalyuu, liꞌ taca taquiyaꞌ na jiꞌi̱ lcaa chaꞌ nu nchcuiꞌ ycuiꞌ Ndyosi.
6 Chcunaꞌ chalyuu jiꞌna, si xcuiꞌ cuaꞌni na chaꞌ cuxi nu ntsuꞌu nde chalyuu ti; pana caja chalyuu cucui jiꞌna chaꞌ ti̱ ti tyiꞌi̱ tyiquee na, si taquiyaꞌ na jiꞌi̱ lcaa chaꞌ nu nchcuiꞌ ycuiꞌ Ndyosi.
7 Tyaꞌa cusu̱u̱ ycuiꞌ Ndyosi laca na, si ñaꞌa̱ ti nduꞌni na chaꞌ cuxi ñiꞌya̱ nu nduꞌni ñati̱ chalyuu ti; ná nchca jiꞌna tsiyaꞌ ti taquiyaꞌ na jiꞌi̱ chaꞌ nu nda ycuiꞌ Ni loꞌo na, si ñaꞌa̱ ti tya ntiꞌ na cuaꞌni na chaꞌ cuxi.
8 Biꞌ chaꞌ ná taca jiꞌna cuaꞌni na cña nu ntiꞌ ycuiꞌ Ni chaꞌ cuaꞌni na, si tiji̱ꞌ tsa tiꞌ na jiꞌi̱ chaꞌ cuxi nu ntsuꞌu chalyuu.
9 Ngaꞌaa siꞌi juaꞌa̱ ndiꞌi̱ ma̱ juani, ngaꞌaa nchca tiji̱ꞌ tiꞌ ma̱ jiꞌi̱ chaꞌ cuxi nu ntsuꞌu nde chalyuu; stuꞌba ntsuꞌu chaꞌ jiꞌi̱ ma̱ loꞌo ycuiꞌ Ndyosi juani, chaꞌ cua nda ycuiꞌ Ndyosi Xtyiꞌi Ni chaꞌ tyanu neꞌ cresiya jiꞌi̱ ma̱. Loꞌo juaꞌa̱ ná ntsuꞌu chaꞌ jiꞌna loꞌo Cristo tsiyaꞌ ti, si bilya tyanu Xtyiꞌi ycuiꞌ Ni neꞌ cresiya jiꞌna, la cuiꞌ Xtyiꞌi nu ndyuꞌu jiꞌi̱ Cristo.
10 Masi nguaꞌni nu cuxi nu ntsuꞌu chalyuu chaꞌ chcunaꞌ chalyuu jiꞌi̱ ma̱, pana tya luꞌú ma̱ juani, xquiꞌya chaꞌ luꞌú Xtyiꞌi ycuiꞌ Ni neꞌ cresiya jiꞌi̱ ma̱ si ntsuꞌu chaꞌ jiꞌi̱ ma̱ loꞌo Cristo. Ndyanu Xtyiꞌi ycuiꞌ Ni loꞌo ma̱ nu loꞌo ngua tsoꞌo cresiya jiꞌi̱ ma̱ cuentya jiꞌi̱ ycuiꞌ Ndyosi chacuayáꞌ jiꞌi̱ Jesús.
11 La cuiꞌ Xtyiꞌi ycuiꞌ Ndyosi laca biꞌ, la cuiꞌ laca nu ngulo jiꞌi̱ jyoꞌo Jesús ca su ntsiya nguatsiꞌ, ndyuꞌú yu chaca quiyaꞌ liꞌ. Loꞌo juaꞌa̱ cua nda ycuiꞌ Ndyosi Xtyiꞌi ycuiꞌ Ni chaꞌ tyanu neꞌ cresiya jiꞌi̱ ma̱, chaꞌ nu loꞌo cajaa ma̱, liꞌ cuaꞌni Ni chaꞌ tyuꞌú ma̱ chaca quiyaꞌ xquiꞌya Xtyiꞌi ycuiꞌ Ni.
12 Cuꞌma̱ nguꞌ tyaꞌa ntsuꞌu chaꞌ jiꞌna loꞌo Cristo, juani ngaꞌaa caca jiꞌi̱ ñati̱ culo nguꞌ cña jiꞌna, chaꞌ cuaꞌni na chaꞌ cuxi ñiꞌya̱ nduꞌni ñati̱ chalyuu ti.
13 Chcunaꞌ chalyuu jiꞌi̱ ma̱ si xcuiꞌ culana ma̱ jiꞌi̱ chaꞌ cuxi loꞌo ndiꞌi̱ ma̱ chalyuu; pana chacuayáꞌ jiꞌi̱ Xtyiꞌi ycuiꞌ Ni taca tyiji̱loo ma̱ jiꞌi̱ chaꞌ cuxi nu ntsuꞌu jiꞌi̱ ma̱, chaꞌ ngaꞌaa cuaꞌni la ma̱ jiꞌi̱. Caja chalyuu nu ná ngaꞌa̱ chaꞌ tye jiꞌi̱ ma̱ liꞌ.
14 Cua ñaꞌa̱ ca na, cua laca na sñiꞌ ycuiꞌ Ndyosi si nduꞌni na cua ñaꞌa̱ ca cña nu nclyo Xtyiꞌi ycuiꞌ Ndyosi jiꞌna.
15 Na cua nda ycuiꞌ Ndyosi Xtyiꞌi Ni jiꞌi̱ ma̱, chaꞌ nduꞌni Xtyiꞌi Ni chaꞌ caca ma̱ sñiꞌ ycuiꞌ Ndyosi; nduꞌni biꞌ chaꞌ ndiꞌya̱ taca chcuiꞌ na loꞌo ycuiꞌ Ndyosi: “Sti ya”, ñacui̱ na jiꞌi̱ Ni. Siꞌi chaꞌ cuxi nduꞌni Xtyiꞌi Ni nu loꞌo nclyo biꞌ cña jiꞌi̱ ma̱, siꞌi chaꞌ xcutsi̱i̱ jiꞌi̱ ma̱ ñiꞌya̱ nu ntsi̱i̱ ma̱ cua saꞌni la, siꞌi juaꞌa̱ cña nduꞌni nu biꞌ.
16 Chaꞌ nu ntsuꞌu neꞌ cresiya jiꞌna ni, stuꞌba nchcuiꞌ chaꞌ biꞌ loꞌo chaꞌ nu nda Xtyiꞌi Ni loꞌo na, chaꞌ cua laca na sñiꞌ ycuiꞌ Ni.
17 Nu loꞌo cua laca na sñiꞌ ycuiꞌ Ni, loꞌo jiꞌna tyacua lcaa chaꞌ tsoꞌo nu ta Ni liꞌ, lcaa ñaꞌa̱ chaꞌ nu cua nda Ni jiꞌi̱ Cristo; pana si cua ntiꞌ na chaꞌ stuꞌba ti tyiꞌi̱ na loꞌo Cristo ca su tlyu ca su ntucua Ni, liꞌ ntsuꞌu chaꞌ talo na loꞌo ndyuꞌni lyaꞌ tiꞌ nguꞌ jiꞌna nde chalyuu ti, ñiꞌya̱ ndalo ycuiꞌ Cristo loꞌo nguaꞌni lyaꞌ tiꞌ nguꞌ jiꞌi̱ yu.
18 Ntsuꞌu quiyaꞌ ndyiji xi chaꞌ tiꞌí jiꞌna laja loꞌo ndiꞌi̱ ti na nde chalyuu; pana xca ti chaꞌ laca chaꞌ biꞌ, ná stuꞌba laca chaꞌ tiꞌí biꞌ loꞌo chaꞌ tsoꞌo nu caja jiꞌna ca nde loo la, ntiꞌ naꞌ. Loꞌo juaꞌa̱ tya lyiji culuꞌu Ni lcaa chaꞌ jiꞌna, ñiꞌya̱ caca chaꞌ tsoꞌo biꞌ nde loo la.
19 Lcaa ca na luꞌú nu cua ngüiñá ycuiꞌ Ndyosi nde chalyuu ni, ntajatya tsa na biꞌ jiꞌi̱ ycuiꞌ Ndyosi, ni jacuaꞌ culuꞌu Ni jiꞌi̱ ñati̱ chalyuu tilaca nu chañi chaꞌ laca nguꞌ sñiꞌ ycuiꞌ Ni.
20 Cua ngunuꞌu̱ lcaa chalyuu; lcaa lo na nu ntsuꞌu nde chalyuu ni, ná lcaa na biꞌ ngua ñiꞌya̱ nu ngua tiꞌ ycuiꞌ Ndyosi chaꞌ caca chaꞌ biꞌ loꞌo ngüiñá Ni jiꞌi̱. Cua nguxtyanu Ni chalyuu chaꞌ tyanu juaꞌa̱ ti, masi siꞌi juaꞌa̱ ndiya tiꞌ lcaa lo na nu ntsuꞌu chalyuu biꞌ. Pana ná ngaꞌa̱ chaꞌ tyanu chaꞌ juaꞌa̱ tyucui tyempo;
21 cua tyalaa ti sca tsa̱ nu tye lcaa chaꞌ cuxi nu nduꞌni chaꞌ quiñuꞌu̱ chalyuu, lcaa chaꞌ cuxi nu laca loo jiꞌna. Loꞌo liꞌ tsoꞌo tsa caca lcaa lo na nu ngüiñá Ni nde chalyuu, chaꞌ stuꞌba ti cuaꞌni lyaá Ni jiꞌi̱ nu na biꞌ loꞌo jiꞌna nu laca na sñiꞌ ycuiꞌ Ni.
22 Tya lyiji caca chaꞌ tlyu biꞌ, pana jlo tiꞌ na chaꞌ ntsuꞌu tsa chaꞌ tiꞌí, ntsuꞌu tsa chaꞌ quicha tiꞌ jiꞌi̱ lcaa na nu ngüiñá ycuiꞌ Ndyosi nde chalyuu. Ñiꞌya̱ loꞌo lijya̱ tiꞌí jiꞌi̱ sca nu cunaꞌa̱ chaꞌ cua cala ti sñiꞌ, juaꞌa̱ ntsuꞌu chaꞌ tiꞌí chalyuu juani.
23 La cuiꞌ juaꞌa̱ loꞌo lcaa tyaꞌa na nu ntsuꞌu Xtyiꞌi ycuiꞌ Ndyosi jiꞌna, nxiꞌya na ndiꞌi̱ na chaꞌ ntsuꞌu tsa chaꞌ tiꞌí jiꞌna juani. Na cua nda Ni Xtyiꞌi ycuiꞌ Ni jiꞌna loꞌo ndiꞌi̱ na nde chalyuu, sca chaꞌ tsoꞌo nu nda Ni jiꞌna yala la laca. Laja liꞌ ntajatya tsa na jiꞌi̱ tsa̱ tlyu biꞌ, chaꞌ cuaꞌni lyaá lyiji Ni jiꞌna, chaꞌ xcutsaꞌa̱ Ni jiꞌi̱ tyucui ñaꞌa̱ na liꞌ. Loꞌo liꞌ ta Ni su tyiꞌi̱ na slo Ni, chaꞌ cua laca na sñiꞌ ycuiꞌ Ni.
24 Jlya tiꞌ na chaꞌ nguaꞌni lyaá Ni jiꞌna, masi ngaꞌa̱ chaꞌ jatya na jiꞌi̱ tsa̱ tlyu biꞌ, chaꞌ cuaꞌni tye Ni cña nu ndyuꞌni Ni. Sca na nu ntajatya na jiꞌi̱ ni, loꞌo cua naꞌa̱ na jiꞌi̱, chaꞌ nduꞌu tucua chaꞌ biꞌ, ngaꞌaa ntiꞌ chaꞌ jatya la na jiꞌi̱ liꞌ; siꞌi na tya ntajatya na jiꞌi̱, na cua naꞌa̱ na jiꞌi̱ liꞌ.
25 Pana loꞌo chañi chaꞌ tya ntajatya na jiꞌi̱ sca chaꞌ, liꞌ ntsuꞌu chaꞌ talo na jiꞌi̱, masi tya lyiji ñaꞌa̱ na jiꞌi̱, masi talo na tyiqueeꞌ ñaꞌa̱ cuayáꞌ nu ñaꞌa̱ na jiꞌi̱ chaꞌ cua ndyuꞌu tucua.
26 Biꞌ chaꞌ laca chaꞌ nxtyucua Xtyiꞌi ycuiꞌ Ndyosi jiꞌna, chaꞌ ná nchca jiꞌna tsiyaꞌ ti. Ná jlo tiꞌ na ñiꞌya̱ nu tsoꞌo la chcuiꞌ na loꞌo ycuiꞌ Ndyosi, pana Xtyiꞌi ycuiꞌ Ni laca nu ncluꞌu jiꞌna ñiꞌya̱ nu chcuiꞌ na loꞌo Ni. Cua jlo tiꞌ Xtyiꞌi ycuiꞌ Ni chaꞌ tiꞌi̱ tsa chaꞌ nu ntsuꞌu tyiquee na, chaꞌ ná ndyiji ñiꞌya̱ caca chcuiꞌ na chaꞌ biꞌ loꞌo Ni; biꞌ chaꞌ loꞌo Xtyiꞌi ycuiꞌ Ndyosi nchcuiꞌ loꞌo ycuiꞌ Ndyosi Sti na cuentya jiꞌna liꞌ.
27 Nclyotu̱ ycuiꞌ Ndyosi lcaa ca chaꞌ nu ntsuꞌu neꞌ cresiya jiꞌi̱ ñati̱. Loꞌo juaꞌa̱ jlo tiꞌ Ni lcaa chaꞌ nu ntiꞌ Xtyiꞌi ycuiꞌ Ni ta loꞌo Ni, chaꞌ nu loꞌo ndijña nu biꞌ sca chaꞌ jiꞌi̱ ycuiꞌ Ndyosi Sti na cuentya jiꞌna, stuꞌba ntiꞌ Xtyiꞌi Ni loꞌo lcaa chaꞌ nu nclyacua tiꞌ ycuiꞌ Ndyosi Sti na.
Ngaꞌaa ntsuꞌu nu cuxi nu caca cuaꞌni chaꞌ culayaꞌ ycuiꞌ Ndyosi jiꞌi̱ ñati̱ jiꞌi̱ Ni
28 Jlo tiꞌ na chaꞌ cua nda ycuiꞌ Ndyosi chacuayáꞌ ñiꞌya̱ caca lcaa chaꞌ nu ndyaca chalyuu, chaꞌ caca tsoꞌo chalyuu su ndiꞌi̱ na si ntsuꞌu tyiquee na ñaꞌa̱ na jiꞌi̱ Ni. Na cua ngusubi Ni jiꞌna juani, chaꞌ caca na ñiꞌya̱ nu ngua tiꞌ Ni tya clyo chaꞌ caca na.
29 Masi tya loꞌo nguxana chalyuu, tya liꞌ jlo tiꞌ ycuiꞌ Ni tilaca laca nu tyajaꞌa̱ xñi chaꞌ jiꞌi̱ Ni nde loo la. Ngua tiꞌ Ni chaꞌ caca na ñiꞌya̱ laca Jesús, Sñiꞌ ycuiꞌ ca Ni, ngua tiꞌ Ni chaꞌ caca Jesús tyaꞌa na; quiñaꞌa̱ tsa tyaꞌa sñiꞌ ycuiꞌ Ni caca na liꞌ, pana loo la laca Jesús.
30 Juaꞌa̱ ngua tiꞌ Ni tya clyo la chaꞌ caca na, biꞌ chaꞌ ngusubi Ni jiꞌna. Nu loꞌo cua ngusubi Ni jiꞌna, liꞌ nguaꞌni Ni chaꞌ caca tsoꞌo cresiya jiꞌna cuentya jiꞌi̱ Ni; nu loꞌo ndye caca tsoꞌo cresiya jiꞌna, liꞌ ta Ni su tyiꞌi̱ na ca su tlyu ca su ntucua ycuiꞌ Ni.
31 Loꞌo cua ndyuna na lcaa chaꞌ tsoꞌo biꞌ, liꞌ taca ñacui̱ na chaꞌ ná ntsuꞌu nu caca xu̱u̱ tyaꞌa loꞌo na, chaꞌ ycuiꞌ Ndyosi laca nu ndiꞌi̱ loꞌo na.
32 Ná nda ycuiꞌ Ndyosi chacuayáꞌ jiꞌi̱ Jesús chaꞌ tyaꞌa̱chu̱ꞌ yu jiꞌi̱ cña jiꞌi̱ Ni juaꞌa̱ ti, masi nu sca ti Sñiꞌ ycuiꞌ Ni laca yu; nda Ni jiꞌi̱ yu chaꞌ cajaa lo crusi cuentya jiꞌi̱ lcaa na loꞌo tyaꞌa na. Cua nda Ni lcaa chaꞌ tsoꞌo nu jiꞌi̱ ycuiꞌ ca Ni jiꞌi̱ Jesús, la cuiꞌ nu laca nu sca ti Sñiꞌ ycuiꞌ Ni. Loꞌo juaꞌa̱ sca ti cuayáꞌ nu ta Ni chaꞌ biꞌ jiꞌna, ñiꞌya̱ loꞌo nda Ni chaꞌ biꞌ jiꞌi̱ Sñiꞌ ycuiꞌ Ni.
33 Ná tucui taca sta quiꞌya jiꞌna lacua, chaꞌ cua laca ngusubi ycuiꞌ Ndyosi jiꞌna; ycuiꞌ Ndyosi laca nu cua ngulo yabeꞌ jiꞌi̱ lcaa quiꞌya nu ntsuꞌu jiꞌna.
34 Ná ntsuꞌu nu caca xcubeꞌ jiꞌna liꞌ, chaꞌ xquiꞌya na cua ngujuii Jesús, xquiꞌya na cua ndyuꞌú yu chaca quiyaꞌ. Loꞌo juani ntucua Cristo laꞌa tsuꞌ cui̱ ca su ntucua ycuiꞌ Ndyosi, ndijña yu chaꞌ clyu tiꞌ jiꞌi̱ ycuiꞌ Ndyosi Sti yu cuentya jiꞌna.
35 Ni sca chaꞌ cuxi nu ntsuꞌu chalyuu ná taca cuaꞌni chaꞌ culayaꞌ Cristo jiꞌna juani, chaꞌ ntsuꞌu tsa tyiquee nu Cristo biꞌ ñaꞌa̱ Ni jiꞌna. Ná sca caca jiꞌna, masi quicha tsa na, masi tiꞌí ti ndiꞌi̱ na chalyuu, masi xcubeꞌ tsa nguꞌ jiꞌna, masi ndyiji jbiꞌña jiꞌna, masi tye steꞌ na ngusu̱, masi ntsuꞌu tsa chaꞌ cuxi su ndiꞌi̱ ti na, masi cujuii nguꞌ jiꞌna; lcaa chaꞌ biꞌ ná caca cuaꞌni chaꞌ culayaꞌ Cristo jiꞌna.
36 Ndiꞌya̱ nchcuiꞌ sca chaꞌ nu nscua lo quityi jiꞌi̱ ycuiꞌ Ndyosi:
Xquiꞌya ycuiꞌ Ndyosi, cua ñaꞌa̱ ca hora ndyujuii nguꞌ jiꞌna.
Ndyuꞌni nguꞌ loꞌo na ñiꞌya̱ si laca na xlyaꞌ, la cuiꞌ xlyaꞌ nu ndyaꞌa̱ loꞌo nguꞌ jiꞌi̱ slo ñati̱ nu ndujuii jiꞌi̱.
37 Masi juaꞌa̱, lye tsa ntyiji̱loo na jiꞌi̱ nu cuxi biꞌ; ngaꞌaa nchca jiꞌi̱ nu cuxi biꞌ culo cña jiꞌna tsiyaꞌ ti xquiꞌya Jesús, chaꞌ ntsuꞌu tsa tyiquee Ni ñaꞌa̱ Ni jiꞌna.
38 Biꞌ chaꞌ jlo tiꞌ naꞌ juani chaꞌ ngaꞌaa ntsuꞌu ni sca na nu caca cuaꞌni chaꞌ culayaꞌ ycuiꞌ Ndyosi jiꞌna, chaꞌ ntsuꞌu tsa tyiquee Ni ñaꞌa̱ Ni jiꞌna; masi cua ngujuii na, masi tya luꞌú na, ná culayaꞌ Ni jiꞌna. Ni xca̱ jiꞌi̱ ycuiꞌ Ndyosi nu ntucua nde cua̱, ni sca cuiꞌi̱ nu laca loo nde lo yuu, ná nchca jiꞌi̱ tsiyaꞌ ti cuaꞌni chaꞌ culayaꞌ Ni jiꞌna. Masi chalyuu su ndiꞌi̱ na juani, masi chalyuu nu caca nde loo la, ná culayaꞌ Ni jiꞌna. Ná ntsuꞌu nu laca loo nde chalyuu nu nchca jiꞌi̱ culo jiꞌna yaꞌ nu Xuꞌna na;
39 ná sca na nu ntsuꞌu nde cua̱, ná sca na nu ntsuꞌu nde quiꞌñi neꞌ yuu, ná sca na tyucui ñaꞌa̱ chalyuu nu ngüiñá ycuiꞌ Ndyosi, ná caja ñiꞌya̱ nu culo jiꞌna yaꞌ Jesucristo nu Xuꞌna na, chaꞌ ntsuꞌu tsa tyiquee Ni ñaꞌa̱ Ni jiꞌna.