30
An-wile-itoged, weligwaledga be imaksad
David, Bab-Dummadse-goled-neg-nugsalegega namaked narmaksad.
1 Bab-Jehová, an be-nug ogannoged,
ar be an-bendaksad.
An-isdarmalad mer angi wergumalaga be imaksad.
2 An-Bab-Dummad-Jehová, an bese gochagu,
be an-nudaknonikid.
3 Bab-Jehová, an burgwedani-maigu,
be an-bendaknonikid.
Burba-dulad be anga uksad.
Mer burgwarmalad-abargi-megega, be gannar an-ogwisgusad.
4 Bemar Bab-Dummad-e-sordagan, Bab-Jehováʼga be namakmar,
e-nug-islidikid be ogannomar.
5 Bab-Dummad uludele, unnila sikwas-urwed.
Ar nued-emargi-binsaeddina, degisadeguad.
Ar mutikidba, boed nagunonidibe,
neg-oibosardi, wergued nagunonikoed.
6 Anga ibmar-nasgumaigu, an weyob sogsagusad:
“Bipisaale dule an-osikirmakosurye.”
7 Bab-Jehová, ar be-nued-angi-binsaedba, yar-dummad-siidyobi, ganna be an-osisad.
Be angi aibategua, suli-suli an itonaded.
8 Bab-Jehová, an bese goled,
Bab-Dummadye, an bese ise-wilegar goled.
9 Ar an burgwisale,
¿ibu-ibmar-nued egi amilegoe?
An neg-uanse diglenader,
¿ibu-ibmar-nued egi amilegoe?
¿Ar dule-burgwaledde be-nug odummogoe?
¿Ar dule-burgwaledde be-igar-innikigwad barsogoe?
10 Bab-Jehováʼye, be an-itoge, wile be an-dake.
Bab-Jehováʼye, ¡be an-bendake!
11 Bab-Dummad, an-gwage-naibi-itonaid,
be weligwar imaknonikid.
An nunmaked-mor-yoid be anga ungenonikid,
weligwaled-mor be anga yononikid.
12 Bab-Dummad, degisoggu, an bega namaked,
be-nug-odummoged bar an galegosulid,
Bab-Dummad-Jehová, degisadegu, an bega dog-nuedye sogdii guoed.