14
Sansón ome-nikusad
1 Sansón Timnat-neggweburse nadegusad. Agine, Sansón yagwa-Filistea-dule dakargusad.
2 Sansón gannar negse nonigu, e-serganga weyob sognonikid:
—Timnatʼgi yagwa-Filistea-dule an daksad. Be anga we-yagwa-egisnamala, adi, an we-yagwa-nikuegar.
3 E-sergan ega sogded:
—¿Ar weginde, anmar-gwenadgan-abargi omegan satesi? ¿Israel-dulemar-bukwad-abargi omegan satebarsi? Emide-be yagwa-Filistea-dule be nikubied, ar we-dulemarde, Bab-Dummad-akudakmaladid.
Sansón, e-sergan-abin sogded:
—Ar we-yagwa bur an abeged. Be we-yagwa be anga egisnamala.
4 Ar e-sergande we-ibmar-gunaidi, wissulid, Bab-Jehová-sogedba-gunaid. Degi, Bab-Dummadi Filistea-dulemargi-gwichiguega igar-aminaid wissurbalid. Ar ade, we-ibagangi, Israel-dulemar, Filistea-dulemar-sogedba nanabukwad.
5 Degi, Sansón, e-serganbo Timnat-neggweburse naded. Degi, Timnat-dulemar-e-uva-nainugan-mosgua, achumigur-senigwad egi urmakdani dakalid.
6 Geb degi, Bab-Jehová-Burba gandikidba Sansónʼgi ubononikid. Agine, Sansón achumigur-ogoamaksad, igi dule argangi-ibmar-ganisuli sibad-bipi-ogoamakdae, deyobi imaksad. Degi-inigwele, e-serganga achumigur-oburgwisad sogsasulid.
7 Geb Timnat-neggweburse modapmargua, Sansónʼdi yagwa-abesiidbo sunmaknaded.
8 Ibagan-nasad-sorba, Sansón yagwa-nikuega gannar Timnat-neggweburse nadbalid. Nadapidgi, achumigur-burgwar-maid-dakega baid-igarsik dogded. Agi, achumigur-e-sangi yada-duurmaknai dakalid. Agine, achanis-nai dakarbalid.
9 Sansón achanis e-argangi wesgua, igarba gunnadap gusad. Degi, Sansón igarba e-babgan-bargadapgu, ega achanis uksamogad. Geb e-sergan guchamogad. Degi-inigwele, Sansón e-serganga sogsasulid, achanis achumigur-burgwar-maidgi amisye.
10 Geb degine, Sansón-e-bab bunagwa-negse naded. Agine, Sansón iba-onosad. Ar ade, gusgu weyob sapingana ome-nikunaidgi iba-onodamalad.
11 Filistea-dulemar deyob Sansón-dakarmargu, dulagwen-gakambe (30) sapingan-amisad, adi, Sansónʼba gudii-gumalagar.
12 Sansón we-sapinganga sogded:
—Emisgwa, an bemarga oeged-soggwen sogo. Bemar anga we-oeged, ibagugle (7) iba-naguoedgi be anga odalosmalale, mor-lino goadulagwen-gakambe (30) an bemarga ukoed, degi, mormar-ibagi-yoleged dulagwen-gakambe (30) an bemarga ukbaloed.
13 Degi-inigwele, be anga odalossurmalardi, bemar anga mor-lino dulagwen-gakambe (30) ukmaloed, degi, mor-ibagi-yoleged dulagwen-gakambe (30) bemar anga ukmarbaloed.
Sapingan abin-sogdemalad:
—Sogdeen. Ibmar-oeged be sogdo, anmar be-itobukwa.
14 Degi, Sansón amarga sogded:
“Emar-gunnedgi masgulleged noalid,
degi, gargandik-nikadgi osidikid noalid.”
Ibapaagusgu, sapingana oeged geg odaloge gusmalad.
15 Ibabakegusgu, sapingana Sansón-omega sogdemalad:
“Be-sui-binsaed be gae, anmarga oeged odalogega. Yapa be be-sui-binsaed-gaele, anmar soogi be-ogumakoed, degi, bela be-gwenadgan anmar ogumakbaloed. ¿Anmar-ibe ibmar-atursaega, be anmarse gochasi?”
16 Degidgi, e-omegwa ise-boale Sansónʼgi matak-nagusad, ega sogded:
—¡Be anbina sogsulid! Isdar be an-daked. Be an-dulemarga-oeged-sogsadi, be anga odaloge.
Sansón abin-sogded:
—An-sergangarbela an sogsasulid. ¿Begardi nabir an sogode? Adi sula.
17 Ibagugle (7) omegwa Sansón-asabin bosii gusad. Degi, e-ome egi alamaknai gusad. Geb ibagugledgi (7) Sansón e-omega oeged odalossunnad. Geb degi, e-ome sapinganga sogsamogad.
18 Ibagugledgi (7), dad-argwaned-iduar, Filistea-neggweburginmalad Sansónʼga sogdemalad:
“Ar achanisba-bur bule-ibmar-ochigwad sulid,
unnila achanisbi-nikad.
Ar achumigurba-bur bule-ibmar-gandikid sulid,
unnila achumigurbi dutusulid.”
Sansón abin-sogded:
“An-moli-bebe-nikad-ome-bipigwadgi be alamaknaigussurmalana,
An-oeged, bemar wisguosurmalanad.”
19 Geb agine, Bab-Jehová-Burba gandikidba Sansónʼgi ubononikid. Geb Ascalón-neggweburse naded. Agine, dulagwen-gakambe (30) dulemar-ogilosad. Degi, a-dulemar-ibe mormar-susad. Geb dulemar-ega-oeged-odalosmaladga a-mormar-uksad. A-sorbali, nue-sae-itogedgi e-sergan-negse naded.
20 Sansón-e-ome machered-baidga uksamalad. A-macheredde, Sansón na e-aiyobi dakdii gusad.