10
ꞌWan taꞌa ndiꞌin chaꞌ ꞌñaan loꞌo Jesús, ndaꞌan ꞌa chaꞌ tiyeěn chaꞌ ꞌin neꞌ judío taꞌaǎn. Tyukwi ti tiyeěn tꞌnan ꞌa nchkwiǐnꞌ loꞌo Ndiose, chaꞌ kulaa Ni ꞌin neꞌ judío taꞌaǎn ꞌin nu xaꞌan. Ñi ꞌa nchkwiǐnꞌ chaꞌ ꞌin neꞌ kanꞌ, chaꞌ suꞌwe ꞌa ngiꞌni tnun neꞌ kanꞌ ꞌin Ndiose, ni siya ja jlyo suꞌwe tiꞌ neꞌ sa ñaꞌan tñan nchka tiꞌ Ni chaꞌ kuꞌni neꞌ; loꞌo ja nchka biyaꞌ tiꞌ neꞌ kanꞌ sa ñaꞌan kuꞌni neꞌ chaꞌ ka suꞌwe kasiya ꞌin neꞌ loꞌo Ndiose. Xka ñaꞌan ndaꞌan chaꞌ tiye neꞌ kanꞌ; ti ykwiꞌ ti neꞌ ndaꞌan naan neꞌ sa ñaꞌan nu ka suꞌwe kasiya ꞌin neꞌ, chaꞌ ja xlyaa neꞌ tsaa ñaꞌan tiꞌ neꞌ tñan nu ngiꞌni Ndiose. Wa yan Jesús lo chalyuu ni, wa ytean chaꞌ ꞌin yu, kanꞌ chaꞌ ka suꞌwe kasiya ꞌñaan loꞌo Ndiose; loꞌo ja ndiꞌin chaꞌ lye ꞌa tukwaan chaꞌ kula nu ngwaꞌan ayman Moisés kanꞌ, chaꞌ ka suꞌwe kasiya ꞌñaan loꞌo Ndiose.
Nde lka chaꞌ nu ngwaꞌan ayman Moisés lo kityi bra nu nchkwiꞌ yu sa ñaꞌan nu ka suꞌwe kasiya ꞌñaan, si tukwaan nchga chaꞌ kula kanꞌ: “Suꞌwe ti tyiꞌian lo chalyuu, si kuꞌnian nchga tñan nu ngulo Ndiose ꞌñaan.” Ngwañaꞌan nchkwiꞌ kityi kanꞌ. Loꞌo ndukwa xka chaꞌ lo kityi kula, nu nchkwiꞌ sa ñaꞌan nu ka suꞌwe kasiya ꞌñaan bra nu xñian chaꞌ ꞌin Jesús. Nde lka chaꞌ nu nchkwiꞌ kityi kanꞌ: “Ja ndiꞌin chaꞌ tsaa naan ꞌin Krixtu nde niꞌ kwan seꞌen ndiꞌin Ndiose” ndukwin kityi ―chaꞌ kaan loꞌoan ꞌin Krixtu lo chalyuu re―; loꞌo “ja ndiꞌin chaꞌ tsaa naan ꞌin Krixtu nde niꞌ yuu seꞌen nsuꞌwi ayman” ndukwin kityi ―chaꞌ kaan loꞌoan ꞌin Ni lo chalyuu nde xiyaꞌ―. Nde ndiya chaꞌ bra nu ndyaa ñaꞌan tianꞌ ꞌin Jesús: “Kwiꞌ seꞌen ti ndiꞌin chaꞌ ꞌin Jesús ꞌñaan. Ka xuꞌwi chaꞌ ꞌin Krixtu tu tuꞌwaan, ka xuꞌwi chaꞌ ꞌin Ni niꞌ kasiya ꞌñaan.” Kanꞌ lka chaꞌ suꞌwe nu chkwiǐnꞌ loꞌo nten, chaꞌ ka kulaa Ni ꞌñaan ꞌin nchga chaꞌ xaꞌan, si chañi chaꞌ xñian chaꞌ ꞌin Jesús. Sa kanꞌ ti chaꞌ ndiꞌin chaꞌ kuꞌnian, chaꞌ katsaanꞌ ñi ꞌin nten chaꞌ Jesús lka Xꞌnaan, loꞌo ngwañaꞌan tyukwi ti tiyean tsaa ñaꞌan tianꞌ chaꞌ Ndiose yꞌni chaꞌ ndyuꞌu Jesús xiyaꞌ nde seꞌen mtsiꞌ. Bra kanꞌ ka ꞌin Ni kulaa Ni ꞌñaan, 10 chaꞌ niꞌ kasiya ꞌñaan nsuꞌwi chaꞌ nu wa msñian ꞌin Jesús, kwiꞌ ngwañaꞌan tu tuꞌwaan ndukwa chaꞌ ꞌin Jesús nu nchkwianꞌ loꞌo nten. Bra kanꞌ ka suꞌwe kasiya ꞌñaan loꞌo Ndiose, kwiꞌ ngwañaꞌan kulaa Ni ꞌñaan ꞌin nchga chaꞌ xaꞌan nu nsuꞌwi chalyuu.
11 Loꞌo nde ndiya xka chaꞌ nu ndukwa lo kityi ꞌin Ndiose: “Taꞌaan nu ytean chaꞌ ꞌin Ndiose, ja ndiꞌin chaꞌ ka jyuꞌu tianꞌ ꞌin Ni bra kanꞌ.” Ngwañaꞌan nchkwiꞌ kityi. 12 Ska ti biyaꞌ ndukwa chaꞌ kanꞌ ꞌin neꞌ judío, kwiꞌ ngwañaꞌan ndukwa chaꞌ kanꞌ ꞌin neꞌ xka laꞌa tsuꞌ, chaꞌ ska ti Xꞌnaan nka ndloo la ꞌin nchga nten chalyuu; ska ti biyaꞌ suꞌwe ꞌa ngiꞌni Ni loꞌo nchga nten nu jñan chaꞌ tlyu tiꞌ ꞌin Ndiose chabiyaꞌ ꞌin Jesús. 13 Nde ñaꞌan ndyoꞌo chaꞌ nu ndukwa lo kityi kula: “Kulaa Ni ꞌin nchga nten nu jñan chaꞌ tlyu tiꞌ ꞌin Ni chabiyaꞌ ꞌin Xꞌnaan.” 14 Ja ka chkwiꞌ nten loꞌo Ndiose chabiyaꞌ ꞌin Jesús si ja ya xñi neꞌ chaꞌ ꞌin Ni; loꞌo ja ka xñi neꞌ chaꞌ ꞌin Jesús si ja ya kunan neꞌ chaꞌ kanꞌ; loꞌo ja ka kunan neꞌ chaꞌ kanꞌ si ja ya kaja nten nu katsaꞌ chaꞌ kanꞌ ꞌin neꞌ; 15 loꞌo ja tukwin ka tsaa ytsaꞌ chaꞌ kanꞌ ꞌin xka ta nten si ja ya kulo Ndiose tñan ꞌin neꞌ chaꞌ tsaa neꞌ. Nde ndiya ska chaꞌ nu nchkwiꞌ kityi kula: “¡Suꞌwe ꞌa nka tiyean bra nu kala nten seꞌen ndiꞌian, chaꞌ chkwiꞌ neꞌ chaꞌ suꞌwe ꞌin Ndiose loꞌoan, chaꞌ kwaꞌu neꞌ ꞌñaan sa ñaꞌan ka nu tiin ti tyiꞌian!” Ngwañaꞌan nchkwiꞌ kityi.
16 Loꞌo siꞌi nchga nten nu nnan suꞌwe chaꞌ nu nchkwianꞌ loꞌo neꞌ bra nu ngitsaanꞌ ꞌin neꞌ sa ñaꞌan kulaa Ndiose ꞌin nten. Ti kwiꞌ chaꞌ re ykwiꞌ ayman Isaías nu ngwa sꞌni: “Ndiose Xꞌnan ba, ja tukwin ꞌa ndiꞌin nu msñi chaꞌ ꞌiin bra nu ykwiꞌ ba loꞌo neꞌ” ndukwin ayman kanꞌ. 17 Nan ni, wa ytean chaꞌ ꞌin Jesús bra nu ynaan chaꞌ suꞌwe nu ykwiꞌ neꞌ loꞌoan chaꞌ ꞌin Krixtu.
18 Nchka tiǎnꞌ kunichaǎnꞌ ska chaꞌ ꞌwan: ¿Ta ja ya kunan neꞌ judío chaꞌ ꞌin Krixtu sikwa a? ¡Wa ynan neꞌ!, chaꞌ wa ndukwa ska chaꞌ lo kityi kula nu nchkwiꞌ re:
Ñaꞌaan chalyuu wa ynen chaꞌ nu ykwiꞌ neꞌ loꞌo nten; nchga seꞌen ynen chaꞌ nu ykwiꞌ neꞌ, ni siya seꞌen wa tijyuꞌ la ynen chaꞌ kanꞌ.
Ngwañaꞌan nchkwiꞌ kityi.
19 Xka chaꞌ nñichaǎnꞌ ꞌwan ni: ¿Ta ja ndiꞌya neꞌ judío kwenta sa ñaꞌan ndyoꞌo chaꞌ kanꞌ sikwa a? Sꞌni ꞌa ngwaꞌan ayman Moisés chaꞌ re lo kityi chaꞌ ꞌin neꞌ kanꞌ:
Kuꞌniǐn chaꞌ ka liyeꞌ tiꞌ wan ñaꞌan wan ꞌin nten xka laꞌa tsuꞌ nu ja lka nten suꞌwe, xkeꞌ tiꞌ wan, ndukwin Ndiose.
Ndukwin wan chaꞌ ja nsuꞌwi ꞌa chaꞌ tiya ꞌin neꞌ kanꞌ; ja nchka biyaꞌ tiꞌ neꞌ, xkeꞌ tiꞌ wan.
Kanꞌ chaꞌ taǎn chaꞌ kasinꞌ tiꞌ ꞌwan, chunꞌ nu wa msñi neꞌ kanꞌ chaꞌ ꞌñaǎn;
loꞌo ꞌwan ni, ja nchka tiꞌ wan kunan wan chaꞌ ꞌñaǎn, ndukwin Ni.
20 Loꞌo ñi ꞌa chaꞌ re nu ykwiꞌ ayman Isaías chabiyaꞌ ꞌin Ndiose:
Ti kwiꞌ nten nu ja ya tsaa naan chaꞌ ꞌñaǎn, wa mjwi chaꞌ ꞌñaǎn ꞌin neꞌ ni, ndukwin Ni.
Ni siya ja siyaꞌ jñan neꞌ kanꞌ ska chaꞌ suꞌwe ꞌñaǎn, wa ngwaꞌuǔn tloǔn ꞌin neꞌ ni.
21 Loꞌo xka ñaꞌan ngwaꞌan ayman Isaías chaꞌ ꞌin neꞌ Israel lo kityi: “Tyukwi tsan msiꞌyaǎn ꞌin neꞌ” ndukwin Ndiose, “loꞌo ja ynan neꞌ kanꞌ siyaꞌ ti; xkwiꞌ nxuun neꞌ loꞌoǔn.” Ngwañaꞌan nchkwiꞌ kityi.