14
Ska siyentu nsuꞌwi tuꞌwa ndukwa jakwa mi nten nu ngwa luwi tiye
Chunꞌ ndiꞌin la naꞌaǎn xiyaꞌ la kwa, seꞌen nduun nu lka ñaꞌan tiꞌ slyaꞌ kanꞌ lo kiꞌya Sión; suꞌwa nduun Ni loꞌo ska siyentu nsuꞌwi tuꞌwa ndukwa jakwa mi nten. Chkan nten kanꞌ, kanꞌ ndukwa nin nu nka ñaꞌan tiꞌ slyaꞌ kanꞌ, kwiꞌ ndukwa nin Ndiose Sti Ni bra kanꞌ. Kwen ꞌa ynen nde seꞌen ndiꞌin Ndiose; sa ñaꞌan nnen bra nu nduun tyiꞌa tuꞌwa kee, seꞌen kwan ꞌa ngalu tyiꞌa, sa ñaꞌan nnen bra nu lye ꞌa nganen tiꞌyu, ngwañaꞌan nganen, mskeꞌ tiǎnꞌ. Kwiꞌ nde kwa nduun tyun nten nu suꞌwe ꞌa ndla snen tnun nu naan arpa, mskeꞌ tiǎnꞌ. Nde loo yka xlya tnun seꞌen ndukwa Ndiose, kwiꞌ seꞌen nduun jakwa ꞌni kti kanꞌ, kwiꞌ seꞌen nduun yu kula kanꞌ, la kwa nduun nten nu ngala snen kanꞌ bra kanꞌ. Ska ta ti nten kaꞌan nu ndiꞌin nde kwa, kanꞌ nu ngala tuꞌwa ska kantu nu kwi; ja ngwa ꞌin xka ta nten chalyuu kuꞌni xaꞌan kantu kanꞌ, chaꞌ ska kantu nu ja ya kunan nten chalyuu lka ran. Ska ta ti nu siyentu nsuꞌwi tuꞌwa ndukwa jakwa mi nten nu wa ngulaa Ni nde lo chalyuu, kanꞌ lka nu ngwa ꞌin kula tuꞌwa kantu kanꞌ bra kanꞌ. Nten nu siyaꞌ ti ngwa luwi lka nten kaꞌan kanꞌ. Ja mdiꞌin chaꞌ ꞌin neꞌ kanꞌ loꞌo xka nu kunaꞌan bra nu mdiꞌin neꞌ lo chalyuu, ja la yꞌni neꞌ kanꞌ chaꞌ kuxi; loꞌo ni, ndaꞌan neꞌ loꞌo nu lka ñaꞌan tiꞌ slyaꞌ kanꞌ la seꞌen ndaꞌan Ni. Wa ngulaa Ni ꞌin neꞌ kanꞌ, chaꞌ lka neꞌ ti kwiꞌ nten nu ndiya la tiꞌ Ndiose ti bra nu mdyisnan chaꞌ ꞌin nu lka ñaꞌan tiꞌ slyaꞌ kanꞌ. Ti kulo ngulo suwi Ni ꞌin neꞌ kanꞌ, chaꞌ kuꞌni neꞌ tñan ꞌin Ni bra kanꞌ. Loꞌo ja ndyoꞌo ꞌa chaꞌ kwiñi tuꞌwa neꞌ, chaꞌ ja ndiꞌin chaꞌ kuxi ꞌin neꞌ kanꞌ siyaꞌ ti bra kanꞌ.
Snan angajle nu nchkwiꞌ chaꞌ tnun nu ndlo Ndiose ꞌin
Chunꞌ ndiꞌin la naꞌaǎn ndyaa xka angajle ꞌin Ndiose nu kwan ꞌa ndukwi ndyaa bra kanꞌ; ndyaa loꞌo ꞌin ska chaꞌ suꞌwe nu nchka tiꞌ Ndiose chkwiꞌ loꞌo nchga nten chalyuu, ska chaꞌ nu nꞌni ꞌa chaꞌ kunan nten. Nchga bra ja ndiꞌin chaꞌ tsaa tii chaꞌ kanꞌ. La seꞌen ndiꞌin nchga nten tyukwi ñaꞌaan chalyuu, nchga kichen tyi neꞌ, kwiꞌ nten nu nchkwiꞌ nchga lo chaꞌ nu nchkwiꞌ nten chalyuu, la kwa ndyaa angajle kanꞌ, chaꞌ chkwiꞌ loꞌo nchga nten bra kanꞌ. Kwen ykwiꞌ angajle kanꞌ loꞌo neꞌ bra kanꞌ:
―Kutsen wan ꞌin Ndiose, kuwe tiꞌ wan chaꞌ tnun ꞌa tñan ngiꞌni Ni lo chalyuu ―ndukwin angajle kanꞌ―. Wa mdiya bra chaꞌ kuꞌni biyaꞌ Ni ꞌin nchga nten chalyuu. Kanꞌ chaꞌ kuꞌni tnun wan ꞌin Ni ni, chaꞌ wa ngwiñan Ni niꞌ kwan, wa ngwiñan Ni chalyuu, wa ngwiñan Ni tujoꞌo, kwiꞌ ngwiñan Ni nchga seꞌen ndyukwa tyiꞌa ―ndukwin angajle kanꞌ bra kanꞌ.
Xa wa ndyaa angajle kanꞌ, mdiyan xka angajle chaꞌ chkwiꞌ loꞌo nten bra kanꞌ:
―Wa ngutin kichen ―ndukwin xka angajle kanꞌ―. Wa ngutin kichen tnun nu naan Babilonia, chaꞌ nu yꞌni ñuꞌun neꞌ kichen kanꞌ ꞌin nchga nten chalyuu. Kuxi ꞌa tñan yꞌni neꞌ kichen kanꞌ bra kanꞌ, chaꞌ nu yꞌni tnun neꞌ ꞌin nkwin joꞌo; loꞌo ngwañaꞌan, ngwaꞌu neꞌ ꞌin xka ta nten chaꞌ tyaꞌan tiꞌ neꞌ kuꞌni neꞌ ti kwiꞌ ti chaꞌ kuxi seꞌen ndiꞌin joꞌo kanꞌ ―ndukwin angajle nu nchka tukwa kanꞌ bra kanꞌ.
Bra ti mdiyan xka angajle nu nchka snan. Kwen ykwiꞌ loꞌo nten bra kanꞌ:
―Ta Ndiose nu tiꞌí ꞌin nchga nten nu kuꞌni tnun ꞌin ꞌni chen ñaꞌan kanꞌ, ni siya ꞌin ykwiꞌ iꞌ, ni siya ꞌin nkwin iꞌ ngiꞌni tnun neꞌ bra kanꞌ. Kwiꞌ ngwañaꞌan, ta Ndiose nu tiꞌí ꞌin nchga nten nu nsuꞌwi biyaꞌ ꞌin iꞌ chkan neꞌ o ta yaꞌ neꞌ; 10 ta Ndiose nu tiꞌí ꞌin neꞌ kanꞌ, chaꞌ lye ꞌa msinꞌ tiꞌ Ni ꞌin neꞌ bra kanꞌ. Skin neꞌ kanꞌ lo ska kiiꞌ tnun nu mxtiyaaꞌ loꞌo yuu sufri tloo nu lka ñaꞌan tiꞌ slyaꞌ kanꞌ, kwiꞌ tloo nchga angajle nu chaꞌ ꞌin Ni bra kanꞌ. 11 Tyukwi tyempu nde loo ja tsaa tii ꞌa tyituun sñii kiiꞌ seꞌen ndijin nten kanꞌ nu tiꞌí bra kanꞌ. Loꞌo ja kaja ñaꞌan lyaa neꞌ kanꞌ ꞌin Ndiose; nchga nten nu ngiꞌni tnun ꞌin ꞌni kanꞌ, ni siya nkwin iꞌ ti ngiꞌni tnun neꞌ, ni siya ngaꞌan biyaꞌ iꞌ chkan neꞌ o ta yaꞌ neꞌ, ja lyaa neꞌ kanꞌ ꞌin Ni bra kanꞌ. 12 Loꞌo nan ni, taloan chaꞌ kuxi kanꞌ ska ti si ndiꞌin chaꞌ ꞌñaan loꞌo Ndiose, ska ti si kunaan tñan nu kulo Ni ꞌñaan, ska ti si xñi suꞌwean chaꞌ ꞌin Jesús; kanꞌ nu ka ꞌñaan taloan chaꞌ kuxi kanꞌ bra kanꞌ.
13 Chunꞌ ndiꞌin la nde seꞌen ndiꞌin Ndiose ynen ykwiꞌ ska nten loꞌoǔn bra kanꞌ:
―Kwaꞌaan lyaa chaꞌ re ―ndukwin:― “Tyempu nde loo la suꞌwe ꞌa ka tiye nten nu kaja chunꞌ ngiꞌni neꞌ tñan ꞌin Ndiose nu nka Xꞌnaan.” Loꞌo ndiya ska chaꞌ nu nchkwiꞌ Tyiꞌi Ndiose loꞌo wan bra kanꞌ. Ndukwin Ni chaꞌ la kanꞌ xitñaꞌ nten kanꞌ bra kanꞌ, chaꞌ suꞌwe ꞌa tñan nu yꞌni neꞌ xa wa yan neꞌ lo chalyuu; ndiya tiꞌ Ni tñan nu yꞌni neꞌ kanꞌ, kanꞌ chaꞌ tyuꞌwi tiꞌ Ni ꞌin ran ―ndukwin Ni ꞌñaǎn bra kanꞌ.
Kuꞌni Ndiose kwa lo chalyuu
14 Chunꞌ ndiꞌin la naꞌaǎn seꞌen ndukwi ska koo ngaten. Chunꞌ koo kanꞌ ndukwa ska nu ñaꞌan tiꞌ nten; ndukwa ska sneꞌ oro ke Ni, loꞌo yaꞌ Ni ndukwa ska xtyi cha bra kanꞌ. 15 Kwiꞌ mdoꞌo ska angajle niꞌ lyaa ꞌin Ndiose la niꞌ kwan, kwiꞌ nu kwen msiꞌya ꞌin Ni nu ndukwa chunꞌ koo kanꞌ:
―Suꞌwaa lyaa xtyi ꞌiin, xoꞌ tiꞌiin kixin trigu, chaꞌ mta kanꞌ lka nten ꞌin Ndiose nu ndiꞌin lo chalyuu. Wa mdiya tsan nu kuꞌni Ni kwa lo chalyuu, wa lka ndukwa chaꞌ ꞌin Ni chaꞌ ka chaꞌ kanꞌ bra kanꞌ.
16 Bra ti mbiꞌya nu ndukwa chunꞌ koo kanꞌ lo chalyuu bra kanꞌ, msuꞌwa Ni xtyi ꞌin Ni chaꞌ siꞌyu Ni kixin trigu bra kanꞌ; ngwañaꞌan ngwa yꞌni Ni kwa lo chalyuu bra kanꞌ.
17 Chunꞌ ndiꞌin la naꞌaǎn xka angajle nu mdoꞌo niꞌ lyaa ꞌin Ndiose la niꞌ kwan. Loꞌo angajle kanꞌ ndukwa xtyi cha yaꞌ bra kanꞌ. 18 Kwiꞌ ngwañaꞌan, mdoꞌo xka angajle nu ngiꞌni tñan tuꞌwa msaa seꞌen nchkin lomstan, mdiyan bra kanꞌ; kanꞌ lka nu nka ndloo ꞌin kiiꞌ kanꞌ. Loꞌo kwen msiꞌya angajle kanꞌ ꞌin angajle nu ndukwa xtyi cha yaꞌ bra kanꞌ:
―Suꞌwaa lyaa xtyi ꞌiin, xiꞌyuu nchga siꞌyu chi kutun nu nsuꞌwi chalyuu kwenta stanꞌ, chaꞌ nguwen ꞌa ran ni.
19 Kanꞌ chaꞌ mbiꞌya angajle kanꞌ bra kanꞌ, msuꞌwa xtyi lo chalyuu, msiꞌyu siꞌyu chi kutun kanꞌ kwenta stanꞌ, nguun ꞌin ran ndyaa niꞌ ska pilya kee chaꞌ lyoꞌo suꞌwa Ni ꞌin ran; kwiꞌ ngwañaꞌan lye ꞌa ta Ndiose nu tiꞌí ꞌin nten chalyuu, chaꞌ msinꞌ ꞌa tiꞌ Ni ꞌin neꞌ bra kanꞌ. 20 Tuꞌwa kichen ndukwa seꞌen ngata siꞌyu chi kutun kanꞌ, ti kwiꞌ seꞌen ndyiji nten chaꞌ nda neꞌ kichen nu tiꞌí ꞌin neꞌ. Loꞌo tlyaa ꞌa tnen ngalu ndijyan lyuu bra kanꞌ; sa kwa yaꞌ kwan tuꞌwa kwiyu, sa kwa tlyaa tnen ngalu kanꞌ. Snan siyentu kilómetro biyaꞌ tijyuꞌ msnan tnen kanꞌ ndyaa bra kanꞌ.