5
Débora, Barac-ebo namaksad
1 A-ibagine, Débora, Abinoam-machi-Barac-ebo namaksad. Weyob namaksamalad:
2 “Israel-dummagan sordagan-idu-nadapile,
dulemar e-binsaedba bila-onogedgi-urwenadele,
Bab-Jehová-nug-odummodii guo.
3 ”¡Reymar, nue be an-itomar!
¡Dummagan, nue be an-itomar!
An namaksokalid, Bab-Jehováʼga an namaksokalid.
Israel-dulemar-e-Bab-Dummad-Jehováʼga an gar-ogorsokalid.
4 ”Bab-Jehová, be Seir-yalagangi nodgua, be Edom-nainugangi nadgua, napneg wawanmakde gusad,
nibneg giglimakde gusad,
mogirmar dii owide gusad.
5 Bab-Jehová Israel-dulemar-e-Bab-Dummad, be-abin Sinaí-yala wawanmaksagusadyobi,
Be-abin yalamar wawanmaksad.
6 ”Dulemar Anat-e-machi-Samgar-ibagangi, degi, Jael-ibagangi, igarmar-dummaganba bar nanassurmalad,
igar-burwiganba nanadii gusmalad, adi, melle boni-amimalagar.
7 Israel-yalagi neggwebur-burwigana ollo-ollo ambikusad,
dule-sate ambikusad, an dummadga megnonikidse.
Ani an Débora, dulemar-anar an gwichigusad,
Israel-dulemar-e-nanayobi an gunonikid.
8 Bab-Dummadye, anmar-Israel-dulemar, bab-dummad-baigan-e-nug-odummosad-ulale,
be anmar-neggweburmargi bila-onoleged barmiar gusad.
Israel-sordamar mili-dulabo-bukwad-abargi (40,000), dule gwen sigu-abgaed-yoi bila-ononai daklessulid,
dule gwen ilawar-swiswidik-annika bila-ononai daklesulid.
9 ”Israel-dummaganba an naid,
dulemar na e-binsaedba bila-onogedgi-urwemaladba an naibalid.
¡Bab-Jehová-nug be odummomar!
10 ”Bemar moli-uayasuid-ome-sipugwadgi nanamaladi,
e-birgi mor-nuegangi be sigmaladi,
be nue dulemar-namaked itomar.
Degine, bemar nagab-nanamalad, be nue dulemar-namaked itomarmo.
11 Dulemar molimar-dii-gobnonidaed-nagaba namakbukwadi, Bab-Dummad-e-igar-innikigwadba-ibmar-imakedgi namakmalad.
Degi, Israel-sorda-bila-onomalad-igar-innikigwadba-ibmar-imakedgi namakmalad.
”Geb Bab-Jehová-e-dulamar, neggwebur-yawagakse nadmalad,
sogdemalad:
12 ‘Débora, namake, namake,
namaklegedgi be namake.
Abinoam-machi-Barac, ogusa,
dule-gasmalad be sede.’
13 ”Dule-besmaladi, dule-nuga-nikamaladba nonimalad.
Bab-Jehová-e-sorda-bila-onomaladi, dule-gandikmaladba anse nonimalad.
14 Efraín-sordamar-Amalec-dulemargi-danikid nonimalad,
a-sorbali, Benjamín-sordamar danigusmogad.
Maquir-wagan-sorda-dummagan nonimalad,
Zabulón-neg-akar dule-idumalad-gangued-nikamalad nonimarmogad.
15 Isacar-e-dummagan, Déboraʼba nadmarmogad.
Baracʼba, Isacar-e-sordagan nadmarmogad,
bila-onogedgi Baracʼba nebase duurmakdemalad.
Rubén-e-sordamardi, mer-naega yamo arbaed-dummad onosmalad.
16 ¿Ibiga bemar sibad-wawaad-edarbemalad-e-goled-itogega, sibad-wawaad-e-galugi be besmala?
Ar Rubén-e-sordamar nue-dobe itosmalad.
17 ”Galaad-e-sordagandi, Jordán-diwar-obakar besmalad.
Dan-e-sordagandi, ur-dummagan-walik besmalad,
Aser-e-sordagandi, demar-gaka-naba besmalad,
sukunyaba e-urmar-edarbemamai gusmalad.
18 Zabulón-e-sordamala, bila-onogedgi burgwed-naga gusmalad.
Neftalí-e-sordamala, bila-onogedgi burgwed-naga gusmarmogad.
19 ”Canaán-dulemar-e-reymar Taanac-neggweburse nonimalad,
Meguido-dian-asabin bila-onosmalad.
Degi-inigwele, manimala, degi, ibmar-nuegana gwen sessurmalad.
20 Nibaneg-akale, niisgwamar ulusad.
Niisgwamar e-nanaid-akale, Sísaraʼgi gwichigusad.
21 Canaán-sordamar, Cisón-diwar obelolesmalad.
Cisón-diwarde, gusgu dikasurgus-maid.
Ani an Débora-gued,
¡Gandikidgi an naoed!
22 ”Sísara-e-molimar binnasuli abarmakmamaidba
e-nagmar binnasuli-gornadapi gusad.
23 Bab-Jehová-e-baliwitur weyob sogded:
‘Meroz-dulemar be sabsur-ukabsasun.
We-dulemar gwen Bab-Jehová-sordamar-bendakapsurmalad,
degi, dule-gandikmaladgi gwen bendakapsurmarbalid.’
24 ”Israel-dulemar-omegan-abargi, Heber-e-ome-Jaelʼgi nued binsalesun,
omegan-dordonegyaba-bukwamaladba bur bule egi nued binsalesun.
Heberʼde Ceneo-duled.
25 Sísara, Jaelʼse dii-egichis gusad,
Jaelʼdi moli-nunisgi ogobsad,
dule-nuga-nikamaladbi-gobed-noggi moli-nunis-ollikwagwadgi ogobsad.
26 Jael e-argan-sapiledsik dordoneg-abingaed-suar susgusad,
e-argan-nuedsik mardo-dummad susgusad.
Geb a-ibmargi Sísara-sarsosad,
e-nono daasa imaksad.
Dordoneg-suargi uaya-matarba Sísara-bioksad,
daksik-noedse imaksad.
27 Jael-asabin Sísara sinnii napagi-melleded,
napagi meremai gusad,
napagi-meremai burgwisad.
28 ”Sísara-e-nan, yawagak-bipigwad-dale-daledba atakalid,
e-machi-yoggud-dakedbali sabsur sogded:
‘¿Ibiga an-machi-e-ur-napagined yoggumai?
¿Ibiga e-ur-napaginmalad-goled itolesuli?’
29 Omegan-binsaed-ibegan-e-walik-gudimalad ega sunmaksamalad.
Geb e-nan omegan-sunmaksadba sogdemogad:
30 ‘Ibmarmar-nued amismarsua, a-miminanairgebed:
Sordamar-iliba, yagan-war-wargwen mimilenairgebed, igi, war-warbodibe.
Sísaraʼgardi, mor-nuegan-akar-akar-dakleged uklenairgebed.
An-dukargi-nasikega mor-akar-akar-dubgi-sobarmalad,
mor-yeerdakleged-bela-dubgi-sobarmalad uklenairgebed.’
31 ”Bab-Jehová, bela wegibi be-isdarmalad bergusun.
Be-sabmaladdi dad-ibeler-gaardaedyob be imako,
yorukudba dad-ibeler-gaedyob be sao.”
Degi, bela we-ibmarmar-gusad-sorbali, birga-dulabo (40) Israel-yargi neg-bogidikid nagusad.