3
Nten nu ka ndloo ꞌin nchga taꞌa msñian chaꞌ ꞌin Jesús
Ndiꞌin chaꞌ xñi suꞌwe wan chaꞌ nu ñi nu nchkwiǐnꞌ re: Suꞌwe ꞌa si xlyaa ska yu taꞌa wan ka ndloo ꞌin nchga taꞌa wan nu msñi wan chaꞌ ꞌin Ndiose, chaꞌ suꞌwe ꞌa chabiyaꞌ ꞌin Ndiose si nchka tiꞌ ska nten kuꞌni tñan kanꞌ. Bra nu lka ska nten ndloo ꞌin nchga taꞌa nten ꞌin Jesucristo ska kichen, bra kanꞌ ndiꞌin chaꞌ kuꞌni yu xkwiꞌ chaꞌ suꞌwe loꞌo nten, chaꞌ ja kaja ñaꞌan jñan neꞌ kiꞌya ꞌin yu bra kanꞌ. Kaja kwilyoꞌo yu kanꞌ loꞌo ska ti nu kunaꞌan; ngwañaꞌan ndiꞌin chaꞌ suꞌwe ti tyaꞌan chaꞌ tiye yu, chaꞌ kulaa yaꞌ yu nchga chaꞌ kuxi nu nsuꞌwi tiye ykwiꞌ yu, chaꞌ suꞌwe ti tyiꞌin yu loꞌo taꞌa nten yu. Ndiꞌin chaꞌ ta yu naꞌan tyi yu chaꞌ tyiꞌin neꞌ nu ndoꞌo xka kichen, kwiꞌ ngwañaꞌan ndiꞌin chaꞌ ta yu nan ku neꞌ kanꞌ. Ndiꞌin chaꞌ kwaꞌu suꞌwe yu chaꞌ ꞌin Ndiose ꞌin nten. Ja ka yu tñan kanꞌ si taꞌa ti kuꞌwi yu, si ndiꞌin wsuun yu loꞌo nten; ndiꞌin chaꞌ kuꞌni yu chaꞌ tlyu tiꞌ ꞌin taꞌa nten yu, chaꞌ ja kaja nu xuun loꞌo ꞌin yu. Ja suꞌwe si nu jñan yu tñi ꞌin taꞌa nten yu, chaꞌ ka kuliyaꞌ la yu. Ndiꞌin chaꞌ kulo suꞌwe yu kanꞌ tñan ꞌin taꞌa ndiꞌin yu, chaꞌ ngwañaꞌan tukwa sñiꞌ yu tñan nu ndlo yu ꞌin neꞌ, chaꞌ kuꞌni tnun sñiꞌ yu ꞌin yu. Ja ka ꞌin ska nten ka ndloo ꞌin taꞌa nten ꞌin Ndiose ska kichen si ja kulo suꞌwe yu kanꞌ tñan naꞌan tyi yu; kanꞌ chaꞌ ja suꞌwe ka ska nten ndloo nu tka msñi ti chaꞌ ꞌin Ndiose, chaꞌ ti ji kuꞌni xaꞌan suꞌwe yu chaꞌ kanꞌ. Ja chan lye ꞌa kuꞌni siyeꞌ yu ꞌin taꞌa nten yu, loꞌo kanꞌ ta Ndiose nu tiꞌí ꞌin yu sa ñaꞌan nu ta Ni nu tiꞌí ꞌin kuneꞌ xaꞌan. Nten nu ka ndloo kanꞌ ni, suꞌwe si chkwiꞌ neꞌ taꞌa kichen tyi yu chaꞌ ꞌin yu chaꞌ suꞌwe ti ngiꞌni yu, ni siya nten nu ja ya xñi chaꞌ ꞌin Jesucristo chkwiꞌ neꞌ ngwañaꞌan ꞌin yu. Loꞌo kanꞌ ja ka chkwiꞌ neꞌ kwentu ꞌin yu kanꞌ, ja ka jwakii kuneꞌ xaꞌan ꞌin yu kanꞌ, chaꞌ kuꞌni yu chaꞌ kuxi.
Nten nu nka tñan ꞌin taꞌa nten ꞌin Jesús ska kichen
Kwiꞌ ngwañaꞌan nten nu nka tñan ꞌin taꞌa nten ꞌin Jesús ska kichen, loꞌo neꞌ kanꞌ ndiꞌin chaꞌ kuꞌni neꞌ xkwiꞌ chaꞌ suꞌwe. Ja suꞌwe si tukwa chaꞌ ndaꞌan tiye neꞌ kanꞌ bra nu kuꞌni neꞌ tñan kanꞌ; ja suꞌwe si kuꞌwi neꞌ kanꞌ, ja suꞌwe si lye ꞌa jñan neꞌ kanꞌ tñi ꞌin taꞌa nten neꞌ chaꞌ ka kuliyaꞌ neꞌ, ti ykwiꞌ ti neꞌ. Ndiꞌin chaꞌ xñi suꞌwe neꞌ kanꞌ nchga chaꞌ nu ñi ꞌin Ndiose, taꞌa chaꞌ nu msñian taꞌaan, chaꞌ ngwañaꞌan tyukwi ti tiye neꞌ kuꞌni neꞌ xkwiꞌ chaꞌ suꞌwe. 10 Kwiꞌ ngwañaꞌan, ndiꞌin chaꞌ kuꞌni biyaꞌ wan ꞌin nten kanꞌ, chaꞌ ñaꞌan wan si xkwiꞌ chaꞌ suꞌwe ngiꞌni neꞌ. Nten nu ngiꞌni suꞌwe ni, ka ꞌin neꞌ ka neꞌ tñan chaꞌ ꞌin taꞌa neꞌ, chaꞌ tayaꞌ neꞌ ꞌin taꞌa nten ꞌin Jesús, chaꞌ chabiyaꞌ ꞌin Ndiose kuꞌni neꞌ kanꞌ tñan bra kanꞌ. 11 Loꞌo nu kunaꞌan ni, ndiꞌin chaꞌ kuꞌni neꞌ xkwiꞌ chaꞌ suꞌwe bra nu ka neꞌ tñan chaꞌ tayaꞌ neꞌ ꞌin taꞌa neꞌ; ja suꞌwe chkwiꞌ nu kunaꞌan kanꞌ kwentu ꞌin taꞌa nten neꞌ. Ndiꞌin chaꞌ suꞌwe ti ka tiye nu kunaꞌan kanꞌ, chaꞌ talo neꞌ kuꞌni neꞌ tñan nu wa nda Ndiose ꞌin neꞌ. 12 Nten nu nka tñan ꞌin taꞌa nten ꞌin Jesús ska kichen, ni siya yu kiꞌyu, ni siya neꞌ kunaꞌan, ska ti nu ka kwilyoꞌo neꞌ. Ndiꞌin chaꞌ suꞌwe ti kulo neꞌ kanꞌ tñan ꞌin sñiꞌ neꞌ, chaꞌ kunan suꞌwe nchga nten nu ndiꞌin naꞌan tyi neꞌ chaꞌ nu nchkwiꞌ neꞌ. 13 Kwiꞌ ngwañaꞌan suꞌwe ꞌa chkwiꞌ nchga nten ꞌin neꞌ kanꞌ si suꞌwe ti kuꞌni neꞌ chaꞌ nu nka neꞌ tñan, chaꞌ ndayaꞌ neꞌ ꞌin neꞌ taꞌaan; bra kanꞌ sten la neꞌ chaꞌ ꞌin Jesucristo, chaꞌ ngwañaꞌan ka ngula la tiye neꞌ chaꞌ kwaꞌu neꞌ chaꞌ nu ñi ꞌin xka ta nten.
Sa ñaꞌan lka chaꞌ ꞌin Jesús nu wa msñian
14-15 Ndla ti kaǎn seꞌen ndiꞌiin, nka tiyeěn. Ngwañaꞌan nka tiyeěn, ni siya ja jlyo tiǎnꞌ ni ñaꞌan bra nu ka ꞌñaǎn, si ndiꞌin chaꞌ tiyaꞌ ꞌñaǎn; kanꞌ chaꞌ ni, ndaꞌaǎn kityi re chaꞌ ka biyaꞌ la tiiꞌ sa ñaꞌan kuꞌni nten ꞌin Jesucristo loꞌo taꞌa neꞌ, sa ñaꞌan kuꞌni neꞌ kanꞌ bra nu tyoꞌ tiꞌin neꞌ sa tlyu ti. Tyempu kanꞌ nu ndiꞌian loꞌo taꞌaan chaꞌ kuꞌni tnuan ꞌin Ndiose nu luꞌu, kwiꞌ tyempu kanꞌ nduꞌu neꞌ taꞌaan chaꞌ nu ñi ꞌin nu nka Xꞌnaan ꞌin taꞌa nten. Loꞌo ja tsaa tii chaꞌ nu ñi kanꞌ siyaꞌ ti lo chalyuu chunꞌ nchga neꞌ taꞌaan nchga kichen nchkwiꞌ chaꞌ kanꞌ. 16 Chañi chaꞌ tnun ꞌa chaꞌ suꞌwe ꞌin Jesucristo nu wa msñian. Nde ndukwa chaꞌ kanꞌ:
Nu ngwa sꞌni, ja tukwin ngwa biyaꞌ tiꞌ sa ñaꞌan nu kulaa Ndiose ꞌin nten;
loꞌo ni, jlyo tianꞌ, chaꞌ ngula Jesucristo yan Ni chalyuu, chaꞌ ngwa Ni nten.
Kwiꞌ ngwañaꞌan nchkwiꞌ Tyiꞌi Ndiose chaꞌ ꞌin Ni, chaꞌ ska nten nu luwi ꞌa lka Ni;
wa naꞌan angajle ꞌin Jesús, yu nu luwi kanꞌ.
Loꞌo ni, nduꞌu nten chaꞌ ꞌin Jesucristo ꞌin nten nu ndiꞌin tyukwi ñaꞌaan chalyuu;
loꞌo nxñi neꞌ nchga kichen chaꞌ nu nchkwiꞌ neꞌ bra kanꞌ.
Chunꞌ ndiꞌin la ndyaa Jesús nde seꞌen ndiꞌin Ndiose Stian nde niꞌ kwan, loꞌo ni, tlyu ꞌa lka Jesús seꞌen ndiꞌin Ni nde kwa.